Scripture Library
Sarvatathāgatatattvasaṃgraha · Chapter 75
75.1
Ritual
athātra karmamaṇḍale yathāvad vidhivistaraṃ kṛtvā, vajrakulakarmajñānānyutpādayet /
tatrādita eva śāntikarmādijñānaṃ śikṣayet /
samidbhirmadhurairagniṃ prajvālya susamāhitaḥ /
vajrakrodhasamāpattyā tilāṃ hutvā aghāndahet
75.2
taireva tu samidbhistu prajvālya tu hutāśanaṃ /
taṇḍulāṃstu juhvan nityaṃ gṛhapuṣṭirbhaved dhruvaṃ
75.3
samidbhirmadhuraiścāpi agniṃ prajvālya paṇḍitaḥ /
dūrvāpravālāṃ saghṛtān juhvannāyuḥ pravardhate
75.4
taireva tu samidbhistu prajvālya tu hutāśanaṃ /
kuśapravālāṃstailena juhvan rakṣā tu śāśvatam // iti
Original text: Sarvatathāgatatattvasaṃgraha · Edition: Lokesh Chandra: Sarva Tathāgata Tattva Saṅgraha. Delhi : Motilal Banarsidas, 1987. · Data entry Udip Shakya Anula Shakya · GRETIL (Göttingen) · CC BY-NC-SA 4.0