Scripture Library

Shiva Purana · Verses 7.13-2

7.13-2.7.1,13.1

ṛṣaya ūcuḥ
bhavatā kathitā sṛṣṭirbhavasya paramātmanaḥ

7.13-2.7.1,13.1

caturmukhamukhāttasya saṃśayo naḥ prajāyate

7.13-2.7.1,13.2

devaśreṣṭho virūpākṣo dīptaśśūladharo haraḥ

7.13-2.7.1,13.2

kālātmā bhagavān rudraḥ kapardī nīlalohitaḥ

7.13-2.7.1,13.3

sabrahmakamimaṃ lokaṃ saviṣṇumapi pāvakam

7.13-2.7.1,13.3

yaḥ saṃharati saṃkruddho yugāṃte samupasthite

7.13-2.7.1,13.4

yasya brahmā ca viṣṇuśca praṇāmaṃ kuruto bhayāt

7.13-2.7.1,13.4

lokasaṃkocakasyāsya yasya tau vaśavartinau

7.13-2.7.1,13.5

yo 'yaṃ devaḥ svakādaṃgādbrahmaviṣṇū purāsṛjat

7.13-2.7.1,13.5

sa eva hi tayornityaṃ yogakṣemakaraḥ prabhuḥ

7.13-2.7.1,13.6

sa kathaṃ bhagavān rudra ādidevaḥ purātanaḥ

7.13-2.7.1,13.6

putratvamagamacchaṃbhurbrahmaṇo 'vyaktajanmanaḥ

7.13-2.7.1,13.7

prajāpatiśca viṣṇuśca rudrasyaitau parasparam

7.13-2.7.1,13.7

sṛṣṭau parasparasyāṃgāditi prāgapi śuśruma

7.13-2.7.1,13.8

kathaṃ punaraśeṣāṇāṃ bhūtānāṃ hetubhūtayoḥ

7.13-2.7.1,13.8

guṇapradhānabhāvena prādurbhāvaḥ parasparāt

7.13-2.7.1,13.9

nāpṛṣṭaṃ bhavatā kiṃcinnāśrutaṃ ca kathaṃcana

7.13-2.7.1,13.9

bhagavacchiṣyabhūtena bhavatā sakalaṃ smṛtam

7.13-2.7.1,13.10

tattvaṃ vada yathā brahmā munīnāmavadadvibhuḥ

7.13-2.7.1,13.10

vayaṃ śraddhālavastāta śrotumīśvarasadyaśaḥ

7.13-2.7.1,13.11

vāyuruvāca
sthāne pṛṣṭamidaṃ viprā bhavadbhiḥ praśnakovidaiḥ

7.13-2.7.1,13.11

idameva purā pṛṣṭo mama prāha pitāmahaḥ

7.13-2.7.1,13.12

tadahaṃ sampravakṣyāmi yathā rudrasamudbhavaḥ

7.13-2.7.1,13.12

yathā ca punarutpattirbrahmaviṣṇvoḥ parasparam

7.13-2.7.1,13.13

trayaste kāraṇātmāno jatāssākṣānmaheśvarāt

7.13-2.7.1,13.13

carācarasya viśvasya sargasthityaṃtahetavaḥ

7.13-2.7.1,13.14

paramaiśvaryasaṃyuktāḥ parameśvarabhāvitāḥ

7.13-2.7.1,13.14

tacchaktyādhiṣṭhitā nityaṃ tatkāryakaraṇakṣamāḥ

7.13-2.7.1,13.15

pitrā niyamitāḥ pūrvaṃ trayopi triṣu karmasu

7.13-2.7.1,13.15

brahmā sarge haristrāṇe rudraḥ saṃharaṇe tathā

7.13-2.7.1,13.16

tathāpyanyonyamātsaryādanyonyātiśayāśinaḥ

7.13-2.7.1,13.16

tapasā toṣayitvā svaṃ pitaraṃ parameśvaram

