Shiva Purana · Chapter 2.5.50

sanatkumāra uvāca//
śṛṇu vyāsa yathā prāptā mṛtyupraśamanī parā //
vidyā kāvyena muninā śivānmṛtyuñjayābhidhāt

purāsau bhṛgudāyādo gatvā vārāṇasīṃ purīm//
bahukālaṃ tapastepe dhyāyanviśveśvaraṃ prabhum

sthāpayāmāsa tatraiva liṃgaṃ śaṃbhoḥ parātmanaḥ //
kūpaṃ cakāra sadramyaṃ vedavyāsa tadagrataḥ

paṃcāmṛtairdroṇamitairlakṣakṛtvaḥ prayatnataḥ //
snāpayāmāsa deveśaṃ sugaṃdhasnapanairbahu

sahasrakṛtvo deveśaṃ candanairyakṣakardamaiḥ//
samāliliṃpa suprītyā sugandhodvarttanānyanu

rājacaṃpakadhattūraiḥ karavīrakuśeśayaiḥ //
mālatīkarṇikāraiśca kadaṃbairbakulotpalaiḥ

mallikāśatapatrībhissiṃdhuvāraissakiṃśukaḥ //
bandhūkapuṣpaiḥ punnāgairnāgakeśarakeśaraiḥ

navamallīcibilikaiḥ kuṃdaissamucukundakaiḥ //
mandārairbilvapatraiśca droṇairmarubakairvṛkaiḥ //
granthiparṇairdamanakaiḥ suramyaiścūtapallavaiḥ

tulasīdevagaṃdhārībṛhatpatrīkuśāṃkuraiḥ //
nadyāvartairagastyaiśca saśālairdevadārubhiḥ

kāṃcanāraiḥ kurabakairdūrvāṃkurakuruṃṭakaiḥ//
pratyekamebhiḥ kusumaiḥ pallavairaparairapi // 2.5.50.१ ०//
patraiḥ sahasrapatraiśca ramyairnānāvidhaiśśubhaiḥ //
sāvadhānena suprītyā sa samānarca śaṃkaram

gītanṛtyopahāraiśca saṃstutaḥ stutibhirbahu //
nāmnāṃ sahasrairanyaiśca stotraistuṣṭāva śaṃkaram

sahasraṃ pañcaśaradāmitthaṃ śukro maheśvaram//
nānāprakāravidhinā maheśaṃ sa samarcayat // १ ३//
yadā devaṃ nānuloke manāgapi varonmukham //
tadānyaṃ niyamaṃ ghoraṃ jagrāhātīva dussaham

prakṣālya cetaso'tyaṃtaṃ cāṃcalyākhyaṃ mahāmalam //
bhāvanāvārbhirasakṛdiṃdriyaissahitasya ca

nirmalīkṛtya tacceto ratnaṃ dattvā pinākine //
prayayau kaṇadhūmaughaṃ sahasraṃ śaradāṃ kaviḥ

kāvyamitthaṃ tapo ghoraṃ kurvantaṃ dṛḍhamānasam //
prasasāda sa taṃ vīkṣya bhārgavāya maheśvaraḥ

tasmālliṃgādvinirgatya sahasrārkādhikadyutiḥ //
uvāca taṃ virūpākṣassākṣāddākṣāyaṇīpatiḥ

maheśvara uvāca //
taponidhe mahābhāga bhṛguputra mahāmune //
tapasānena te nityaṃ prasanno'haṃ viśeṣataḥ

manobhilaṣitaṃ sarvaṃ varaṃ varaya bhārgava //
prītyā dāsye'khilānkāmānnādeyaṃ vidyate tava

sanatkumāra uvāca //
niśamyeti vacaśśaṃbhormahāsukhakaraṃ varam //
sa babhūva kavistuṣṭo nimagnassukhavāridhau

udyadānaṃdasaṃdoha romāṃcācitavigrahaḥ //
praṇanāma mudā śaṃbhumaṃbho janayano dvijaḥ

tuṣṭāvāṣṭatanuṃ tuṣṭaḥ praphullanayanācalaḥ//
maulāvaṃjalimādhāya vadañjayajayeti ca

bhārgava uvāca //
tvaṃ bhābhirābhirabhibhūya tamassamastamastaṃ nayasyabhimatāni niśācarāṇām//
dedīpyase divamaṇe gagane hitāya lokatrayasya jagadīśvara tannamaste

loke'tivelamativelamahāmahobhirnirbhāsi kau ca gagane'khilalokanetraḥ //
vidrāvitākhilatamāssutamo himāṃśo pīyūṣa pūraparipūritaḥ tannamaste

tvaṃ pāvane pathi sadāgatirapyupāsyaḥ kastvāṃ vinā bhuvanajīvana jīvatīha //
stabdhaprabhaṃjanavivarddhi tasarvajaṃtoḥ saṃtoṣitā hi kulasarvagaḥ vai namaste

viśvekapāvaka na tāvakapāvakaikaśakterṛte mṛtavatāmṛtadivyakāryam //
prāṇiṣyado jagadaho jagadaṃtarātmaṃstvaṃ pāvakaḥ pratipadaṃ śamado namaste

pānīyarūpa parameśa jagatpavitra citravicitrasucaritrakaro'si nūnam//
viśvaṃ pavitramamalaṃ kila viśvanātha pānīyagāhanata etadato nato'smi

