Scripture Library

Shiva Purana · Chapter 7.29

7.29.7.2,29.1

śrīkṛṣṇa uvāca
bhagavaṃstvanmukhādeva śrutaṃ śrutisamaṃ mayā

7.29.7.2,29.1

svāśritānāṃ śivaproktaṃ nityanaimittikaṃ tathā

7.29.7.2,29.2

idānīṃ śrotumicchāmi śivadharmādhikāriṇām

7.29.7.2,29.2

kāmyamapyasti cetkarma vaktumarhasi sāmpratam

7.29.7.2,29.3

upamanyuruvāca
astyaihikaphalaṃ kiñcidāmuṣmikaphalaṃ tathā

7.29.7.2,29.3

aihikāmuṣmikañcāpi tacca pañcavidhaṃ punaḥ

7.29.7.2,29.4

kiṃcitkriyāmayaṃ karma kiṃcitkarma tapo mayam

7.29.7.2,29.5

japadhyānamayaṃ kiṃcitkiṃcitsarvamayaṃ tathā

7.29.7.2,29.5

kriyāmayaṃ tathā bhinnaṃ homadānārcanakramāt

7.29.7.2,29.6

sarvaśaktimatāmeva nānyeṣāṃ saphalaṃ bhavet

7.29.7.2,29.6

śaktiścājñā madeśasya śivasya paramātmanaḥ

7.29.7.2,29.7

tasmātkāmyāni karmāṇi kuryādājñādharodvijaḥ

7.29.7.2,29.7

atha vakṣyāmi kāmyaṃ hi cehāmutra phalapradam

7.29.7.2,29.8

śaivairmāheśvaraiścaiva kāryamaṃtarbahiḥ kramāt

7.29.7.2,29.8

śivo maheśvaraśceti nātyaṃtamiha bhidyate

7.29.7.2,29.9

yathā tathā na bhidyaṃte śaivā māheśvarā api

7.29.7.2,29.9

śivāśritā hi te śaivā jñānayajñaratā narāḥ

7.29.7.2,29.10

māheśvarāssamākhyātā karmayajñaratā bhuvi

7.29.7.2,29.10

tasmādābhyantare kuryuḥ śaivā māheśvarā vahiḥ

7.29.7.2,29.11

na tu prayogo bhidyeta vakṣyamāṇasya karmaṇaḥ

7.29.7.2,29.11

parīkṣya bhūmiṃ vidhivadgaṃdhavarṇarasādibhiḥ

7.29.7.2,29.12

manobhilaṣite tatra vitānavitatāṃbare

7.29.7.2,29.12

supralipte mahīpṛṣṭhe darpaṇodarasaṃnibhe

7.29.7.2,29.13

prācīmutpādayetpūrvaṃ śāstradṛṣṭena vartmanā

7.29.7.2,29.13

ekahastaṃ dvihastaṃ vā maṇḍalaṃ parikalpayet

7.29.7.2,29.14

ālikhedvimalaṃ padmamaṣṭapatraṃ sakarṇikam

7.29.7.2,29.14

ratnahemādibhiścūrṇairyathāsaṃbhavasaṃbhṛtaiḥ

7.29.7.2,29.15

pañcāvaraṇasaṃyuktaṃ bahuśobhāsamanvitam

7.29.7.2,29.15

daleṣu siddhayaḥ kalpyāḥ kesareṣu saśaktikāḥ

7.29.7.2,29.16

rudrā vāmādayastvaṣṭau pūrvādidalataḥ kramāt

7.29.7.2,29.16

karṇikāyāṃ ca vairāgyaṃ bījeṣu nava śaktayaḥ

7.29.7.2,29.17

skande śivātmako dharmo nāle jñānaṃ śivāśrayam

7.29.7.2,29.17

karṇikopari cāgneyaṃ maṃḍalaṃ sauramaindavam

7.29.7.2,29.18

śivavidyātmatattvākhyaṃ tattvatrayamataḥ param

7.29.7.2,29.18

sarvāsanopari sukhaṃ vicitrakusumānvitam

7.29.7.2,29.19

pañcāvaraṇasaṃyuktaṃ pūjayedaṃbayā saha

7.29.7.2,29.19

śuddhasphaṭikasaṃkāśaṃ prasannaṃ śītaladyutim

7.29.7.2,29.20

vidyudvalayasaṃkāśajaṭāmukuṭabhūṣitam

7.29.7.2,29.20

śārdūlacarmavasanaṃ kiñcitsmitamukhāṃbujam

7.29.7.2,29.21

raktapadmadalaprakhyapādapāṇitalādharam

7.29.7.2,29.21

sarvalakṣaṇasaṃpannaṃ sarvābharaṇabhūṣitam