7.13-2.7.1,13.17

labdhvā sarvātmanā tasya prasādātparameṣṭhinaḥ

7.13-2.7.1,13.17

brahmanārāyaṇau pūrvaṃ rudraḥ kalpāntare 'sṛjat

7.13-2.7.1,13.18

kalpāntare punarbrahmā rudraviṣṇū jaganmayaḥ

7.13-2.7.1,13.18

viṣṇuśca bhagavānrudraṃ brahmāṇamasṛjatpunaḥ

7.13-2.7.1,13.19

nārāyaṇaṃ punarbrahmā brahmāṇamasṛjatpunaḥ

7.13-2.7.1,13.19

evaṃ kalpeṣu kalpeṣu brahmaviṣṇumaheśvarāḥ

7.13-2.7.1,13.20

paraspareṇa jāyaṃte parasparahitaiṣiṇaḥ

7.13-2.7.1,13.20

tattatkalpāntavṛttāntamadhikṛtya maharṣibhiḥ

7.13-2.7.1,13.21

prabhāvaḥ kathyate teṣāṃ parasparasamudbhavāt

7.13-2.7.1,13.21

śṛṇu teṣāṃ kathāṃ citrāṃ puṇyāṃ pāpapramocinīm

7.13-2.7.1,13.22

kalpe tatpuruṣe vṛttāṃ brahmaṇaḥ parameṣṭhinaḥ

7.13-2.7.1,13.22

purā nārāyaṇo nāma kalpe vai meghavāhane

7.13-2.7.1,13.23

divyaṃ varṣasahasraṃ tu megho bhūtvāvahaddharām

7.13-2.7.1,13.23

tasya bhāvaṃ samālakṣya viṣṇorviśvajagadguruḥ

7.13-2.7.1,13.24

sarvassarvātmabhāvena pradadau śaktimavyayām

7.13-2.7.1,13.24

śaktiṃ labdhvā tu sarvātmā śivātsarveśvarāttadā

7.13-2.7.1,13.25

sasarja bhagāvan viṣṇurviśvaṃ viśvasṛjā saha

7.13-2.7.1,13.25

viṣṇostadvaibhavaṃ dṛṣṭvā sṛṣṭastena pitāmahaḥ

7.13-2.7.1,13.26

īrṣyayā parayā grastaḥ prahasannidamabravīt

7.13-2.7.1,13.26

gaccha viṣṇo mayā jñātaṃ tava sargasya kāraṇam

7.13-2.7.1,13.26

āvayoradhikaścāsti sa rudro nātra saṃśayaḥ

7.13-2.7.1,13.27

tasya devādhidevasya prasādātparameṣṭhinaḥ

7.13-2.7.1,13.27

sraṣṭā tvaṃ bhagavānādyaḥ pālakaḥ paramārthataḥ

7.13-2.7.1,13.28

ahaṃ ca tapasārādhya rudraṃ tridaśanāyakam

7.13-2.7.1,13.28

tvayā saha jagatsarvaṃ srakṣyāmyatra na saṃśayaḥ

7.13-2.7.1,13.29

evaṃ viṣṇumupālabhya bhagavānabjasambhavaḥ

7.13-2.7.1,13.29

evaṃ vijñāpayāmāsa tapasā prāpya śaṃkaram

7.13-2.7.1,13.30

bhagavan devadeveśa viśveśvara maheśvara

7.13-2.7.1,13.30

tava vāmāṃgajo viṣṇurdakṣiṇāṃgabhavo hyaham

7.13-2.7.1,13.31

mayā saha jagatsarvaṃ tathāpyasṛjadacyutaḥ

7.13-2.7.1,13.31

sa matsarādupālabdhastvadāśrayabalānmayā

7.13-2.7.1,13.32

madbhāvānnādhikasteti bhāvastvayi maheśvare

7.13-2.7.1,13.32

tvatta eva samutpattirāvayossadṛśī yataḥ

