Shiva Purana · Chapter 7.17

upamanyuruvāca
ataḥ paraṃ samāvekṣya guruḥ śiṣyasya yogyatām

ṣaḍadhvaśuddhiṃ kurvīta sarvabaṃdhavimuktaye

kalāṃ tattvaṃ ca bhuvanaṃ varṇaṃ padamataḥ param

maṃtraśceti samāsena ṣaḍadhvā paripaṭhyate

nivṛttyādyāḥ kalāḥ pañca kalādhvā kathyate budhaiḥ

vyāptāḥ kalābhiritare tvadhvānaḥ pañca pañcabhiḥ

śivatattvādibhūmyaṃtaṃ tattvādhvā samudāhṛtaḥ

ṣaḍviṃśatsaṃkhyayopetaḥ śuddhāśuddhobhayātmakaḥ

ādhārādyunmanāṃtaśca bhuvanādhvā prakīrtitaḥ

vinā bhedopabhedābhyāṃ ṣaṣṭisaṃkhyāsamanvitaḥ

pañcāśadrudrarūpāstu varṇā varṇādhvasaṃjñitāḥ

anekabhedasaṃpannaḥ padādhvā samudāhṛtaḥ

sarvopamaṃtrairmaṃtrādhvā vyāptaḥ paramavidyayā

yathā śivo na tattveṣu gaṇyate tattvanāyakaḥ

maṃtrādhvani na gaṇyeta tathāsau maṃtranāyakaḥ

kalādhvano vyāpakatvaṃ vyāpyatvaṃ cetarādhvanām

na vetti tattvato yasya naivārhatyadhvaśodhanam

ṣaḍvidhasyādhvano rūpaṃ na yena viditaṃ bhavet

vyāpyavyāpakatā tena jñātumeva na śakyate

tasmādadhvasvarūpaṃ ca vyāpyavyāpakatāṃ tathā

yathāvadavagamyaiva kuryādadhvaviśodhanam

kuṃḍamaṃḍalaparyaṃtaṃ tatra kṛtvā yathā purā

dvihastamānaṃ kurvīta prācyāṃ kalaśamaṃḍalam

tataḥ snātaśśivācāryaḥ saśiṣyaḥ kṛtanaityakaḥ

praviśya maṃḍalaṃ śaṃbhoḥ pūjāṃ pūrvavadācaret

tatrāḍhakāvaraissiddhaṃ taṃdulaiḥ pāyasaṃ prabhoḥ

ardhaṃ nivedya homārthaṃ śeṣaṃ samupakalpayet

purataḥ kalpite vātha maṃḍale varṇimaṃḍite

sthāpayetpañcakalaśāndikṣu madhye ca deśikaḥ

teṣu brahmāṇi mūlārṇairbindunādasamanvitaiḥ

nama ādyairyakarāṃtaiḥ kalpayetkalpavittamaḥ

īśānaṃ madhyame kuṃbhe puruṣaṃ purataḥ sthite

aghoraṃ dakṣiṇe vāme vāmaṃ sadyaṃ ca paścime

rakṣāṃ vidhāya mudrā ca baddhvā kuṃbhābhimaṃtraṇam

kṛtvā śivānalairhomaṃ prārabhetyathā purā

yadardhaṃ pāyasaṃ pūrvaṃ homārthaṃ parikalpitam

hutvā śiṣyasya taccheṣaṃ bhoktuṃ samupakalpayet

tarpaṇāṃtaṃ ca maṃtrāṇāṃ kṛtvā karma yathā purā

hutvā pūrṇāhutiṃ teṣāṃ tataḥ kuryātpradīpanam

oṃkārādanu huṃkāraṃ tato mūlaṃ phaḍaṃtakam

svāhāṃtaṃ dīpane prāhuraṃgāni ca yathākramam

teṣāmāhutayastisro deyā dīpanakarmaṇi

maṃtrairekaikaśastaistu vicintyā dīptamūrtayaḥ

triguṇaṃ triguṇī kṛtya dvijakanyākṛtaṃ sitam

sūtraṃ sūtreṇa saṃmaṃtrya śikhāgre baṃdhayecchiśoḥ

