Scripture Library

Shatapatha Brahmana · Chapter 11.7.2

11.7.2.11.7.2.1

११.७.२ paśubandhasyeṣṭisavavidhatvena dvaividhyābhidhāyakaṃ brāhmaṇam
haviryajñavidho ha vā anyaḥ paśubandhaḥ/ savavidho'nyaḥ sa haiṣa haviryajñavidho yasminvratamupanayati yasminnapaḥ praṇayati yasminpūrṇapātraṃ ninayati yasminviṣṇukramānkramayatyatha haiṣa savavidho yasminnetāni na kriyante -

11.7.2.11.7.2.2

tadāhuḥ/ iṣṭiḥ paśubandhā३ mahāyajñā३ iti mahāyajña iti ha brūyādiṣṭiṃ vai tarhi paśubandhamakarvyenamakṛkṣathā ityenaṃ brūyāt -

11.7.2.11.7.2.3

tasya prayājā eva prātaḥsavanam anuyājāstṛtīyasavanaṃ puroḍāśa eva mādhyandinaṃ savanam -

11.7.2.11.7.2.4

taddhaike/ vapāyāṃ hutāyāṃ dakṣiṇā nayanti tadu tathā na kuryādyo hainaṃ tatra brūyādbahirddhā nvā ayaṃ prāṇebhyo dakṣiṇā anaiṣīnna prāṇānadadakṣadandho vā srāmo vā badhiro vā pakṣahato vā bhaviṣyatītīśvaro ha tathaiva syāt -

11.7.2.11.7.2.5

itthameva kuryāt/ puroḍāśeḍāyāmevopahūtāyāṃ dakṣiṇā nayedaindro vā ayammadhyataḥ prāṇa imamevaitadaindraṃ madhyataḥ prāṇaṃ dakṣiṇābhirdakṣayatyaindraṃ vai mādhyandinaṃ savanaṃ mādhyandine vai savane dakṣiṇā nīyante tasmātpuroḍāśeḍāyāmevopahūtāyāṃ dakṣiṇā nayet -

11.7.2.11.7.2.6

tadāhuḥ/ adhvaryo yaddīkṣitasya nānavabhṛtho'vakalpate kvainamadidīkṣa ityāvabhṛthādanūddṛṃheyuradhvaryuśca pratiprasthātā ca hotā ca maitrāvaruṇaśca brahmā cāgnīdhraścaitairvā eṣa ṣaḍḍhotā tamanudrutya ṣaḍḍhotāraṃ juhotyekāmāhutiṃ kṛtvā pañca vā''jyā dyauṣpṛṣṭhamantarikṣamātmā'ṅgairyajñampṛthivīṃ śarīraiḥ vācaspate'cchidrayā vācā'cchidrayā juhvā divi devāvṛdhaṃ hotrāmairayatsvāheti saiva dīkṣā -

11.7.2.11.7.2.7

tadāhuḥ/ adhvaryo yaddīkṣitasya nānavabhṛtho'vakalpate kvainamavabhṛthamavaneṣyasīti sa yaddhṛdayaśūlena caranti sa haivaitasyāvabhṛthaḥ -

11.7.2.11.7.2.8

madhuko ha smāha paiṅgyaḥ/ visomena vā eke paśubandhena yajante sasomenaike/ divi vai soma āsīttaṃ gāyatrī vayo bhūtvā''harattasya yatparṇamacchidyata tatparṇasya parṇatvamiti nvā etadbrāhmaṇamudyate visomena vā eke paśubandhena yajante sasomenaike sa haiṣa visomena paśubandhena yajate yo'nyaṃ pālāśādyūpaṃ kurute'tha haiṣa sasomena paśubandhena yajate yaḥ pālāśaṃ yūpaṃ kurute tasmātpālāśameva yūpaṃ kurvīta -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0