7.13-2.7.1,13.33

tasya bhaktyā yathāpūrvaṃ prasādaṃ kṛtavānasi

7.13-2.7.1,13.33

tathā mamāpi tatsarvaṃ dātumarhasi śaṃkara

7.13-2.7.1,13.34

iti vijñāpitastena bhagavān bhaganetrahā

7.13-2.7.1,13.34

nyāyena vai dadau sarvaṃ tasyāpi sa ghṛṇānidhiḥ

7.13-2.7.1,13.35

labdhvaivamīśvarādeva brahmā sarvātmatāṃ kṣaṇāt

7.13-2.7.1,13.35

tvaramāṇotha saṃgamya dadarśa puruṣottamam

7.13-2.7.1,13.36

kṣīrārṇavālaye śubhre vimāne sūryasaṃnibhe

7.13-2.7.1,13.36

hemaratnānvite divye manasā tena nirmite

7.13-2.7.1,13.37

anaṃtabhogaśayyāyāṃ śayānaṃ paṃkajekṣaṇam

7.13-2.7.1,13.37

caturbhujamudārāṃgaṃ sarvābharaṇabhūṣitam

7.13-2.7.1,13.38

śaṃkhacakradharaṃ saumyaṃ candrabiṃbasamānanam

7.13-2.7.1,13.38

śrīvatsavakṣasaṃ devaṃ prasannamadhurasmitam

7.13-2.7.1,13.39

dharāmṛdukarāṃbhojasparśaraktapadāṃbujam

7.13-2.7.1,13.39

kṣīrārṇavāmṛtamiva śayānaṃ yoganidrayā

7.13-2.7.1,13.40

tamasā kālarudrākhyaṃ rajasā kanakāṃḍajam

7.13-2.7.1,13.40

sattvena sarvagaṃ viṣṇuṃ nirguṇatve maheśvaram

7.13-2.7.1,13.41

taṃ dṛṣṭvā puruṣaṃ brahmā pragalbhamidamabravīt

7.13-2.7.1,13.41

grasāmi tvāmahaṃ viṣṇo tvamātmānaṃ yathā purā

7.13-2.7.1,13.42

tasya tadvacanaṃ śrutvā pratibuddhya pitāmaham

7.13-2.7.1,13.42

udaikṣata mahābāhussmitamīṣaccakāra ca

7.13-2.7.1,13.43

tasminnavasare viṣṇurgrastastena mahātmanā

7.13-2.7.1,13.43

sṛṣṭaśca brahmaṇā sadyo bhruvormadhyādayatnataḥ

7.13-2.7.1,13.44

tasminnavasare sākṣādbhagavānindubhūṣaṇaḥ

7.13-2.7.1,13.44

śaktiṃ tayorapi draṣṭumarūpo rūpamāsthitaḥ

7.13-2.7.1,13.45

prasādamatulaṃ kartuṃ purā dattavarastayoḥ

7.13-2.7.1,13.45

āgacchattatra yatremau brahmanārāyaṇau sthitau

7.13-2.7.1,13.46

atha tuṣṭuvaturdevaṃ prītau bhītau ca kautukāt

7.13-2.7.1,13.46

praṇematuśca bahuśo bahumānena dūrataḥ

7.13-2.7.1,13.47

bhavopi bhagavānetāvanugṛhya pinākadhṛk

7.13-2.7.1,13.47

sādaraṃ paśyatoreva tayoraṃtaradhīyata

iti śrīśivamahāpurāṇe saptamyāṃ vāyavīyasaṃhitāyāṃ pūrvakhaṇḍe brahmaviṣṇusṛṣṭikathanaṃ nāma trayodaśo 'dhyāyaḥ

Original text: śivapurāṇam · Sanskrit Wikisource contributors · Sanskrit Wikisource · CC BY-SA 4.0