Śivapurāṇa, Books 1 and 7 · Chapter 7.1.21

iti śrīśivamahāpurāṇe saptamyāṃ vāyavīyasaṃhitāyāṃ pūrvakhaṇḍe yajñavidhvaṃsano nāma viṃśo 'dhyāyaḥ
Chapter 21
vāyuruvāca
tatastridaśamukhyāste viṣṇuśakrapurogamāḥ
sarve bhayaparitrastādudruvurbhayavihvalāḥ

nijairadūṣitairaṃgairdṛṣṭvā devānupadrutān
daṃḍyānadaṃḍitānmatvā cukopa gaṇapuṃgavaḥ

tatastriśūlamādāya śarvaśaktinibarhaṇam
ūrdhvadṛṣṭirmahābāhurmukhājjvālāḥ samutsṛjan

amarānapi dudrāva dviradāniva kesarī
tānabhidravatastasya gamanaṃ sumanoharam

vārāṇasyeva mattasya jagāma prekṣaṇīyatām
tatastatkṣobhayāmāsa mahatsurabalaṃ balī

mahāsarovaraṃ yadvanmatto vāraṇayūthapaḥ
vikurvanbahudhāvarṇānnīlapāṃḍuralohitān

vibhradvyāghrājinaṃ vāso hemapravaratārakam
chindanbhindannuda 1klindandārayanpramathannapi

vyacaraddevasaṃgheṣu bhadro 'gniriva kakṣagaḥ
tatra tatra mahāvegāccaraṃtaṃ śūladhāriṇam

tamekaṃ tridaśāḥ sarve sahasramiva menire
bhadrakālī ca saṃkruddhā yuddhavṛddhamadoddhatā

muktajvālena śūlena nirbibheda raṇe surān
sa tayā ruruce bhadro rudrakopasamudbhavaḥ

prabhayeva yugāṃtāgniścalayā dhūmadhūmrayā
bhadrakālī tadāyuddhe vidrutatridaśābabhau

1 nalopa ārṣaḥ
524b
kalpe śeṣānalajvālādagdhāviśvajagadyathā
tadā savājinaṃ sūryaṃ rudrānrudragaṇāgraṇīḥ

bhadro mūrdhni jaghānāśu vāmapādena līlayā
asibhiḥ pāvakaṃ bhadraḥ paṭṭiśaistu yamaṃ yamī

rudrāndṛḍhena śūlena mudgarairvaruṇaṃ dṛḍhaiḥ
parighairnirṛtiṃ vāyuṃ ṭaṃkaiṣṭaṃkadharaḥ svayam

nirbibheda raṇe vīro līlayaiva gaṇeśvaraḥ
sarvāndevagaṇānsadyo munīñchaṃbhorvirodhinaḥ

tato devaḥ sarasvatyā nāsikāgraṃ suśobhanam
ciccheda karajāgreṇa devamātustathaiva ca

ciccheda ca kuṭhāreṇa bāhudaṃḍaṃ vibhāvasoḥ
agrato dvyaṃgulāṃ jihvāṃ māturdevyā lulāva ca

svāhādevyāstathā devo dakṣiṇaṃ nāsikāpuṭam
cakarta karajāgreṇa vāmaṃ ca stanacūcukam

bhagasya vipule netre śatapatrasamaprabhe
prasahyotpāṭayāmāsa bhadraḥ paramavegavān

pūṣṇo daśanarekhāṃ ca dīptāṃ muktāvalīmiva
jaghāna dhanuṣaḥ koṭyā sa tenāspaṣṭavāgabhūt

tataścaṃdramasaṃ devaḥ pādāṃguṣṭhena līlayā
kṣaṇaṃ kṛmivadākramya gharṣayāmāsa bhūtale

śiraściccheda dakṣasya bhadraḥ paramakopataḥ
krośaṃtyāmeva vairiṇyāṃ bhadrakālyai dadau ca tat

tatprahṛṣṭā samādāya śirastālaphalopamam
sā devī kaṃḍukakrīḍāṃ cakāra samarāṃgaṇe

tato dakṣasya yajñastrī kuśīlā bhartṛbhiryathā
pādābhyāṃ caiva hastābhyāṃ hanyate sma gaṇeśvaraiḥ

ariṣṭanemine somaṃ dharmaṃ caiva prajāpatim
bahuputraṃ cāṃgirasaṃ kṛśāśvaṃ kaśyapaṃ tathā

gale pragṛhya balino gaṇapāḥ siṃhavikramāḥ
bhartsayaṃto bhṛśaṃ vāgbhirnirjaghnurmūrdhni muṣṭibhiḥ

dharṣitā bhūtavetālairdārāssutaparigrahāḥ
yathā kaliyuge jārairbalena kulayoṣitaḥ

tacca vidhvastakalaśaṃ bhagnayūpaṃ gatotsavam
pradīpitamahāśālaṃ prabhinnadvāratoraṇam

utpāṭitasurānīkaṃ hanyamānaṃ tapodhanam
praśāntabrahmanirghoṣaṃ prakṣīṇajanasaṃcayam

krandamānāturastrīkaṃ hatāśeṣaparicchadam
śūnyāraṇyanibhaṃ jajñe yajñavāṭaṃ tadārditam

śūlavegaprarugṇāśca bhinnabāhūruvakṣasaḥ
vinikṛttottamāṃgāśca petururvyāṃ surottamāḥ

hateṣu teṣu deveṣu patiteṣuḥ sahasraśaḥ
praviveśa gaṇeśānaḥ kṣaṇādāhavanīyakam

praviṣṭamatha taṃ dṛṣṭvā bhadraṃ kālāgnisaṃnibham
dudrāva maraṇādbhīto yajño mṛgavapurdharaḥ

sa visphārya mahaccāpaṃ dṛḍhajyāghoṣaṇabhīṣaṇam
525a
bhadrastamabhidudrāva vikṣipanneva sāyakān

ākarṇapūrṇamākṛṣṭaṃ dhanurambudasaṃnibham
nādayāmāsa ca jyāṃ dyāṃ khaṃ ca bhūmiṃ ca sarvaśaḥ

tamupaśritya sannādaṃ hato 'smītyeva vihvalam
śaraṇārdhena vakreṇa sa vīro 'dhvarapūruṣam

mahābhayaskhalatpādaṃ vepantaṃ vigatatviṣam
mṛgarūpeṇa dhāvantaṃ viśiraskaṃ tadākarot

tamīdṛśamavajñātaṃ dṛṣṭvā vai sūryasaṃbhavam
viṣṇuḥ paramasaṃkruddho yuddhāyābhavadudyataḥ

tamuvāha mahāvegātskandhena natasaṃdhinā
sarveṣāṃ vayasāṃ rājā garuḍaḥ pannagāśanaḥ

devāśca hataśiṣṭā ye devarājapurogamāḥ
pracakrustasya sāhāyyaṃ prāṇāṃstyaktumivodyatāḥ

viṣṇunā sahitāndevānmṛgendraḥ kroṣṭukāniva
dṛṣṭvā jahāsa bhūtendro mṛgendra iva vivyathaḥ