ākāśarūpabahiraṃtarutāvakāśadānādvikasvaramiheśvara viśvametat //
tvattassadā sadaya saṃśvasiti svabhāvātsaṃkocameti bhakto'smi natastatastvām

viśvaṃbharātmaka bibharṣi vibhotra viśvaṃ ko viśvanātha bhavato'nyatamastamoriḥ //
sa tvaṃ vināśaya tamo tama cāhibhūṣastavyātparaḥ paraparaṃ praṇatastatastvām

ātmasvarūpa tava rūpaparaṃparābhirābhistataṃ hara carācararūpametat//
sarvāṃtarātmanilayapratirūparūpa nityaṃ nato'smi paramātmajano'ṣṭamūrte

ityaṣṭamūrtibhirimābhirabaṃdhabaṃdho yuktau karoṣi khalu viśvajanīnamūrtte//
etattataṃ suvitataṃ praṇatapraṇīta sarvārthasārthaparamārtha tato nato'smi

sanatkumāra uvāca //
aṣṭamūrtyaṣṭakenetthaṃ pariṣṭutyeti bhārgavaḥ //
bhargaṃ bhūmimilanmauliḥ praṇanāma punaḥpunaḥ

iti stuto mahādevo bhārgaveṇātitejasā //
utthāya bhūmerbāhubhyāṃ dhṛtvā taṃ praṇataṃ dvijam

uvāca ślakṣṇayā vācā meghanādagabhīrayā //
suprītyā daśanajyotsnā pradyotitadiṃgataraḥ

mahādeva uvāca //
vipravarya kave tāta mama bhakto'si pāvanaḥ //
anenātyugratapasā svajanyācaritena ca

liṃgasthāpanapuṇyena liṃgasyārādhanena ca //
dattacittopahāreṇa śucinā niścalena ca

avimuktamahākṣetrapavitrācaraṇena ca //
tvāṃ sutābhyāṃ prapaśyāmi tavādeyaṃ na kiṃcana

anenaiva śarīreṇa mamodaradarīgataḥ //
madvarendriyamārgeṇa putrajanmatvameṣyasi

yacchāmyahaṃ varaṃ te'dya duṣprāpyaṃ pārṣadairapi //
harerhiraṇyagarbhācca prāyaśohaṃ jugopa yam /

mṛtasaṃjīvanī nāma vidyā yā mama nirmalā //
tapobalena mahatā mayaiva parinirmitā //४ १ //
tvāṃ tāṃ tu prāpayāmyadya maṃtrarūpāṃ mahāśuce//
yogyatā te'sti vidyāyāstasyāśśuci taponidhe

yaṃyamuddiśya niyatametāmāvartayiṣyasi //
vidyāṃ vidyeśvaraśreṣṭhaṃ satyaṃ prāṇi ṣyati dhuvam

atyarkamatyagniṃ ca te tejo vyomni ca tārakam //
dedīpyamānaṃ bhavitā grahāṇāṃ pravaro bhava

api ca tvāṃ kariṣyaṃti yātrāṃ nāryo naro'pi vā //
teṣāṃ tvaddṛṣṭipātena sarvakāryaṃ praṇaśyati

tavodaye bhaviṣyaṃti vivāhādīni suvrata //
sarvāṇi dharmakāryāṇi phalavaṃti nṛṇāmiha

sarvāśca tithayo nandāstava saṃyogataśśubhāḥ //
tava bhaktā bhaviṣyaṃti bahuśukrā bahu prajāḥ

tvayedaṃ sthāpitaṃ liṃgaṃ śukreśamiti saṃjñitam //
ye'rcayiṣyaṃti bhanujāsteṣāṃ siddhirbhaviṣyati

āvarṣaṃ pratighasrāṃ ye naktavrataparāyaṇāḥ //
tvaddine śukrakūpe ye kṛtasarvodakakriyāḥ

śukreśamarcayiṣyaṃti śṛṇu teṣāṃ tu yatphalam //
abaṃdhyaśukrāste martyāḥ putravaṃto'tiretasaḥ

puṃstvasaubhāgyasaṃpannā bhaviṣyaṃti na saṃśayaḥ //
upetavidyāste sarve janāssyuḥ sukhabhāginaḥ

iti dattvā varāndevastatra liṃge layaṃ yayau //
bhārgavo'pi nijaṃ dhāma prāpa saṃtuṣṭamānasaḥ

iti te kathitaṃ vyāsa yathā prāptā tapobalāt //
mṛtyuṃjayābhidhā vidyā kimanyacchrotumicchasi

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṃḍe mṛtasaṃjīvinīvidyāprāptivarṇanaṃ nāma pañcāśattamo'dhyāyaḥ