Skanda Purana · Chapter 2.44

// jaiminiruvāca // //
atra vaḥ kathayiṣyāmi vrataṃ sāṃvatsaraṃ param//
saṃvatsarasyādidine paurṇamāsyāṃ tu phālgune

anādidevasya harermūrttayo dvādaśaiva yāḥ//
viṣṇvādināmaprathitāḥ pratimāsaṃ prapūjayet

ekaikāṃ mūrtimetāsāṃ māseṣu dvādaśasvapi //
pratyahaṃ pūjayetpuṣpaiḥ phalairdvādaśabhistathā

aśoko mallikā caiva pāṭalaṃ ca kadaṃbakam //
karavīraṃ jātipuṣpaṃ mālatīśatapatrakam

utpalaṃ caiva vāsaṃtī kuṃdaṃ punnāgakaṃ tathā//
etāni kramaśo dadyātkusumāni harermudā

dāḍimaṃ nārikelaṃ ca āmraṃ ca panasaṃ tathā //
kharjūraṃ tṛṇarājaṃ ca prācīnāmalakaṃ tathā

śrīphalaṃ nāgaraṃgaṃ ca kramukaṃ karamaṅgakam //
jātīphalaṃ ca kramaśaḥ phalānyetāni vai dadet

bhakṣyabhojyāni coṣyāṇi lehyāni madhurāṇi ca //
āsanādyupacārāṃśca dattvā stutvā jagadgurum

sarvavyāpiñjagannātha bhūtabhavyabhavatprabho //
trāhi māṃ puṃḍarīkākṣa viṣṇo saṃsārasāgarāt

ekārṇavajale raudre nirālaṃbe purā madhum///
avadhīrviśvarakṣārtha madhusūdana rakṣa mām

trīnvikramānkramitvā yo hatvā daityabalaṃ mahat//
trailokyaṃ pālayāmāsa trivikrama namostu te

kṛtvā vāmanakaṃ rūpamṛgyajuḥsāmagarbhakam //
mohayitvādbhutaṃ rūpaṃ tasmai māyāvine namaḥ

yaḥ śriyaṃ dhārayennityaṃ hṛdi bhaktebhya eva ca //
dadātyapi śriyaṃ tasmai śrīdharāya namo'stu te

iṃdriyāṇāmadhiṣṭhātā yaḥ sarveṣāṃ sadā prabhuḥ //
sukhaikaheturbhaktānāṃ hṛṣīkeśa namo'stu te

yannābhipadmasaṃbhūtaṃ jagadetaccarācaram //
vidhāturāsanaṃ nityaṃ padmanābha namo'stu te

yasyaitattriguṇairbaddhaṃ jagadetaccarācaram//
dāmnā baddhaḥ sa gopyā tu dāmodara namo'stu te

trailokyaviplavakaraṃ hatavānkeśidānavam//
īśitā sarvasaukhyānāṃ trāhi keśava māṃ prabho

sraṣṭā sasarja bhūtāni jagatāmādikāraṇam //
aciṃtyamahimanviṣṇo nārāyaṇa namo'stu te

māyayā yasya viśvaṃ vai mohitaṃ yadanādyayā //
sarvadharmasvarūpāya mādhavāya namo namaḥ

jñānināṃ jñānagamyastvamagatīnāṃ gatipradaḥ //
saṃpūrṇamastu goviṃda tvatprasādādvrataṃ mama

pratimāsaṃ pūjanāṃte maṃtrairetaiḥ kṛtāṃjaliḥ //
prārthayetparayā bhaktyā bhajanāṃtaṃ janārdanam

evaṃ saṃvatsaraṃ nītvā vrataṃ vai mūrtipaṃjaram //
saṃpūrṇaphalasiddhyarthaṃ pratiṣṭhāvidhimācaret

suvarṇanirmitā viṣṇormūrtayo dvādaśaiva tu //
yathāśakti kṛtāḥ sthāpyāḥ kuṃbheṣu dvādaśasvapi

āmrapātrācchāditeṣu sākṣātteṣu pṛthakpṛthak //
śvetavastrāvanaddheṣu gaṃdhapallavavāriṣu

aṣṭadikṣu caturdikṣu sarvatobhadramaṃḍale //
sthāpanīyāśca te kuṃbhāsteṣu pūjyāśca mūrtayaḥ

dvādaśākṣaramaṃtreṇa upacāraiḥ pṛthakpṛthak //
paṃcāmṛtaiśca snapanaṃ sarveṣāmādito dvijāḥ

gītavāditranṛtyādyaistathā brāhmaṇapūjanaiḥ //
vastrayugmairdvādaśabhiśchatropānadyugaistathā

vyajanairudakuṃbhaiśca śayanīyaiḥ sapīṭhakaiḥ //
gaṃdhairmālyaiḥ sutāṃbūlairmudrikākuṃḍalaistathā

pradīpāḥ sarpiṣā jvālyā dvādaśadvādaśa kramāt //
nītvā triyāmāmitthaṃ vai prabhāte vahnikarma ca

samidājyacarūṇāṃ vai pratidevaṃ śatatrayam//
aṣṭottarasahasraṃ tu tilairvyāhṛtibhistataḥ

homāṃte prāśanaṃ kṛtvā dadyādācāryadakṣiṇām //
kapilā dhenavo deyāḥ sālaṃkārāśca dvādaśa

śataṃ catuścatvāriṃśadbrāhmaṇānbhojayettataḥ //
taddevavṛṃdaṃ saghaṭaṃ savitānaṃ sacāmaram

sarvopacārasahitamācāryāya nivedayet//
vratarājamimaṃ kṛtvā sarvānkāmānavāpnuyāt

guṃḍicādyāstu yā yātrā viṣṇordvādaśa kīrtitāḥ //
tāsāṃ darśanajaṃ puṇyaṃ vratenānena labhyate

aiṃdraṃ padaṃ sārvabhaumaṃ cakravartitvameva ca //
aṣṭaiśvaryamavāpnoti devadevaprasādataḥ

etanmahāpuṇyatamaṃ nāradaḥ kṛtavānvratam //
kṛtvā dvādaśa varṣāṇi jīvanmukto'bhavanmuniḥ

anye ca vaiṣṇavā ye vai cakruste bahuśaḥ purā // vrataṃ nātaḥ parataraṃ bhagavatprītikārakam

dharmyaṃ yaśasyamāyuṣyaṃ brāhmaṇyaṃ vaṃśavarddhanam//
bhavaṃto'pi yatātmānaḥ kurvaṃti vratamuttamam

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmye jyeṣṭhapaṃcakavratavarṇanaṃnāma catuścatvāriṃśo'dhyāyaḥ