Shiva Purana · Chapter 7.16

upamanyuruvāca
puṇye 'hani śucau deśe bahudoṣavivarjite //
deśikaḥ prathamaṃ kuryātsaṃskāraṃ samayāhvayam

parīkṣya bhūmiṃ vidhivadgaṃdhavarṇarasādibhiḥ //
śilpiśāstroktamārgeṇa maṇḍapaṃ tatra kalpayet

kṛtvā vediṃ ca tanmadhye kuṇḍāni parikalpayet //
aṣṭadikṣu tathā dikṣu tatraiśānyāṃ punaḥ kramāt

pradhānakuṃḍaṃ kurvīta yadvā paścimabhāgataḥ //
pradhānamekamevātha kṛtvā śobhāṃ prakalpayet

vitānadhvajamālābhirvividhābhiranekaśaḥ //
vedimadhye tataḥ kuryānmaṃḍalaṃ śubhalakṣaṇam

raktahemādibhiścūrṇairīśvarāvāhanocitam //
siṃdūraśālinīvāracūrṇairevātha nirdhanaḥ

ekahastaṃ dvihastaṃ vā sitaṃ vā raktameva vā //
ekahastasya padmasya karṇikāṣṭāṃgulā matā

kesarāṇi tadardhāni śeṣaṃ cāṣṭadalādikam //
dvihastasya tu padmasya dviguṇaṃ karṇikādikam

kṛtvā śobhopaśobhāḍhyamaiśānyāṃ tasya kalpayet //
ekahastaṃ tadardhaṃ vā punarvedyaḥ tu maṃḍalam

vrīhitaṃdulasiddhārthatilapuṣpakuśāstṛte //
tatra lakṣaṇasaṃyuktaṃ śivakuṃbhaṃ prasādhayet

sauvarṇaṃ rājataṃ vāpi tāmrajaṃ mṛnmayaṃ tu vā //
gandhapuṣpākṣatākīrṇaṃ kuśadūrvāṃkurācitam

sitasūtrāvṛtaṃ kaṃṭhe navavastrayugāvṛtam //
śuddhāmbupūrṇamutkūrcaṃ sadravyaṃ sapidhānakam

bhṛṅgāraṃ vardhanīṃ cāpi śaṃkhaṃ ca cakrameva vā //
vinā sūtrādikaṃ sarvaṃ padmapatramathāpi vā

tasyāsanāraviṃdasya kalpayeduttare dale //
agrataścaṃdanāṃbhobhirastrarājasya vardhanīm

maṇḍalasya tataḥ prācyāṃ maṃtrakuṃbhe ca pūrvavat //
kṛtvā vidhivadīśasya mahāpūjāṃ samācaret

athārṇavasya tīre vā nadyāṃ goṣṭhe 'pi vā girau //
devāgare gṛhe vāpi deśe 'nyasminmanohare

kṛtvā pūrvoditaṃ sarvaṃ vinā vā maṃḍapādikam //
maṃḍalaṃ pūrvavatkṛtvā sthaṃḍilaṃ ca vibhāvasoḥ

praviśya pūjābhavanaṃ prahṛṣṭavadano guruḥ //
sarvamaṃgalasaṃyuktaḥ samācaritanaityakaḥ

mahāpūjāṃ maheśasya kṛtvā maṇḍalamadhyataḥ //
śivakuṃbhe tathā bhūyaḥ śivamāvāhya pūjayet

paścimābhimukhaṃ dhyātvā yajñarakṣakamīśvaram //
arcayedastravardhanyāmastramīśasya dakṣiṇe

mantrakumbhe ca vinyasya mantraṃ mantraviśāradaḥ //
kṛtvā mudrādikaṃ sarvaṃ mantrayāgaṃ samācaret

tataśśivānale homaṃ kuryāddeśikasattamaḥ //
pradhānakuṇḍe parito juhuyuścāpare dvijāḥ

