Skanda Purana · Chapter 2.42

// jaiminiruvāca // //
mṛgarāśiṃ saṃkramati yadā bhāsvāndvijottamāḥ //
uttarāśāṃ jigamiṣustadā syāduttarāyaṇam

tasya saṃkramaṇārddhaṃ ca yāvatsyurviṃśatiḥ kalāḥ //
mahāpuṇyatamaḥ kālaḥ pitṛdevadvijapriyaḥ

tatra snātvā vidhānena rtārtharājajale naraḥ //
nārāyaṇaṃ samabhyarcya kalpavṛkṣaṃ praṇamya ca

praviśya devatāgāraṃ kṛtvā taṃ triḥ pradakṣiṇām//
mantrarājena saṃpūjya devaṃ śrīpuruṣottamam

tathā balaṃ subhadrāṃ ca svamantreṇa prapūjayet //
dṛṣṭvottarāyaṇe devaṃ mucyate dehabandhanāt

vidhānaṃ tasya vakṣyābhi śṛṇudhvaṃ pāvanaṃ mahat //
saṃkrāṃteḥ pūrvadivase navāṃ śāliṃ sukuṭṭitām

prāsādapūrvadeśe ca sthāpayitvādhivāsayet //
navena vāsasāveṣṭya dūrvāsarṣapapuṣpakaiḥ

pūjayitvā mantrayedvai kṛṣṇastvāmabhirakṣatu //
tasminneva niśāyāme vyatīte jagadīśituḥ

pratyarcāṃ sannidhau nītvā bhāvayedekatādhiye //
upacārāvaśiṣṭābhyāṃ pūjayedvai samāhitaḥ

tato nirmālyavasanamālāmasyāṃ nidhāpayet //
mahāsamṛddhyā tāmarcāṃ trirdevānbhrāmayettataḥ

āṃdolikāyāmāropya prāsādadvāramānayet //
trivikramaṃ trikrameṇa trailokyakramaṇaṃ vibhum

viḍaṃbayaṃtaṃ tāṃ līlāṃ prāsādaṃ bhrāmayecca tam //
triraṃte punaraṃke ca susamṛddhyā śanaiḥśanaiḥ

dīpikāśatasaṃruddhatamasovaraṇāṃtare //
chatradhvajapatākābhirnṛtyavāditragītakaiḥ

taddarśanaparikṣīṇapātakānāṃ mahātmanām //
na ca cihnaṃ śarīre'sya navāṃge bhramaṇaṃ tataḥ

anuyāṃti tadā ye taṃ mahe yāṃtaṃ trivikramam //
labhaṃte vājimedhasya phalaṃ te vai pade pade

prathamabhramaṇaṃ dṛṣṭvā mucyate pañcapātakaiḥ //
malinīkaraṇairmucyeddvitīyaṃ bhramaṇaṃ dvijāḥ

apātrīkaraṇairdṛṣṭvā tṛtīyaṃ bhramaṇaṃ dhruvam //
upapātakapāpaiśca caturthaṃ mucyate tataḥ

punaḥ prabhāte deveśaṃ praliṃpedgandhacandanaiḥ //
vastrālaṃkāramālyaiśca bhūṣayitvā yathāvidhi

pūjayedupacāraistaṃ yathāśakti samṛddhimat //
nīrājayitvā deveśaṃ taṃdulānadhivāsitān / १९ //
sthālīṣu śātakuṃbhāsu dadhikhaṃḍājyamiśritān //
sanārikelaśakalācchṛṃgavera dalānvitān

prāsādaṃ triḥ paribhramya nayeddevasamīpataḥ //
paṃktiśaḥ sthāpayedagre gandhapuṣpākṣatānvitān

jīvanaṃ sarvabhūtānāṃ janakastvaṃ jagatprabho //
tvanmayāḥ śālayo hyete tvayaiva janitāḥ prabho

lokānugrahaṇārthāya gṛhītocitavigraha //
tava prītyai kṛtānetāngṛhāṇa parameśvara

tvayi tuṣṭe jagatsarvamanena prabhaviṣyati //
svāhākārasvadhākāravaṣaṭkārā divaukasām

āpyāyanā bhaviṣyaṃti tairevāpyāyitaṃ jagat //
rakṣa sarvaṃ jagannātha tvanmayaṃ sacarācaram

iti saṃprārthya deveśaṃ śālistaṃbānnivedayet //
tanmayānbhakṣabhojyāṃśca dadhikuṃbhānsugaṃdhinaḥ

karpūrakhaṃḍamaricacūrṇayuktānnivedayet //
brāhmaṇānpūjayedbhaktyā devadevapuraḥsthitān

tebhyaḥ pradadyādbhaktyā tāñchālyādīnbhagavaddhiyā //
imaṃ mahotsavaṃ viprāḥ purā kalpe ca kaśyapaḥ

sa ca sṛṣṭiṃ vinirmāya bhagavatprītaye'karot //
ye paśyantyutsavaṃ cainaṃ kaśyapena vinirmitam

sarvadā sarvakāmaiste pūrṇāḥ śocaṃti na dvijāḥ //
uṣitvā tridaśaiḥ sārddhaṃ kalpāṃte mokṣamāpnuyuḥ

mahānasasya saṃskāraṃ vahneḥ saṃskārameva ca //
atrāpi kuryānmunayo vaiśvadevaṃ dinedine

ādhānasaṃskṛte vahnau bhagavadbhuktaye ramā //
pratyahaṃ pākamādhatte divyarūpā tirohitā

asminmahāpuṇyatama utsave paramātmanaḥ //
tulāpuruṣadānādi koṭikoṭiguṇaṃ bhavet

snānaṃ dānaṃ tapo homaḥ svādhyāyaḥ pitṛtarpaṇam //
sarvamakṣayatāṃ yāti hyutsave cottarāyaṇe

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmye makarasaṃkramavidhivarṇanaṃnāma dvicatvāriṃśo'dhyāyaḥ