Skanda Purana · Chapter 2.34

// nārada uvāca // //
vratānāmapi sarveṣāṃ brahmannudyāpanaṃ śrutam //
abhāve tūdyāpanasya phalaṃ naivā''pnuyātkvacit

kṛtavrataphalāptyarthaṃ kuryādudyāpanaṃ budhaḥ //
anyathā niṣphalaṃ yāti kṛtaṃ vratamanuttamam

kārtike'pi kṛtaṃ deva vratānāmuttamaṃ vratam //
na tasyodyāpanā'bhāve vratoktaphalamāpnuyāt

tasmātkārtikamāsasya codyāpanavidhiṃ prabho //
vada me śiṣyavaryāya prapannāyā'nuvartine

// brahmovāca // //
athorjodyāpanaṃ vakṣye sarvapāpapraṇāśanam //
tacchṛṇuṣva mahābhaktyā savidhānaṃ samāsataḥ

ūrje śuklacaturdaśyāṃ kuryādudyāpanaṃ vratī//
vratasaṃpūraṇārthāya viṣṇuprītyarthahetave

tulasyā upariṣṭāttu kuryānmaṃḍapikāṃ śubhām//
kadalīstaṃbhasaṃyuktāṃ nānādhātuvicitritām

dīpamālā caturdikṣu kāryā tatra suśobhanā //
sutoraṇāścaturdvāraḥ puṣpacāmaraśobhitāḥ

dvāreṣu dvārapālāśca pūjayenmṛnmayānpṛthak //
jayaśca vijayaścaiva caṇḍaścaiva pracaṃḍakaḥ

nandaścaiva sunaṃdaśca kumudaḥ kumudākṣakaḥ //
etāṃścaturṣu dvāreṣu pūjayedbhaktisaṃyutaḥ

tulasīmūladeśe tu sarvatobhadrasaṃjñitam //
caturbhirvarṇakaiḥ samyakchobhāḍhyaṃ samalaṃkṛtam

tasyopariṣṭātkalaśaṃ pūrṇaratnasamanvitam //
tatra saṃpūjayeddevaṃ śaṃkhacakragadādharam

kauśeyapītavasanaṃ lakṣmyā yuktaṃ prapūjayet //
indrādilokapālāṃśca maṃḍape pūjayedvratī //

tasyāmupavasedbhaktyā śāṃtaḥ praṇatamānasaḥ //
rātrau jāgaraṇaṃ kuryādgītavādyādimaṃgalaiḥ

gītaṃ kurvaṃti ye bhaktyā jāgare cakrapāṇinaḥ //
janmāṃtaraśatodbhūtaiste muktāḥ pāpasaṃcayaiḥ

tatastu pūrṇimāyāṃ tu sapatnīkāndvijottamān //
triṃśanmitānathaikaṃ vā brāhmaṇāṃśca nimaṃtrayet

prātaḥsnānaṃ tataḥ kṛtvā devapūjāṃ tathaiva ca //
sthaṃḍile ca tataḥ kṛtvā samādhāyā'gnimatra hi

ato deveti maṃtreṇa juhuyāttilapāyasam //
prītyarthaṃ devadevasya devānāṃ ca pṛthakpṛthak

homaśeṣaṃ samāpyātha brāhmaṇānpūjya bhaktitaḥ //
brāhmaṇebhyo yathāśaktyā pradadyāddakṣiṇāṃ naraḥ

tato gāṃ kapilāṃ tatra pūjayedvidhivadvratī //
savatsāṃ gāṃ tathā dadyādviprāya ca kuṭumbine

guruṃ vratopadeṣṭāraṃ vastrālaṃkārabhūṣaṇaiḥ //
sapatnīkaṃ samabhyarcya tāṃśca viprānkṣamāpayet

yuṣmatprasādāddeveśaḥ prasanno'stu sadā mama //
vratādasmācca yatpāpaṃ saptajanmakṛtaṃ mayā

tatsarvaṃ nāśamāyātu sthirā me cā'stu saṃtatiḥ //
manorathāstu saphalāḥ saṃtu bhaktirharau bhavet

satāṃ samāgamo bhūyānmama janmanijanmani //
iti kṣamāpya tānviprānprasādya ca visarjayet

pratimāṃ tāṃ gurordadyātsavastrāṃ munipuṃgava //
tataḥ suhṛdguruyutaḥ svayaṃ bhuṃjīta bhaktimān

dvādaśyāṃ pratibuddho'sau trayodaśyāṃ yutaḥ suraiḥ //
dṛṣṭorccitaścaturdaśyāṃ tasmātpūjyastithāviha

pūjayeddevadeveśaṃ sauvarṇaṃ gurvanujñayā //
parā'tra paurṇamāsyāṃ tu yātrā syātpuṣkarasya tu

varāndattvā yato viṣṇurmatsyarūpo'bhavattataḥ //
tasyāṃ dattaṃ hutaṃ japtaṃ tadakṣayyaphalaṃ bhavet

kārtike māsi kartavyo vidhireṣa hi nārada //
evaṃ yaḥ kurute samyakkārtikasya vrataṃ naraḥ

yatphalaṃ tadavāpnoti vrataṃ kṛtvā tu kārtike //
te dhanyāste sadā pūjyāsteṣāṃ vai saphalodayaḥ

viṣṇubhaktiratā ye syuḥ kārtike vratacāriṇaḥ //
dehasthitāni pāpāni vilayaṃ yāṃti tatkṣaṇāt

kva yāmo'dya bhavatyeṣa yadūrjavratakṛnnaraḥ //
iti sarvāṇi pāpāni raṭantīha punaḥpunaḥ

tasmātkārtikamāsasya sadṛśaṃ nahi vidyate //
sarvapāpasya dahane agneḥ sadṛśa ucyate

ūrjodyāpanamāhātmyaṃ śṛṇuyācchraddhayā'nvitaḥ //
śrāvayedvā pumānyastu viṣṇusāyujyamāpnuyāt

// nārada uvāca // //
ūrje vratodyāpanādāvaśaktaḥ siddhibhākkatham //
kathaṃ vimucyate jaṃturduḥkhasaṃsārasāgarāt

// // brahmovāca // //
śṛṇuyādūrjamāhātmyaṃ niyamena śuciḥ pumān //
udyāpanaphalaṃ prāpya viṣṇuloke vasecca saḥ

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe kārtikamāsamāhātmye vratodyāpanavidhikathanaṃnāma catu'striṃśo'dhyāyaḥ