ācāryātpādamardhaṃ vā homasteṣāṃ vidhīyate //
pradhānakuṇḍa evātha juhuyāddeśikottamaḥ

svādhyāyamapare kuryuḥ stotraṃ maṃgalavācanam //
japaṃ ca vidhivaccānye śivabhaktiparāyaṇāḥ

nṛtyaṃ gītaṃ ca vādyaṃ ca maṃgalānyaparāṇi ca //
pūjanaṃ ca sadasyānāṃ kṛtvā samyagvidhānataḥ

puṇyāhaṃ kārayitvātha punaḥ saṃpūjya śaṃkaram //
prārthayeddeśiko devaṃ śiṣyānugrahakāmyayā

prasīda devadeveśa dehamāviśya māmakam //
vimocayainaṃ viśveśa ghṛṇayā ca ghṛṇānidhe

atha caivaṃ karomīti labdhānujñastu deśikaḥ //
ānīyopoṣitaṃ śiṣyaṃ haviṣyāśinameva vā

ekāśanaṃ vā virataṃ snātaṃ prātaḥkṛtakriyam //
japaṃtaṃ praṇavaṃ devaṃ dhyāyaṃtaṃ kṛtamaṃgalam

dvārasya paścimasyāgramaṇḍale dakṣiṇasya vā //
darbhāsane samāsīnaṃ vidhāyodaṅmukhaṃ śiśum

svayaṃ prāgvadanastiṣṭhannūrdhvakāyaṃ kṛtāṃjalim //
saṃprokṣya prokṣaṇautoyairmūrdhanyastreṇa mudrayā

puṣpakṣepeṇa saṃtāḍya badhnīyāllocanaṃ guruḥ //
dukūlārdhena vastreṇa maṃtritena navena ca

tataḥ praveśayecchiṣyaṃ gururdvāreṇa maṃḍalam //
so 'pi teneritaḥ śaṃbhorācarettriḥ pradakṣiṇam

tatassuvarṇasaṃmiśraṃ dattvā puṣpāṃjaliṃ prabhoḥ //
prāṅmukhaścodaṅmukho vā praṇameddaṃḍavatkṣito

tatassaṃprokṣya mūlena śirasyastreṇa pūrvavat //
saṃtāḍya deśikastasya mocayennetrabaṃdhanam

sa dṛṣṭvā maṃḍalaṃ bhūyaḥ praṇametsāñjaliḥ prabhum //
athāsīnaṃ śivācāryo maṃḍalasya tu dakṣiṇe

upaveśyātmanassavye śiṣyaṃ darbhāsane guruḥ //
ārādhya ca mahādevaṃ śivahastaṃ pravinyaset

śivatejomayaṃ pāṇiṃ śivamaṃtramudīrayet //
śivābhimānasaṃpanno nyasecchiṣyasya mastake

sarvāṃgālaṃbanaṃ caiva kuryāttenaiva deśikaḥ //
śiṣyo 'pi praṇamedbhūmau deśikākṛtamīśvaram

tataśśivānale devaṃ samabhyarcya yathāvidhi //
hutāhutitrayaṃ śiṣyamupaveśya yathā purā

darbhāgraiḥ saṃspṛśaṃstaṃ ca vidyayātmānamāviśet //
namaskṛtya mahādevaṃ nāḍīsaṃdhānamācaret

śivaśāstroktamārgeṇa kṛtvā prāṇasya nirgamam //
śiṣyadehapraveśaṃ ca smṛtvā maṃtrāṃstu tarpayet

saṃtarpaṇāya mūlasya tenaivāhutayo daśa //
deyāstisrastathāṃgānāmaṃgaireva yathākramam

tataḥ pūrṇāhutiṃ dattvā prāyaścittāya deśikaḥ //
punardaśāhutīnkuryānmūlamaṃtreṇa maṃtravit

punaḥ saṃpūjya deveśaṃ samyagācamya deśikaḥ //
hutvā caiva yathānyāyaṃ svajātyā vaiśyamuddharet

tasyaivaṃ janayetkṣātramuddhāraṃ ca tataḥ punaḥ //
kṛtvā tathaiva vipratvaṃ janayedasya deśikaḥ

rājanyaṃ caivamuddhṛtya kṛtvā vipraṃ punastayoḥ //
rudratvaṃ janayedvipre rudranāmaiva sādhayet

prokṣaṇaṃ tāḍanaṃ kṛtvā śiśossvātmānamātmani //
śivātmakamanusmṛtya sphuraṃtaṃ visphuliṃgavat

nāḍyā yathoktayā vāyuṃ recayenmaṃtrato guruḥ //
nirgamya praviśennāḍyā śiṣyasya hṛdayaṃ tathā

praviśya tasya caitanyaṃ nīlabindunibhaṃ smaran //
svatejasāpāstamalaṃ jvalaṃtamanuciṃtayet

tamādāya tayā nāḍyā maṃtrī saṃhāramudrayā //
na pūrakeṇa niveśyainamekībhāvārthamātmanaḥ

kuṃbhakena tathā nāḍyā recakena yathā purā //
tasmādādāya śiṣyasya hṛdaye tanniveśayet

