Śivapurāṇa, Books 1 and 7 · Chapter 7.1.15

iti śrīśivamahāpurāṇe saptamyāṃ vāyavīyasaṃhitāyāṃ pūrvakhaṇḍe rudrāvirbhāvavarṇanaṃ nāma caturdaśo 'dhyāyaḥ
Chapter 15
vāyuruvāca
yadā punaḥ prajāḥ sṛṣṭā na vyavardhanta vedhasaḥ
tadā maithunajāṃ sṛṣṭiṃ brahmā kartumamanyata

na nirgataṃ purā yasmānnārīṇāṃ kulamīśvarāt
tena maithunajāṃ sṛṣṭiṃ na śaśāka pitāmahaḥ

tatassa vidadhe buddhimarthaniścayagāminīm
prajānameva vṛddhyarthaṃ praṣṭavyaḥ parameśvara

prasādena vinā tasya na vardherannimāḥ prajāḥ
evaṃ saṃcintya viśvātmā tapaḥ kartuṃ pracakrame

tadādyā paramā śaktiranaṃtā lokabhāvinī
ādyā sūkṣmatarā śuddhā bhāvagamyā manoharā

nirguṇā niṣprapañcā ca niṣkalā nirupaplavā
niraṃtaratarā nityā nityamīśvarapārśvagā

tayā paramayā śaktyā bhagavaṃtaṃ triyambakam
saṃcintya hṛdaye brahmā tatāpa paramaṃ tapaḥ

tīvreṇa tapasā tasya yuktasya parameṣṭhinaḥ
acireṇaiva kālena pitā saṃpratutoṣa ha

tataḥ kenacidaṃśena mūrtimāviśya kāmapi
ardhanārīśvaro bhūtvā yayau devassvayaṃ haraḥ

taṃ dṛṣṭvā paramaṃ devaṃ tamasaḥ paramavyayam
advitīyamanirdeśyamadṛśyamakṛtātmabhiḥ

sarvalokavidhātāraṃ sarvalokeśvareśvaram
sarvalokavidhāyinyā śaktyā paramayā yutam

apratarkyamanābhāsamameyamajaraṃ dhruvam
acalaṃ nirguṇaṃ śāṃtamanaṃtamahimāspadam

sarvagaṃ sarvadaṃ sarvasadasadvyaktivarjitam
sarvopamānanirmuktaṃ śaraṇyaṃ śāśvataṃ śivam

praṇamya daṃḍavadbrahmā samutthāya kṛtāṃjaliḥ
śraddhāvinayasaṃpannaiḥ śrāvyaiḥ saṃskarasaṃyutaiḥ

yathārthayuktasarvārthairvedārthaparibṛṃhitaiḥ
tuṣṭāva devaṃ devīṃ ca sūktaiḥ sūkṣmārthagocaraiḥ

brahmovāca
jaya deva mahādeva jayeśvara maheśvara
jaya sarvaguṇa śreṣṭha jaya sarvasurādhipa

jaya prakṛti kalyāṇi jaya prakṛtināyike
jaya prakṛtidūre tvaṃ jaya prakṛtisundari

jayāmoghamahāmāya jayāmogha manoratha
jayāmoghamahālīla jayāmoghamahābala

jaya viśvajaganmātarjaya viśvajaganmaye
jaya viśvajagaddhātri jaya viśvajagatsakhi

jaya śāśvatikaiśvarye jaya śāśvatikālaya
jaya śāśvatikākāra jaya śāśvatikānuga

jayātmatrayanirmātri jayātmatrayapālini
517b
jayātmatrayasaṃhartri jayātmatrayanāyike

jayāvalokanāyattajagatkāraṇabṛṃhaṇa
jayopekṣākaṭākṣotthahutabhugbhuktabhautika

jaya devādyavijñeye svātmasūkṣmadṛśojjvale
jaya sthūlātmaśaktyeśejaya vyāptacarācare

jaya nāmaikavinyastaviśvatattvasamuccaya
jayāsuraśironiṣṭhaśreṣṭhānugakadaṃbaka

jayopāśritasaṃrakṣāsaṃvidhānapaṭīyasi
jayonmūlitasaṃsāraviṣavṛkṣāṃkurodgame

jaya prādeśikaiśvaryavīryaśauryavijṛṃbhaṇa
jaya viśvabahirbhūta nirastaparavaibhava

jaya praṇītapañcārthaprayogaparamāmṛta
jaya pañcārthavijñānasudhāstotrasvarūpiṇi

jayati ghorasaṃsāramahārogabhiṣagvara
jayānādimalājñānatamaḥpaṭalacaṃdrike

jaya tripurakālāgne jaya tripurabhairavi
jaya triguṇanirmukte jaya triguṇamardini

jaya prathamasarvajña jaya sarvaprabodhika
jaya pracuradivyāṃga jaya prārthitadāyini

kva deva te paraṃ dhāma kva ca tucchaṃ ca no vacaḥ
tathāpi bhagavan bhaktyā pralapaṃtaṃ kṣamasva mām

vijñāpyaivaṃvidhaiḥ sūktairviśvakarmā caturmukhaḥ
namaścakāra rudrāya radrāṇyai ca muhurmuhuḥ

idaṃ stotravaraṃ puṇyaṃ brahmaṇā samudīritam
ardhanārīśvaraṃ nāma śivayorharṣavardhanam

ya idaṃ kīrtayedbhaktyā yasya kasyāpi śikṣayā
sa tatphalamavāpnoti śivayoḥ prītikāraṇāt

sakalabhuvanabhūtabhāvanābhyāṃ jananavināśavihīnavigrahābhyām
naravarayuvatīvapurdharābhyāṃ satatamahaṃ praṇatosmi śaṃkarābhyām