Skanda Purana · Chapter 2.40

// // jaiminiruvāca // //
mārgaśīrṣe site pakṣe ṣaṣṭhyāṃ prāvaraṇotsavam //
kṛtvā dṛṣṭvā naro bhaktyā vaiṣṇavaṃ lokamāpnuyāt

vidhānaṃ tasya vakṣyāmi śṛṇudhvaṃ munayo'dhunā //
vāsodhivāsaṃ kurvīta paṃcamyāṃ niśi karmavit

devāgre maṃḍape kuryātpadmamaṣṭadalānvitam //
dikpālānpūjayeddikṣu kṣetrapālaṃ gaṇādhipam

caṃḍapracaṃḍau ca bahiścaturdikṣu prapūjayet //
madhye pātraṃ samādhāya prokṣayedvastravāriṇā

dyutānastveti maṃtreṇacchādayeddivyavāsasā //
sudhūpitaṃ vastrajātamekaviṃśatisaṃkhyakam

tanmadhye sthāpayenmaṃtraṃ vaiṣṇavaṃ ca samuccaran //
anyena vāsasā taddhi samācchādya prayatnataḥ

spṛṣṭvā japenmaṃtramimaṃ saṃsmaranpuruṣottamam //
ācchādako yo jagatāṃ tejasā viṣṇuravyayaḥ

vasanāttasya vastra tvaṃ vasa vāse jagatpateḥ //
indraghoṣastveti rakṣāṃ vidadhyāttasya sarvataḥ

pūjayedgaṃdhapuṣpābhyāṃ tato devaṃ prapūjayet //
sarvalepaṃ prakurvīta nṛtyagītairnayenniśām

tato'ruṇodaye kāle prātaḥsaṃdhyāsamīpataḥ //
punaḥ prapūjayeddevaṃ pūrvavatsusamāhitaḥ

tatastaṃ pūjitaṃ vastrasamūhaṃ bahirānayet //
kārpāsapaṭṭakṣaumāḍhyaṃ tathaivācchāditaṃ dvijāḥ

chatradhvajapatākābhiścāmarāṃdolanaistathā //
gītavāditranṛtyaiśca prasūnotkiraṇena ca

prāsādaṃ triḥ paribhramya devaṃ trirbhrāmayettataḥ //
ācchāditaṃ tadākṛṣya saṃskuyārdvīkṣaṇādibhiḥ

saptabhiḥ saptabhirdevānvāsobhiḥ pariveṣṭayet //
mukhavarjaṃ tu sarvāṃgaṃ śītaprāvaraṇairdvijāḥ

tāṃbūlaṃ ca nivedyātha karpūralatikāṃ tathā //
dūrvākṣataiḥ prapūjyātha kuryānnīrājanaṃ vibhoḥ

himāgame nṛsiṃhaṃ ye prāvṛṇvaṃti sucelakaiḥ //
paśyaṃti prāvṛtiṃ ye vā na teṣāṃ mohasaṃvṛtiḥ

te dvaṃdvavātaśītotthabhayaṃ nāpnuvate kvacit //
viṣṇordevādhidevasya imaṃ prāvaraṇotsavam

bhaktyā ye vai prapaśyaṃti sarvānkāmānavāpnuyuḥ //
bhagavaṃtaṃ samuddiśya brāhmaṇebhyaḥ pradāpayet //

gurubhyaścānyadevebhyo dīnānāthebhya eva ca //
śītaprāvaraṇaṃ dadyātsatkṛtya parayā mudā //
dadāti bhagavānprītastasmai varamanuttamam//

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmye prāvaraṇotsavavarṇanaṃnāma catvāriṃśo'dhyāyaḥ