Shatapatha Brahmana · Chapter 14.9.3

śrīmanthakarmabrāhmaṇam
sa yaḥ kāmayeta/ mahatprāpnuyāmityudagayana āpūryamāṇapakṣe puṇyāhe dvādaśāhamupasadvratī bhūtvaudumbare kaṃse camase vā vā sarvauṣadhamphalānīti sambhṛtya parisamuhya parilipyāgnimupasamādhāyāvṛtā''jyaṃ saṃskṛtya puṃsā nakṣatreṇa manthaṃ saṃnīya juhoti -

yāvanto devāstvayi jātavedaḥ tiryañco ghnanti puruṣasya kāmān/ tebhyo'hambhāgadheyaṃ juhomi te mā tṛptāḥ kāmaistarpayantu svāhā -

yā tiraścī nipadyase'haṃ vidharaṇī iti/ tāṃ tvā ghṛtasya dhārayā yaje saṃrādhanīmahaṃ svāhā// prajāpate na tvadetānyanya iti tṛtīyāṃ juhoti -

jyeṣṭhāya svāhā śreṣṭhāya svāheti/ agnau hutvā manthe saṃsravamavanayati prāṇāya svāhā vasiṣṭhāyai svāhetyagnau hutvā manthe saṃsravamavanayati vāce svāhā pratiṣṭhāyai svāhetyagnau hutvā manthe saṃsravamavanayati cakṣuṣe svāhā sampade svāhetyagnau hutvā manthe saṃsravamavanayati śrotrāya svāhā''yatanāya svāhetyagnau hutvā manthe sasravamavanayati manase svāhā prajātyai svāhetyagnau hutvā manthe saṃsravamavanayati retase svāhetyagnau hutvā manthe saṃsravamavanayati -

bhūtāya svāheti/ agnau hutvā manthe saṃsravamavanayati bhaviṣyate svāhetyagnau hutvā manthe saṃsravamavanayati viśvāya svāhetyagnau hutvā manthe saṃsravamavanayati sarvāya svāhetyagnau hutvā manthe saṃsravamavanayati -

pṛthivyai svāheti/ agnau hutvā manthe saṃsravamavanayati antarikṣāya svāhetyagnau hutvā manthe saṃsravamavanayati dive svāhetyagnau hutvā manthe saṃsravamavanayati digbhyaḥsvāhetyagnau hutvā manthe saṃsravamavanayati brahmaṇe svāhetyagnau hutvā manthe saṃsravamavanayati kṣatrāya svāhetyagnau hutvā manthe saṃsravamavanayati -

bhūḥ svāheti/ agnau hutvā manthe saṃsravamavanayati bhuvaḥ svāhetyagnau hutvā manthe saṃsravamavanayati svaḥ svāhetyagnau hutvā manthe saṃsravamavanayati bhūrbhuvaḥ svaḥ svāhetyagnau hutvā manthe saṃsravamavanayati -

agnaye svāheti/ agnau hutvā manthe saṃsravamavanayati somāya svāhetyagnau hutvā manthe saṃsravamavanayati tejase svāhetyagnau hutvā manthe saṃsravamavanayati śriyai svāhetyagnau hutvā manthe saṃsravamavanayati lakṣmyai svāhetyagnau hutvā manthe saṃsravamavanayati savitre svāhetyagnau hutvā manthe saṃsravamavanayati sarasvatyai svāhetyagnau hutvā manthe saṃsravamavanayati viśvebhyo devebhyaḥ svāhetyagnau hutvā manthe saṃsravamavanayati prajāpataye svāhetyagnau hutvā manthe saṃsravamavanayati -

athainamabhimṛśati/ bhramasi jvaladasi pūrṇamasi prastabdhamasyekasabhamasi hiṅkṛtamasi hiṅkriyamāṇamasyudgīthamasyudgīyamānamasi śrāvitamasi pratyāśrāvitamasyārdre saṃdīptamasi vibhūrasi prabhūrasi jyotirasyannamasi nidhanamasi saṃvargo'sīti -

athainamudyacchati/ āmo'syāmaṃ hi te mayi/ sa hi rājeśāno'dhipatiḥ sa mā rājeśāno'dhipatiṃ karotviti -

athainamācāmati/ tatsaviturvareṇyam/ madhu vātā ṛtāyate madhu kṣaranti sindhavaḥ/ mādhvīrnaḥ santvoṣadhīḥ// bhūḥ svāhā -

bhargo devasya dhīmahi/ madhu naktamutoṣaso madhumatpārthivaṃ rajaḥ/ madhu dyaurastu naḥ pitā // bhuvaḥ svāhā -

dhiyo yo naḥ pracodayāt/ madhumānno vanaspatirmadhumām̐ astu sūryaḥ/ mādhvīrgāvo bhavantu naḥ// svaḥ svāheti sarvāṃ ca sāvitrīmanvāha sarvāśca madhumatīḥ sarvāśca vyāhṛtīrahamevedaṃ sarvaṃ bhūyāsaṃ bhūrbhuvaḥ svaḥ svāhetyantata ācamya prakṣālya pāṇī jaghanenāgniṃ prākśirāḥ saṃviśati -

prātarādityamupatiṣṭhate/ diśāmekapuṇḍarīkamasyahammanuṣyāṇāmekapuṇḍarīkaṃ bhūyāsamiti yathetametya jaghanenāgnimāsīno vaṃśaṃ japati -

taṃ haitamuddālaka āruṇiḥ vājasaneyāya yājñavalkyāyāntevāsina uktvovācāpi ya enaṃ śuṣke sthāṇau niṣiñcejjāyerañchākhāḥ praroheyuḥ palāśānīti -

etamu haiva vājasaneyo yājñavalkyo madhukāya paiṅgyāyāntevāsina uktvovācāpi ya enaṃ śuṣke sthāṇau niṣiñcejjāyerañchākhāḥ praroheyuḥ palāśānīti -

etamu haiva madhukaḥ paiṅgyaḥ/ cūḍāya bhāgavittaye'ntevāsina uktvovācāpi ya enaṃ śuṣke sthāṇau niṣiñcejjāyerañchākhāḥ praroheyuḥ palāśānīti -

etamu haiva cūḍo bhāgavittiḥ/ jānakaya āyasthūṇāyāntevāsina uktvovācāpi ya enaṃ śuṣke sthāṇau niṣiñcejjāyerañchākhāḥ praroheyuḥ palāśānīti -

etamu haiva jānakirāyasthūṇaḥ/ satyakāmāya jābālāyāntevāsina uktvovācāpi ya enaṃ śuṣke sthāṇau niṣiñcejjāyerañchākhāḥ praroheyuḥ palāśānīti -

etamu haiva satyakāmo jābālo antevāsibhya uktvovācāpi ya enaṃ śuṣke sthāṇau niṣiñcejjāyerañchākhāḥ praroheyuḥ palāśānīti tametaṃ nāputrāya vā'nantevāsine vā brūyāt -

caturaudumbaro bhavati/ audumbaraścamasa audumbara sruva audumbara idhma audumbaryā upamanthanyau -

daśa grāmyāṇi dhānyāni bhavanti/ vrīhiyavāstilamāṣā aṇupriyaṅgavo godhūmāśca masūrāśca khalvāśca khalakulāśca tāntsārdhaṃ piṣṭvā dadhnā madhunā ghṛtenopasiñcatyājyasya juhoti -