Sarvatathāgatatattvasaṃgraha · Chapter 176

atha samayamudrottamasiddhitantraṃ bhavati /
yathā vajradharaḥ siddhastathāhamiti bhāvayan /
buddhasauritvamāpnoti na cetsiddhiryathoparī- // ti //
atha dharmamudrottamasiddhitantraṃ bhavati /
svabhāvaśuddhyā vācā vai sarvadharmā iti brūvan /
buddhasauritvamāpnoti na cetsiddhiryathoparī- // ti //
atha karmamudrottamasiddhitantraṃ bhavati /
sarvasya sarvaśuddhitvātsarvakarmāṇi śodhayan /
buddhasauritvamāpnoti na cetsiddhiryathoparī- // ti //
tathāgatakulottamasiddhayaḥ //
atha vajrapāṇiḥ svakulottamasiddhitantramudājahāra /
buddhājñāṃ sarvasatvārthāt sarvasiddhiprayogataḥ /
sādhayaṃstu mahāmudrāṃ buddhatvamiha janmanī- // ti //
atha samayottamasiddhitantraṃ bhavati /
yathā vajradharaḥ siddhistathāhamiti bhāvayan /
mahāmudrāprayogeṇa kṣaṇātsauritvamāpnuta // iti //
atha dharmamudrottamasiddhitantraṃ bhavati /
anakṣareṣu dharmeṣu prapañco na hi vidyate /
imaṃ vadaṃstu dharmāgrīṃ bhāvayan sauritāṃ brajed // iti //
atha karmamudrottamasiddhitantraṃ bhavati /
yatkaroti hi karma vai śubhaṃ vā yadi vāśubhaṃ /
niryātayaṃ jineṣvastu kṣaṇātsauritāṃ vrajed // iti //
atha vajrapāṇirmahābodhisatvaḥ padmakulottamasiddhitantramudājahāra / tatra prathamantāvanmahāmudrottamasiddhitantraṃ bhavati /
rāgaḥ śuddhaḥ svabhāvena tīrthikairavasanyate /
tasyāvirāgo dharmo 'smiṃ mahāyāne tu sidhyatī- // ti //
atha samayamudrottamasiddhitantraṃ bhavati /
abhyasaṃstu mahāmaitrīn samādhidṛḍhayogataḥ /
spharedvidhivadyogāt kṣaṇātsauritvamāpnuyād // iti //
atha dharmamudrottamasiddhitantraṃ bhavati /
svabhāvaśuddhaḥ saṃrāga iti brūyādimaṃ nayaṃ /
rāgapāramitāprāpte kṣaṇātsauritvamāpnuyād // iti //
atha karmamudrottamasiddhitantraṃ bhavati /
darśanasparśanābhyāṃ tu śravaṇasmaraṇena vā /
syāmahaṃ sarvasatvānāṃ sarvaduḥkhāntakasthitir // iti //
atha vajrapāṇirmahābodhisatvo maṇikulottamasiddhitantramudājahāra / tatra mahāmudrottamasiddhitantraṃ bhavati /
sarvabuddhābhiṣeko 'haṃ bhaveyaṃ vajragarbhavat /
bhāvayaṃ vibhāvayan vai kṣaṇātsauritvamāpnuta // iti //
atha samayamudrottamasiddhitantraṃ bhavati /
bhaveyaṃ sarvasatvānāṃ sarvāśāparipūrakaḥ /
ākāśagarbhasadṛśaḥ kṣaṇātsauritvamāpnuta // iti //
atha dharmamudrottamasiddhitantraṃ bhavati /
ātmanastu samutsṛjya dhanadānān suharṣitaḥ /
vadan dharmamayīṃ mudrāmiha sauritvamāpnuta // iti //
atha karmamudrottamasiddhitantraṃ bhavati /
dāridrāṇāṃ hitārthāya dhanotpādane tatparaḥ /
udyogātsauritāṃ yāti na cetsiddhiryathoparī- // ti //
sarvakulamudrāṇāṃ buddhabodhisatvottamasiddhyavāptividhivistaraḥ //
atha vajrapāṇirmahābodhisatvaḥ punarapi sarvatathāgata[samayasi]ddhitantramudājahāra / tatrāyaṃ sarvatathāgatasamayasiddhitantraṃ bhavati /
yasya rāgasamāpattistasya rāgeṇa śodhayet /
iti buddhanmahāmudrā jñānasya samayaḥ smṛtaḥ //
atha tathāgatakulasamayasiddhitantraṃ bhavati /
kāmānāmavirāgastu samayaḥ sumahānayaṃ /
tathāgatakulaśuddho 'nātikramyo jinairapi //
atha vajrakulasamayasiddhitantraṃ bhavati /
akrodhasyāpi satvārthānmahākrodhapradarśanaṃ /
mahāvajrakule tveṣa samayo duratikramaḥ //
atha padmakulasamayasiddhitantraṃ bhavati /
