Shiva Purana · Verses 7.9-2

munaya ūcuḥ
kathaṃ jagadidaṃ kṛtsnaṃ vidhāya ca nidhāya ca

ājñayā paramāṃ krīḍāṃ karoti parameśvaraḥ

kiṃ tatprathamasaṃbhūtaṃ kenedamakhilaṃ tatam

kenā vā punarevedaṃ grasyate pṛthukukṣiṇā

vāyuruvāca
śaktiḥ prathamasambhūtā śāṃtyatītapadottarā

tato māyā tato 'vyaktaṃ śivācchaktimataḥ prabhoḥ

śāntyatītapadaṃ śaktestataḥ śāntipadakramāt

tato vidyāpadaṃ tasmātpratiṣṭhāpadasaṃbhavaḥ

nivṛttipadamutpannaṃ pratiṣṭhāpadataḥ kramāt

evamuktā samāsena sṛṣṭirīśvaracoditā

ānulomyāttathaiteṣāṃ pratilomyena saṃhṛtiḥ

asmātpañcapadoddiṣṭātparassraṣṭā samiṣyate

kalābhiḥ pañcabhirvyāptaṃ tasmādviśvamidaṃ jagat

avyaktaṃ kāraṇaṃ yattadātmanā samanuṣṭhitam

mahadādiviśeṣāṃtaṃ sṛjatītyapi saṃmatam

kiṃ tu tatrāpi kartṛtvaṃ nāvyaktasya na cātmanaḥ

acetanatvātprakṛterajñatvātpuruṣasya ca

pradhānaparamāṇvādi yāvatkiñcidacetanam

tatkartṛkaṃ svayaṃ dṛṣṭaṃ buddhimatkāraṇaṃ vinā

jagacca kartṛsāpekṣaṃ kāryaṃ sāvayavaṃ yataḥ

tasmācchaktassvatantro yaḥ sarvaśaktiśca sarvavit

anādinidhanaścāyaṃ mahadaiśvaryasaṃyutaḥ

sa eva jagataḥ kartā mahādevo maheśvarāḥ

pātā hartā ca sarvasya tataḥ pṛthagananvayaḥ

pariṇāmaḥ pradhānasya pravṛttiḥ puruṣasya ca

sarvaṃ satyavratasyaiva śāsanena pravartate

itīyaṃ śāśvatī niṣṭhā satāṃ manasi vartate

na cainaṃ pakṣamāśritya vartate svalpacetanaḥ

yāvadādisamāraṃbho yāvadyaḥ pralayo mahān

tāvadapyeti sakalaṃ brahmaṇaḥ śāradāṃ śatam

paramityāyuṣo nāma brahmaṇo 'vyaktajanmanaḥ

tatparākhyaṃ tadardhaṃ ca parārdhamabhidhīyate

parārdhadvayakālāṃte pralaye samupasthite

avyaktamātmanaḥ kāryamādāyātmani tiṣṭhati

ātmanyavasthite 'vyakte vikāre pratisaṃhṛte

sādharmyeṇādhitiṣṭhete pradhānapuruṣāvubhau

tamaḥ sattvaguṇāvetau samatvena vyavasthitau

anudriktāvanantau tāvotaprotau parasparam

guṇasāmye tadā tasminnavibhāge tamodaye

śāṃtavātaikanīre ca na prājñāyata kiṃcana

aprajñāte jagatyasminneka eva maheśvaraḥ

upāsya rajanīṃ kṛtsnāṃ parāṃ māheśvarīṃ tataḥ

prabhātāyāṃ tu śarvaryāṃ pradhānapuruṣāvubhau

praviśya kṣobhayāmāsa māyāyogānmaheśvaraḥ

tataḥ punaraśeṣāṇāṃ bhūtānāṃ prabhavāpyayāt

avyaktādabhavatsṛṣṭirājñayā parameṣṭhinaḥ

viśvottarottaravicitramanorathasya yasyaikaśaktiśakale sakalassamāptaḥ

ātmānamadhvapatimadhvavido vadaṃti tasmai namaḥ sakalalokavilakṣaṇāya

iti śrīśivamahāpurāṇe saptamyāṃ vāyavīyasaṃhitāyāṃ pūrvabhāge sṛṣṭipālanapralayakartṛtvavarṇanaṃ nāma navamo'dhyāyaḥ