Skanda Purana · Chapter 2.46

// jaiminiruvāca // //
ataḥ paraṃ pravakṣyāmi yātrāmakṣayamokṣadām //
anāyāsena mūḍhānāṃ vāsanābaddhacetasām

vaiśākhasyāmale pakṣe dvitīyārātrimadhyataḥ //
maṇḍapaṃ ca catuṣkoṇaṃ sudhāliptaṃ savedikam

sudhautavāsasā kuryātpratisīrāsamaṃ tataḥ //
sādhusopānasaṃyuktaṃ cārucaṃdrātapānvitam

tanmadhye vinyasennūnaṃ sādhu bhadrāsanottamam //
tasminnicolasaṃchanne vinyasetsvarṇabhājanam

tasya paścimabhāge vai svāsīno brāhmaṇaḥ śuciḥ //
pātrāṃtare tu gṛhṇīyāccaṃdanaṃ pacaviṃśatim

supiṣṭaṃ kṛṣṇasnehasya gṛhṇīyācca palādhikam //
agurvarddhaṃ kuṃkumaṃ syātkuṃkumārddhaṃ ca sihlakam

kastūrikākarpurayoḥ pramāṇaṃ sihlasaṃmitam //
sarvamekatra saṃpiṣyātpāṭalodbhavavāriṇā

paladvayaṃ tato dadyādagurusnehamuttamam //
ekatra loḍitāṃ kṛtvā pūrvapātre nidhāpayet

ācchādya ketakīpatrairveṣṭayeccīnavāsasā //
gandhaste somamaṃtreṇa rakṣedgaruḍamudrayā

evaṃ tu maṇḍape tasminsādhivāsaṃ nidhāpayet //
aruṇodayakāle'tha nayetkṛṣṇasya sannidhim

śaṃkhacāmarachatrādyairbhrāmayitvā surālayam //
devāgre sthāpayitvā ca pūjayetpuruṣottamam

uddhāṭayettato vastre divyadṛṣṭyāvalokayet //
prokṣitaṃ maṃtrarājena saṃkuryāttāḍanādibhiḥ

gaṃdhapuṣpākṣataiḥ pūjyaḥ śriyaḥ sūktena lepayet //
śrīśasya sarvagātreṣu mṛdusparśaṃ śanaiḥ śanaiḥ

vaiṣṇavā jayaśabdaistaṃ varddhayaṃti tadā harim //
nānāsūktopaniṣadairvidvāṃsastaṃ stuvaṃti vai

veṇuvīṇādikairnṛtyagītavādyairanekaśaḥ //
vyajanaiścāmaraicchatrairanyairnānopahārakaiḥ

saṃtoṣayañjagannāthaṃ tṛtīyādau vilepayet //
yasya ciṃtanamātreṇa tāpā naśyaṃti dehinām //

so'sau saṃdarśanāttāpānnṛṇāṃ haṃti tadā dvijāḥ //
acintyo mahimā viṣṇorīdṛktādṛktayā sadā

tataḥ sūkṣmāṃbarairmālyairbhakṣyabhojyādipānakaiḥ //
dravyairnānāvidhairhṛdyairgavyairāvartitaiḥ śubhaiḥ

tataḥ saṃpūjayeddevaṃ tāṃbūlaiśca susaṃskṛtaiḥ //
tasminkāle tu ye kṛṣṇaṃ bhaktyā paśyaṃti mānavāḥ

na teṣāṃ punarāvṛttiḥ kalpakoṭiśatairapi //
viṣṇoḥ svarūpamāsādya viṣṇuloke vasaṃti vai

purā kaliyuge viprā dakṣo nāma prajāpatiḥ //
ādhyātmikādisaṃtāpaiḥ sudīnānvīkṣya mānavān

tatra gatvā kṛpāyukto mahimānaṃ cakāra vai //
yathāvidhi mayā proktaṃ sa eva prathamaṃ dvijāḥ

pralipya candanenāṃge mādhavāmalapakṣake //
tṛtīyāyāṃ jagannāthaṃ stutimetāṃ mudā jagau

