Shiva Purana · Chapter 2.5.13

vyāsa uvāca //
bho brahmanbhagavanpūrvaṃ śrutaṃ me brahmaputraka //
jalaṃdharaṃ mahādaityamavadhīcchaṃkaraḥ prabhuḥ

tattvaṃ vada mahāprājña caritaṃ śaśimaulinaḥ //
vistārapūrvakaṃ śṛṇvankastṛpyettadyaśo'malam

// sūta uvāca //
ityevaṃ vyāsasaṃpṛṣṭo brahmaputro mahāmuniḥ //
uvācārthavadavyagraṃ vākyaṃ vākyaviśāradaḥ

sanatkumāra uvāca //
ekadā jīvaśakrau ca bhaktyā paramayā mune //
darśanaṃ kartumīśasya kailāsaṃ jagmaturbhṛśam

atha gurvindrayorjñātvāgamanaṃ śaṃkaraḥ prabhuḥ //
parīkṣituṃ tayorjñānaṃ svadarśanaratātmanoḥ

digambaro'tha tanmārgamāruddhya sadgatissatām //
jaṭābaddhena śiraśātiṣṭhatsaṃśobhitānanaḥ

atha tau guruśakrau ca kurvaṃtau gamanaṃ mudā //
ālokya puruṣaṃ bhīmaṃ mārgamadhye'dbhutākṛtim

mahātejasvinaṃ śāṃtaṃ jaṭāsaṃbaddhamastakam //
mahābāhuṃ mahoraskaṃ gauraṃ nayanabhīṣaṇam

atho puraṃdaro'pṛcchatsvādhikāreṇa durmadaḥ //
puruṣaṃ taṃ svamārgāṃtasthitamajñāya śaṃkaram

purandara uvāca //
kastvaṃ bhoḥ kuta āyātaḥ kiṃ nāma vada tattvataḥ //
svasthānesaṃsthitaśśaṃbhu kiṃ vānyatra gataḥ prabhuḥ //

sanatkumāra uvāca //
śakreṇetthaṃ sa pṛṣṭastu kiṃcinnovāca tāpasaḥ //
śakraḥ punarapṛcchadvai novāca sa digaṃbaraḥ

punaḥ puraṃdaro'pṛcchllokānāmadhipeśvaraḥ //
tūṣṇīmāsa mahāyogī līlārūpadharaḥ prabhuḥ

itthaṃ punaḥ punaḥ pṛṣṭaśśakreṇa sa digambaraḥ //
novāca kiṃcidbhagavāñchakrajñānaparīkṣayā

atha cukrodha deveśastrailokyaiśvaryagarvitaḥ //
uvāca vacanaṃ caiva taṃ nirbhartsya jaṭādharam

// indra uvāca //
re mayā pṛcchyamāno'pi nottaraṃ dattavānasi //
atastvāṃ hanmi vajreṇa kaste trātāsti durmate

sanatkumāra uvāca //
ityudīrya tato vajrī saṃnirīkṣya krudhā hi tam //
haṃtuṃ digaṃbaraṃ vajramudyataṃ sa cakāra ha

puraṃdaraṃ vajrahastaṃ dṛṣṭvā devassadāśivaḥ //
cakāra staṃbhanaṃ tasya vajrapātasya śaṃkaraḥ

tato rudraḥ krudhāviṣṭaḥ karālākṣo bhayaṃkaraḥ //
drutameva prajajvāla tejasā pradahanniva

bāhupratiṣṭaṃbhabhuvāmanyunāṃtaśśacīpatiḥ //
samadahyata bhogīva maṃtraruddhaparākramaḥ

dṛṣṭvā bṛhaspatistūrṇaṃ prajvalaṃtaṃ svatejasā //
puruṣaṃ taṃ dhiyā jñātvā praṇanāma haraṃ prabhum

kṛtāṃjalipuṭo bhūtvā tato gururudāradhīḥ //
natvā ca daṃḍavadbhūmau prabhuṃ stotuṃ pracakrame

gururuvāca //
namo devādhidevāya mahādevāya cātmane //
maheśvarāya prabhave tryambakāya kapardine

dīnanāthāya vibhave namoṃ'dhakaniṣūdine //
tripuraghnāya śarvāya brahmaṇe parameṣṭhine

virūpākṣāya rudrāya bahurūpāya śaṃbhave //
virūpāyātirūpāya rūpātītāya te namaḥ

yajñavidhvaṃsakartre ca yajñānāṃ phaladāyine//
namaste makharūpāya parakarmapravartine

kālāṃtakāya kālāya kālabhogidharāya ca //
namaste parameśāya sarvatra vyāpine namaḥ