caraṇāṃguṣṭhaparyaṃtamūrdhvakāyasya tiṣṭhataḥ

laṃbayitvā tu tatsūtraṃ suṣumṇāṃ tatra yojayet

śāṃtayā mudrayādāya mūlamaṃtreṇa maṃtravit

hutvāhutitrayaṃ tasyāssānnidhyamupakalpayet

hṛdi saṃtāḍya śiṣyasya puṣpakṣepeṇa pūrvavat

caitanyaṃ samupādāya dvādaśāṃte nivedya ca

sūtraṃ sūtreṇa saṃyojya saṃrakṣyāstreṇa varmaṇā

avaguṃṭhyātha tatsūtraṃ śiṣyadehaṃ viciṃtayet

mūlatrayamayaṃ pāśaṃ bhogabhogyatvalakṣaṇam

viṣayendriyadehādijanakaṃ tasya bhāvayet

vyomādibhūtarūpiṇyaḥ śāṃtyatītādayaḥ kalāḥ

sūtre svanāmabhiryojyaḥ pūjyaścaiva namoyutaiḥ

athavā bījabhūtaistatkṛtvā pūrvoditaṃ kramāt

tato malādestattvādau vyāptiṃ samalokayet

kalāvyāptiṃ malādau ca hutvā saṃdīpayetkalāḥ

śiṣyaṃ śirasi saṃtāḍya sūtraṃ dehe yathākramam

śāṃtyatītapade sūtraṃ lāñchayenmaṃtramuccaran

evaṃ kṛtvā nivṛttyantaṃ śāṃtyatītamanukramāt

hutvāhutitrayaṃ paścānmaṇḍale ca śivaṃ yajet

devasya dakṣiṇe śiṣyamupaveśyottarāmukham

sadarbhe maṇḍale dadyāddhomaśiṣṭaṃ caruṃ guruḥ

śiṣyastadguruṇā dattaṃ satkṛtya śivapūrvakam

bhuktvā paścāddvirācamya śivamantramudīrayet

apare maṇḍale dadyātpañcagavyaṃ tathā guruḥ

so 'pi tacchaktitaḥ pītvā dvirācamya śivaṃ smaret

tṛtīye maṇḍale śiṣyamupaveśya yathā purā

pradadyāddaṃtapavanaṃ yathāśāstroktalakṣaṇam

agreṇa tasya mṛdunā prāṅmukho vāpyudaṅmukhaḥ

vācaṃ niyamya cāsīnaśśiṣyo daṃtānviśodhayet

prakṣālya daṃtapavanaṃ tyaktvācamya śivaṃ smaret

praviśeddeśikādiṣṭaḥ prāṃjaliḥ śivamaṇḍalam

tyaktaṃ taddantapavanaṃ dṛśyate guruṇā yadi

prāgudakpaścime vāgre śivamanyacchivetaram

aśastāśāmukhe tasmingurustaddoṣaśāṃtaye

śatamardhaṃ tadardhaṃ vājuhuyānmūlamantrataḥ

tataḥ śiṣyaṃ samālabhya japitvā karṇayoḥ śivam

devasya dakṣiṇe bhāge taṃ śiṣyamadhivāsayet

ahatāstaraṇāstīrṇe sa darbhaśayane śuciḥ

maṃtrite 'ntaḥ śivaṃ dhyāyañśayīta prākchirā niśi

śikhāyāṃ baddhasūtrasya śikhayā tacchikhāṃ guruḥ

ābadhyāhatavastreṇa tamācchādya ca varmaṇā

rekhātrayaṃ ca parito bhasmanā tilasarṣapaiḥ

kṛtvāstrajaptaistadvāhye digīśānāṃ baliṃ haret

śiṣyo 'pi parato 'naśnankṛtvaivamadhivāsanam

prabudhyotthāya gurave svapnaṃ dṛṣṭaṃ nivedayet

iti śrīśivamahāpurāṇe saptamyāṃ vāyavīyasaṃhitāyāmuttarakhaṇḍe śivadīkṣāvidhānavarṇanaṃ nāma saptadaśo 'dhyāyaḥ