Scripture Library
Saundarya Lahari · Verses 101-103
101
samānītaḥ padbhyāṃ maṇimukuratām ambaramaṇir bhayād antarbaddhastimitakiraṇaśreṇimasṛṇaḥ
dadhāti tvadvaktraṃ pratiphalitam aśrāntivikacaṃ nirātaṅkaṃ candrān nijahṛdayapaṅkeruham iva //
102
samudbhūtasthūlastanabharam uraś cāru hasitaṃ kaṭākṣe kandarpaḥ kusumitakadambadyutivapuḥ
harasya tvadbhrāntiṃ manasi janayām āsa madano bhavatyā ye bhaktāḥ pariṇatir amīṣām iyam ume //
103
nidhe nityasmere niravadhiguṇe nītinipuṇe nirāghātajñāne niyamaparacittaikanilaye
niyatyā nirmukte nikhilanigamāntastutipade nirātaṅke nitye nigamaya mamāpi stutim imām //
Original text: Saundaryalaharī · Edition: W. Norman Brown, Cambridge MA 1958 (Harvard Oriental Series, 43) · Data entry Peter Schreiner · GRETIL (Göttingen) · CC BY-NC-SA 4.0