tamālabhya śivāllabdhaṃ tasmai dattvopavītakam //
hutvā"hutitrayaṃ paścāddadyātpūrṇāhutiṃ tataḥ

devasya dakṣiṇe śiṣyamupaveśyavarāsane //
kuśapuṣpaparistīrṇe baddhāṃjalirudaṅmukham

svastikāsanamārūḍhaṃ vidhāya prāṅmukhaḥ svayam //
varāsanasthito maṃtrairmahāmaṃgalaniḥsvanaiḥ

samādāya ghaṭaṃ pūrṇaṃ pūrṇameva prasāditam //
dhyāyamānaḥ śivaṃ śiṣyamābhiṣiṃceta deśikaḥ

athāpanudya snānāṃbu paridhāya sitāṃbaram //
ācāntolaṃkṛtaśśiṣyaḥ prāṃjalirmaṃḍapaṃ vrajet

upaveśya yathāpūrvaṃ taṃ gururdarbhaviṣṭare //
saṃpūjya maṃḍalaṃ devaṃ karanyāsaṃ samācaret

tatastu bhasmanā devaṃ dhyāyanmanasi deśikaḥ //
samālabheta pāṇibhyāṃ śiśuṃ śivamudīrayet

atha tasya śivācāryo dahanaplāvanādikam //
sakalīkaraṇaṃ kṛtvā mātṛkānyāsavartmanā

tataḥ śivāsanaṃ dhyātvā śiṣyamūrdhni deśikaḥ //
tatrāvāhya yathānyāyamarcayenmanasā śivam

prārthayetprāṃjalirdevaṃ nityamatra sthito bhava //
iti vijñāpya taṃ śaṃbhostejasā bhāsuraṃ smaret

saṃpūjyātha śivaṃ śaivīmājñāṃ prāpya śivātmikām //
karṇe śiṣyasya śanakaiśśivamantramudīrayet

sa tu baddhāṃjaliḥ śrutvā mantraṃ tadgatamānasaḥ //
śanaistaṃ vyāharecchiṣyaśivācāryasya śāsanāt

tataḥ śāktaṃ ca saṃdiśya mantraṃ mantravicakṣaṇaḥ //
uccārayitvā ca sukhaṃ tasmai maṃgalamādiśet

tatassamāsānmantrārthaṃ vācyavācakayogataḥ //
samadiśyeśvaraṃ rūpaṃ yogamāsanamādiśet

atha gurvājñayā śiṣyaḥ śivāgnigurusannidhau //
bhaktyaivamabhisaṃdhāya dīkṣāvākyamudīrayet

varaṃ prāṇaparityāgaśchedanaṃ śiraso 'pi vā //
na tvanabhyarcya bhuṃjīya bhagavantaṃ trilocanam

sa eva dadyānniyato yāvanmohaviparyayaḥ //
tāvadārādhayeddevaṃ tanniṣṭhastatparāyaṇaḥ

tataḥ sa samayo nāma bhaviṣyati śivāśrame //
labdhādhikāro gurvājñāpālakastadvaśo bhavet

ataḥ paraṃ nyastakaro bhasmādāya svahastataḥ //
dadyācchiṣyāya mūlena rudrākṣaṃ cābhimaṃtritam

pratimā vāpi devasya gūḍhadehamathāpi vā //
pūjāhomajapadhyānasādhanāni ca saṃbhave

sopi śiṣyaḥ śivācāryāllabdhāni bahumānataḥ //
ādadītājñayā tasya deśikasya na cānyathā

ācāryādāptamakhilaṃ śirasyādhāya bhaktitaḥ //
rakṣayetpūjayecchaṃbhuṃ maṭhe vā gṛha evavā

ataḥ paraṃ śivācāramādiśedasya deśikaḥ //
bhaktiśraddhānusāreṇa prajñāyāścānusārataḥ

yaduktaṃ yatsamājñātaṃ yaccaivānyatprakīrtitam //
śivācāryeṇa samaye tatsarvaṃ śirasā vahet

śivāgamasya grahaṇaṃ vācanaṃ śravaṇaṃ tathā //
deśikadeśataḥ kuryānna svecchāto na cānyataḥ

iti saṃkṣepataḥ proktaḥ saṃskāraḥ samayāhvayaḥ //
sākṣācchivapuraprāptau nṛṇāṃ paramasādhanam

iti śrīśivamahāpurāṇe saptamyāṃ vāyavīyasaṃhitāyāmuttarakhaṃḍe śiṣyasaṃskāravarṇanaṃ nāma ṣoḍaśo'dhyāyaḥ