Śivapurāṇa, Books 1 and 7 · Chapter 7.2.23

oṃ iti śrīśivamahāpurāṇe saptamyāṃ vāyavīyasaṃhitāyāmuttarakhaṇḍe śivaśāstroktanityanaimittikakarmavarṇanaṃ nāma dvāviṃśo 'dhyāyaḥ
Chapter 23
upamanyuruvāca
vyākhyāṃ pūjāvidhānasya pravadāmi samāsataḥ
śivaśāstre śivenaiva śivāyai kathitasya tu

aṃgamabhyaṃtaraṃ yāgamagnikāryāvasānakam
vidhāya vā na vā paścādbahiryāgaṃ samācaret

tatra dravyāṇi manasā kalpayitvā viśodhya ca
571b
dhyātvā vināyakaṃ devaṃ pūjayitvā vidhānataḥ

dakṣiṇe cottare caiva naṃdīśaṃ suyaśaṃ tathā
ārādhya manasā samyagāsanaṃ kalpayedbudhaḥ

ārādhanādikairyuktassiṃhayogāsanādikam
padmāsanaṃ vā vimalaṃ tattvatrayasamanvitam

tasyopari śivaṃ dhyāyetsāṃbaṃ sarvamanoharam
sarvalakṣaṇasaṃpannaṃ sarvāvayavaśobhanam

sarvātiśayasaṃyuktaṃ sarvābharaṇabhūṣitam
raktāsyapāṇicaraṇaṃ kuṃdacaṃdrasmitānanam

śuddhasphaṭikasaṃkāśaṃ phullapadmatrilocanam
caturbhujamudārāṅgaṃ cārucaṃdrakalādharam

varadābhayahastaṃ ca mṛgaṭaṃkadharaṃ haram
bhujaṃgahāravalayaṃ cārunīlagalāṃtaram

sarvopamānarahitaṃ sānugaṃ saparicchadam
tataḥ saṃciṃtayettasya vāmabhāge maheśvarīm

praphullotpalapatrābhāṃ vistīrṇāyatalocanām
pūrṇacaṃdrābhavadanāṃ nīlakuṃcitamūrdhajām

nīlotpaladalaprakhyāṃ candrārdhakṛtaśekharām
ativṛttaghanottuṃgasnigdhapīnapayodharām

tanumadhyāṃ pṛthuśroṇīṃ pītasūkṣmavarāmbarām
sarvābharaṇasaṃpannāṃ lalāṭatilakojjvalām

vicitrapuṣpasaṃkīrṇakeśapāśopaśobhitām
sarvato 'nuguṇākārāṃ kiṃcillajjānatānanām

hemāraviṃdaṃ vilasaddadhānāṃ dakṣiṇe kare
daṃḍavaccāparaṃ haste nyasyāsīnāṃ mahāsane

pāśavicchedikāṃ sākṣātsaccidānaṃdarūpiṇīm
evaṃ devaṃ ca devīṃ ca dhyātvāsanavare śubhe

sarvopacāravadbhaktyā bhāvapuṣpaissamarcayet
athavā parikalpyaivaṃ mūrtimanyatamāṃ vibhoḥ

śaivīṃ sadāśivākhyāṃ vā tathā māheśvarīṃ parām
ṣaḍviṃśakābhidhānāṃ vā śrīkaṃṭhākhyāmathāpi vā

mantranyāsādikāṃ cāpi kṛtvā svasyāṃ tanau yathā
asyāṃ mūrtau mūrtimaṃtaṃ śivaṃ sadasataḥ param

dhyātvā bāhyakrameṇaiva pūjāṃ nirvartayeddhiyā
samidājyādibhiḥ paścānnābhau homaṃ ca bhāvayet

bhrūmadhye ca śivaṃ dhyāyecchuddhadīpaśikhākṛtim
itthamaṃge svataṃtre vā yoge dhyānamaye śubhe

agnikāryāvasānaṃ ca sarvatraiva samo vidhiḥ
atha ciṃtāmayaṃ sarvaṃ samāpyārādhanakramam

liṃge ca pūjayeddevaṃ sthaṃḍile vānale 'pi vā