7.29.7.2,29.22

divyāyudhavarairyuktaṃ divyagaṃdhānulepanam

7.29.7.2,29.22

pañcavaktraṃ daśabhujaṃ candrakhaṇḍaśikhāmaṇim

7.29.7.2,29.23

asya pūrvamukhaṃ saumyaṃ bālārkasadṛśaprabham

7.29.7.2,29.23

trilocanāraviṃdāḍhyaṃ kṛtabāleṃduśekharam

7.29.7.2,29.24

dakṣiṇaṃ nīlajīmūtasamānaruciraprabham

7.29.7.2,29.24

bhrukuṭīkuṭilaṃ ghoraṃ raktavṛttekṣaṇatrayam

7.29.7.2,29.25

daṃṣṭrākarālaṃ durdharṣaṃ sphuritādharapallavam

7.29.7.2,29.25

uttaraṃ vidrumaprakhyaṃ nīlālakavibhūṣitam

7.29.7.2,29.26

savilāsaṃ trinayanaṃ candrābharaṇaśekharam

7.29.7.2,29.26

paścimaṃ pūrṇacandrābhaṃ locanatritayojjvalam

7.29.7.2,29.27

candrarekhādharaṃ saumyaṃ maṃdasmitamanoharam

7.29.7.2,29.27

pañcamaṃ sphaṭikaprakhyamiṃdurekhāsamujjvalam

7.29.7.2,29.28

atīva saumyamutphullalocanatritayojjvalam

7.29.7.2,29.28

dakṣiṇe śūlaparaśuvajrakhaḍgānalojjvalam

7.29.7.2,29.29

savye ca nāganārācaghaṇṭāpāśāṃkuśojjvalam

7.29.7.2,29.29

nivṛttyājānusaṃbaddhamānābheśca pratiṣṭhayā

7.29.7.2,29.30

ākaṃṭhaṃ vidyayā tadvadālalāṭaṃ tu śāṃtayā

7.29.7.2,29.30

tadūrdhvaṃ śāṃtyatītākhyakalayā parayā tathā

7.29.7.2,29.31

pañcādhvavyāpinaṃ sākṣātkalāpañcakavigraham

7.29.7.2,29.31

īśānamukuṭaṃ devaṃ puruṣākhyaṃ purātanam

7.29.7.2,29.32

aghorahṛdayaṃ tadvadvāmaguhyaṃ maheśvaram

7.29.7.2,29.32

sadyapādaṃ ca tanmūrtimaṣṭatriṃśatkalāmayam

7.29.7.2,29.33

mātṛkāmayamīśānaṃ pañcabrahmamayaṃ tathā

7.29.7.2,29.33

oṃkārākhyamayaṃ caiva haṃsaśaktyā samanvitam

7.29.7.2,29.34

tathecchātmikayā śaktyā samārūḍhāṃkamaṃḍalam

7.29.7.2,29.34

jñānākhyayā dakṣiṇato vāmataśca kriyākhyayā

7.29.7.2,29.35

tattvatrayamayaṃ sākṣādvidyāmūrtiṃ sadāśivam

7.29.7.2,29.35

mūrtimūlena saṃkalpya sakalīkṛtya ca kramāt

7.29.7.2,29.36

saṃpūjya ca yathānyāyamarghāntaṃ mūlavidyayā

7.29.7.2,29.36

mūrtimantaṃ śivaṃ sākṣācchaktyā paramayā saha

7.29.7.2,29.37

tatrāvāhya mahādevaṃ sadasadvyaktivarjitam

7.29.7.2,29.37

pañcopakaraṇaṃ kṛtvā pūjayetparameśvaram

7.29.7.2,29.38

brahmabhiśca ṣaḍaṅgaiśca tato mātṛkayā saha

7.29.7.2,29.38

praṇavena śivenaiva śaktiyuktena ca kramāt

7.29.7.2,29.39

śāṃtena vā tathānyaiśca vedamantraiśca kṛtsnaśaḥ

7.29.7.2,29.39

pūjayetparamaṃ devaṃ kevalena śivena vā

7.29.7.2,29.40

pādyādimukhavāsāṃtaṃ kṛtvā prasthāpanaṃ vinā

7.29.7.2,29.40

pañcāvaraṇapūjāṃ tu hyārabheta yathākramam

iti śrīśivamahāpurāṇe saptamyāṃ vāyavīyasaṃhitāyāmuttarakhaṇḍe kāmyakarmavarṇanaṃ nāmaikonatriṃśattamo'dhyāyaḥ

Original text: śivapurāṇam · Sanskrit Wikisource contributors · Sanskrit Wikisource · CC BY-SA 4.0