// dakṣa uvāca // //
devadeva jagannātha sahajānaṃdanirmala //
saṃsārārṇavasaṃmagnāṃstrāhi naḥ parameśvara

nānāvidhaiśca saṃtāpaiḥ saṃtaptānmānavānimān //
mamānukrośabuddhyā vai śubhadṛṣṭyā'mṛtena ca

saṃtarpaya tṛṇāñchuṣkānkṛṣṇa me'gha namo'stute //
kalikalmaṣasaṃmūḍhānuddhartuṃ jagatāṃ pate

avatāro'yametasminnīlācalaguhāṃtare //
cirakālaprarūḍhānāṃ dustyajānāṃ mahāṃhasām

rāśiṃ dagdhuṃ tvameveśo dīnānāthakṛpākara //
tvaddarśanamahāyoge yamādyaṣṭāṃgavarjite

yeṣāṃ matiḥ samutpannā caturvargaikasādhane //
na te śocaṃti duṣpāre bhavāraṇye mahābhaye

karmānapekṣaṃ deveśa nātmajñānaṃ vimocakam //
idaṃ te darśanaṃ nātha vinā karmāpi mocayet

jaya kṛṣṇa jayeśāna jayākṣara jayāvyaya //
prasīdānugṛhāṇemāndīnānmūḍhānvicetasaḥ

iti stutvā daṃḍapātaṃ papāta caraṇāṃbuje //
prasīdeśa prasīdeśa prasīdeśeti ghoṣayan

tato jagāda bhagavānsusvareṇa prajāpatim //
uttiṣṭha vatsa te dattaṃ durlabhaṃ yadvaraṃ tvayā

kāṃkṣitaṃ matprasādena bhaviṣyati na saṃśayaḥ //
madanugraho'lpapuṇyānāṃ durlabho viditastava //

madaṃgajāto'sti bhavānmāṃ tvaṃ prārthitavānasi //
mamotsavena santoṣya tataste pradadāmyaham

imāmakṣayayātrāṃ ye bhaktyā paśyaṃti harṣitāḥ //
tasminkāle yadicchaṃti manasā tadavāpnuyuḥ

yathā saṃtāpaharaṇaṃ candanenānulepanam //
tathotsavo'yaṃ me dakṣa saṃtāpatrayanāśanaḥ

matpreritamatistvaṃ hi utsavaṃ kṛtavānasi //
saṃkalpito'yaṃ manasā dīnoddhṛtyai mayā dhruvam

tvayābhikākṣitaṃ sarvaṃ dāsyāmyeva prajāpate //
dvādaśaitā mahāyātrā guṇḍicādyāstu pāvanāḥ

ekaikā muktidā sarvā dharmakāmārthavarddhanāḥ

tāsāmekatamāṃ vāpi yo bhaktyā cāvalokayet //
ekayāpi bhavābdhiṃ sa tīrtvā viṣṇupadaṃ vrajet

// jaiminiruvāca // //
ityudīrya prajānāthaṃ bhagavānsa tirodadhe

dakṣaḥ prajāpatiḥ so'pi śraddadhānastadājñayā //
saṃvatsaraṃ girau sthitvā saṃdadarśa mahotsavān

sarvajño brāhmaṇo bhūtvā kauśikasya kulottame //
lokānpravartayāmāsa yathāvidhi maheṣu saḥ

viśvāsāyālpabuddhīnāṃ yātrā vai parikīrtitāḥ //
ayaṃ ca sākṣātparamabrahmarūpī jagadguruḥ //
prasāditaḥ sureśena lokānugrahaṇāya vai

yathā tathā dṛṣṭipathaṃ yāto muktiprado dhuvam //
sarvānkāmāndadātyeva nārīṇāṃ nātra saṃśayaḥ

satyapratijño bhagavāṃstatrāste madhusūdanaḥ //
śokaṃ tarati yaṃ dṛṣṭvā bhavapāthodhisaṃbhavam //
kiṃ vrataiḥ kiṃ tapodānaiḥ kiṃ kṛcchraiḥ kratubhistathā

kimaṣṭāṃgena yogena kiṃ sāṃkhyena pareṇa ca

tīrtharājajale snātvā kṣetre śrīpuruṣottame //
nyagrodhamūlavasatau vasantaṃ carmacakṣuṣā //
dṛṣṭvā dārumayaṃ brahma dehabaṃdhātpramucyate

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmye ṣaṭcatvāriṃśo'dhyāyaḥ