svabhāvaśuddhijñānena tasya kāryaṃ sa karoti /
mahāpadmakule tveṣa samayo duratikramaḥ //
atha ratnakulasamayasiddhitantraṃ bhavati /
alpatve vā bahutve vā yathābhirucitaṃ punaḥ /
avaśyo divasaḥ kāryo dānena samayo hyayam // iti //
sarvakulasamayavidhivistaratantraṃ //
atha vajrapāṇirmahābodhisatvaḥ sarvatathāgatadharmamudrājñānasiddhitantramudājahāra / tatreyaṃ sarvatathāgatadharmasiddhitantra bhavati /
buddho dharma iti khyāta ityuktvā dharmatākṣaraṃ /
buddhadharmamahāmudrājñānasya paramanayaṃ //
tatredaṃ tathāgatakuladharmasiddhitantraṃ /
rāgācchraddhatarannāsti dharmaḥ sarvasukhapradaḥ /
tathāgatakulepyeṣa dharmaḥ siddhikaraḥ paraḥ //
tatredaṃ vajrakuladharmasiddhitantraṃ /
buddhājñācchodhanārthādvā satvatrāṇārthatastathā /
akrodho 'pi hi saṃduṣṭānmārayaṃcchuddhimāpnute //
tatredaṃ padmakuladharmasiddhitantraṃ /
aliptaṃ salilaiḥ padmaṃ tathā rāgo na duṣyati /
iti brūvannakāryāṇi kurvaṃ pāpairna lipyate //
tatredaṃ maṇikulasiddhitantraṃ /
dānātsamo na dharmo 'sti pratipattyā bravīti hi /
mahāmaṇikule dharmaḥ na cetsiddhiryathoparī- // ti //
sarvakuladharmasiddhividhivistaratantram //
atha vajrapāṇirmahābodhisatvaḥ sarvatathāgatakulakarmasiddhitantramudājahāra / tatredaṃ tathāgatakarmasiddhitantraṃ bhavati /
buddhatvaṃ sarvasatvānāṃ bodhisatvatvameva ca /
yathāvadvinayaṃ caiva karmamudrāgrasiddhidā //
tatredaṃ tathāgatakulakarmasiddhitantraṃ bhavati /
caturvidhābhiḥ pūjābhiḥ sadā yogāccaturvidhaṃ /
catuḥkālayogena kurvan karmāṇi sādhayet //
tatredaṃ vajrakulakarmasiddhitantram /
duṣṭasatvopaghātāya yadyatkārya karoti saḥ /
karmavajrakule 'pyeṣa sarvasiddhipradāyakaḥ //
tatredaṃ padmakulakarmasiddhitantraṃ /
bhayātmanāmabhayado yathāvadvinayastathā /
etatpadmakule karma buddhasiddhipradāyakaṃ //
atha maṇikulakarmasiddhitantraṃ /
abhiṣekastathā dānaṃ sarvāśāparipūrayaḥ /
buddhānāṃ dehināṃ caiva karma sarvārthasādhakam // iti //
sarvakulakarmasiddhividhivistaratantraṃ //
atha vajrapāṇirmahābodhisatvaḥ sarvatathāgatakuladharmatāmudrājñānatantramudājahāra /
tatredaṃ tathāgatadharmatājñānasiddhitantraṃ bhavati /
vajrasatvasamādhistu buddhānāṃ dharmatā smṛtā /
etadbuddhasya buddhatvaṃ na buddho bhavate 'nyataḥ //
tatredaṃ tathāgatakuladharmatājñānasiddhitantraṃ /
bhāvayaṃstu mahāmudrāṃ sādhayetsarvasiddhayaḥ /
tathāgatakule 'pyeṣa dharmatottamasiddhidā //
tatredaṃ vajrakuladharmatājñānasiddhitantraṃ //
baddhābhiḥ samayāgryābhiḥ sarvakarmāṇi sādhayet /
mahāmudrāprayogeṇa vajrasiddhimavāpnuyāt //
tatredaṃ padmakuladharmatājñānasiddhitantraṃ /
dharmamudrāprayogeṇa dharmamudrāḥ pravartayet /
anayā sādhayaṃ dharmān dharmatāvajradharmiṇaḥ //
tatredaṃ maṇikuladharmatājñānasiddhitantraṃ /
karmamudrāprayogeṇa karmavajraṃ hṛdi sthitaṃ /
bhāvayaṃ dharmatāmetāvāpnoti svakarmatām // iti //
sarvakuladharmatājñānasiddhitantraṃ //
atha vajrapāṇirmahābodhisatvaḥ sarvatathāgatakulajñānasiddhitantramudājahāra / tatredaṃ tathāgatajñānasiddhitantraṃ bhavati /
vajrasatvasamādhisthaḥ candravajraprayogataḥ /
yathā varṇau tu tau vetti tathā lokaṃ tu vetti saḥ

śuddhe śuddhamiti jñeyaṃ pāṇḍare tu prabhāsvaraṃ /
rakte raktaṃtare kruddhaṃ yādṛgvarṇa tadātmakaṃ