Skanda Purana · Verses 1.35-2

//nārada uvāca//
kumāreṇa sthāpito'tra kumāreśastataḥ surāḥ//
praṇamya guhamūcuśca prabaddhakarasaṃpuṭāḥ

kiṃcidvijñāpayaṣyāmo vayaṃ tvāṃ śrṛṇu tattvataḥ//
pūrvaprasiddha ācāraḥ procyate jayināmayam

jayaṃti ye raṇe śatrūṃstaiḥ kāryaḥ staṃbhacihnakaḥ//
tasmāttava jayoddyotanimittaṃ staṃmamuttamam

nakṣipāma vayaṃ yāvattmanujñātumarhasi//
viśvakarmakṛtaṃ yacca tṛtīyaṃ liṃgamuttamam

tasya staṃbhāgratasataṃ ca saṃsthāpaya śivātmaja//
evamukte suraiḥ skandastatetyāha mahāmanāḥ

tato hṛṣṭāḥ suragaṇāḥ śakrādyāḥ staṃbhamuttamam//
jāṃbūnadamayaṃ śubhraṃ raṇabhūmau vinikṣipuḥ

paritaḥ sthaṃḍilaṃ dikṣu sarvaratnamayaṃ tu te//
tatra hṛṣṭāścāpsaraso nanṛturdaśadhā śubhāḥ

mātaro maṃgalānyasya jaguḥ skandasya naṃditāḥ//
iṃdrādyā nanṛtustatra svayaṃ viṣṇuśca vādakaḥ

petuḥ khātpuṣpavarṣāṇi devavādyāni sasvanuḥ//
evaṃ staṃbhaṃ samāropya jayākhyaṃ viśvanaṃdakaḥ

stambheśvarastato devaḥ sthāpitastryakṣasūnunā//
viriṃcipramukhairdevairjātānandaiḥ samaṃ tadā

hariharādityuktaistaiḥ sendrairmunigaṇairapi//
tasyaiva paścime bhāge śaktyagreṇa mahātmanā

guhena nirmitaḥ kūpo gaṃgā tatra talodbhavā//
māghasya ca caturdaśyāṃ kṛṣṇāyāṃ pitṛtarpaṇam

kūpe snānaṃ naraḥ kṛtvā bhaktyā yaḥ pāṃḍunaṃdana//
gayāśrāddhena yatpuṇyaṃ tatphalaṃ labhate sphuṭam

staṃbheśvaraṃ tato devaṃ gandhapuṣpaiḥ prapūjayet//
vājapeyaphalaṃ prāpya modate rudrasadmāni

paurṇamāsyāmamāvāsyāṃ mahīsāgarasaṃgame//
śrāddhaṃ kṛtvā ca yo'bhyarcceṃtstaṃbheśvaramakalmaṣaḥ

pitarastasya tṛpyaṃti tṛptā yacchaṃti cāśiṣaḥ//
sa bhittvā sarvapāpāni rudraloke mahīyate

ityāha bhagavānrudraḥ skandasya prītaye purā//
evameva caturthaṃ ca sthāpitaṃ liṃgamuttamam

praṇemurdevatāḥ sarve sādhusādhviti te jaguḥ

iti skāṃdemahāpurāṇa ekāśītisāhasryāṃ saṃhitāyāṃ prathame māheśvarakhaṇḍe kaumārikākhaṇḍe staṃbheśvaramāhātmyavarṇana nāma paṃcatriṃśo'dhyāyaḥ