namo brahmaśirohaṃtre brahmacaṃdra stutāya ca//
brahmaṇyāya namaste'stu namaste paramātmane

tvamagniranilo vyoma tvamevāpo vasuṃdharā//
tvaṃ sūryaścandramā bhāni jyotiścakraṃ tvameva hi

tvameva viṣṇustvaṃ brahmā tatstutastvaṃ pareśvaraḥ //
munayaḥ sanakādyāstvaṃ nāradastvaṃ tapodhanaḥ

tvameva sarva lokeśastvameva jagadātmakaḥ //
sarvānvayassarvabhinnastvameva prakṛteḥ paraḥ

tvaṃ vai sṛjasi lokāṃśca rajasā vidhināmabhāk //
sattvena harirūpastvaṃ sakalaṃ yāsi vai jagat

tvamevāsi mahādeva tamasā hararūpadhṛk //
līlayā bhuvanaṃ sarvaṃ nikhilaṃ pāṃcabhautikam

tvaddhyānabalatassūryastapate viśvabhāvana //
amṛtaṃ cyavate loke śaśī vāti samariṇaḥ

tvaddhyānabalato meghāścāṃbu varṣaṃti śaṃkara //
tvaddhyānabalataśśakrastrilokīṃ pāti putravat

tvaddhyānabalato meghāḥ sarve devā munīśvarāḥ //
svādhikāraṃ ca kurvaṃti cakitā bhavato bhayāt

tvatpādakamalasyaiva sevanādbhuvi mānavāḥ //
nādriyante surānruda lokaiśvaryaṃ ca bhuṃjate

tvatpādakamalasyaiva sevanādagamanparām //
gatiṃ yogadhanā nāmapyagamyāṃ sarvadurlabhām

// sanatkumāra uvāca //
bṛhaspatiriti stutvā śaṃkaraṃ lokaśaṃkaram //
pādayo pātayāmāsa tasyeśasya puraṃdaram

pātayitvā ca deveśamiṃdraṃ nata śirodharam//
bṛhaspatiruvācedaṃ praśrayāvanataśśivam

// bṛhaspatiruvāca //
dīnanātha mahādeva praṇataṃ tava pādayoḥ //
samuddhara ca śāṃtaṃ svaṃ krodhaṃ nayanajaṃ kuru

tuṣṭo bhava mahādeva pāhīdra śaraṇāgatam //
agnireva śamaṃ yātu bhālanetrasamudbhavaḥ

// sanatkumāra uvāca //
ityākarṇya gurorvākyaṃ devadevo maheśvaraḥ //
uvāca karuṇāsindhurmeghanirhrādayā girā

maheśvara uvāca //
krodhaṃ ca nissṛte netrāddhārayāmi bṛhaspateḥ //
kathaṃ hi kañcukīṃ sarpassaṃdhatte nojjhitāṃ punaḥ

sanatkumāra uvācu //
iti śrutvā vacastasya śaṃkarasya bṛhaspatiḥ //
uvāca kliṣṭarūpaśca bhayavyākulamānasaḥ

bṛhaspatiruvāca //
he deva bhagavanbhaktā anukaṃpyāḥ sadaiva hi //
bhaktavatsalanāmeti tvaṃ satyaṃ kuru śaṃkara

kṣeptumanyatra deveśa svatejo'tyugramarhasi //
uddhartassarvabhaktānāṃ samuddhara puraṃdaram

sanatkumāra uvāca //
ityukto guruṇā rudro bhaktavatsalanāmabhāk //
pratyuvāca prasannātmā surejyaṃ praṇatārttihā

śiva uvāca //
prītaḥ stutyānayā tāta dadāmi varamuttamam //
indrasya jīvadānena jīveti tvaṃ prathāṃ vraja /

samudbhūto'nalo yo'yaṃ bhālanetrātsureśahā //
enaṃ tyakṣyāmyahaṃ dūraṃ yathendraṃ naiva pīḍayet

// sanatkumāra uvāc //
ityuktvā taṃ kare dhṛtvā svatejo'nalamadbhutam //
bhālanetrātsamudbhūtaṃ prākṣipallavaṇāṃbhasi

tataścāṃtardadhe rudro mahālīlākaraḥ prabhuḥ //
guruśakrau bhayānmuktau jagmatuḥ sukhamuttamam

yadarthaṃ gamanodyuktau darśanaṃ prāpya tasya vai //
kṛtārthau guruśakrau hi svasthānaṃ jagmaturmudā

iti śrīśivamahāpurāṇe dvitīyāyāṃ rudrasaṃhitāyāṃ paṃcame yuddhakhaṇḍe jalaṃdharavadhopākhyāne śakrajīvanaṃ nāma trayodaśo' dhyāyaḥ