સર્વતથાગતતત્ત્વસંગ્રહ · અધ્યાય 176

અથ સમયમુદ્રોત્તમસિદ્ધિતન્ત્રં ભવતિ ।
યથા વજ્રધરઃ સિદ્ધસ્તથાહમિતિ ભાવયન્ ।
બુદ્ધસૌરિત્વમાપ્નોતિ ન ચેત્સિદ્ધિર્યથોપરી- ॥ તિ ॥
અથ ધર્મમુદ્રોત્તમસિદ્ધિતન્ત્રં ભવતિ ।
સ્વભાવશુદ્ધ્યા વાચા વૈ સર્વધર્મા ઇતિ બ્રૂવન્ ।
બુદ્ધસૌરિત્વમાપ્નોતિ ન ચેત્સિદ્ધિર્યથોપરી- ॥ તિ ॥
અથ કર્મમુદ્રોત્તમસિદ્ધિતન્ત્રં ભવતિ ।
સર્વસ્ય સર્વશુદ્ધિત્વાત્સર્વકર્માણિ શોધયન્ ।
બુદ્ધસૌરિત્વમાપ્નોતિ ન ચેત્સિદ્ધિર્યથોપરી- ॥ તિ ॥
તથાગતકુલોત્તમસિદ્ધયઃ ॥
અથ વજ્રપાણિઃ સ્વકુલોત્તમસિદ્ધિતન્ત્રમુદાજહાર ।
બુદ્ધાજ્ઞાં સર્વસત્વાર્થાત્ સર્વસિદ્ધિપ્રયોગતઃ ।
સાધયંસ્તુ મહામુદ્રાં બુદ્ધત્વમિહ જન્મની- ॥ તિ ॥
અથ સમયોત્તમસિદ્ધિતન્ત્રં ભવતિ ।
યથા વજ્રધરઃ સિદ્ધિસ્તથાહમિતિ ભાવયન્ ।
મહામુદ્રાપ્રયોગેણ ક્ષણાત્સૌરિત્વમાપ્નુત ॥ ઇતિ ॥
અથ ધર્મમુદ્રોત્તમસિદ્ધિતન્ત્રં ભવતિ ।
અનક્ષરેષુ ધર્મેષુ પ્રપઞ્ચો ન હિ વિદ્યતે ।
ઇમં વદંસ્તુ ધર્માગ્રીં ભાવયન્ સૌરિતાં બ્રજેદ્ ॥ ઇતિ ॥
અથ કર્મમુદ્રોત્તમસિદ્ધિતન્ત્રં ભવતિ ।
યત્કરોતિ હિ કર્મ વૈ શુભં વા યદિ વાશુભં ।
નિર્યાતયં જિનેષ્વસ્તુ ક્ષણાત્સૌરિતાં વ્રજેદ્ ॥ ઇતિ ॥
અથ વજ્રપાણિર્મહાબોધિસત્વઃ પદ્મકુલોત્તમસિદ્ધિતન્ત્રમુદાજહાર । તત્ર પ્રથમન્તાવન્મહામુદ્રોત્તમસિદ્ધિતન્ત્રં ભવતિ ।
રાગઃ શુદ્ધઃ સ્વભાવેન તીર્થિકૈરવસન્યતે ।
તસ્યાવિરાગો ધર્મો ઽસ્મિં મહાયાને તુ સિધ્યતી- ॥ તિ ॥
અથ સમયમુદ્રોત્તમસિદ્ધિતન્ત્રં ભવતિ ।
અભ્યસંસ્તુ મહામૈત્રીન્ સમાધિદૃઢયોગતઃ ।
સ્ફરેદ્વિધિવદ્યોગાત્ ક્ષણાત્સૌરિત્વમાપ્નુયાદ્ ॥ ઇતિ ॥
અથ ધર્મમુદ્રોત્તમસિદ્ધિતન્ત્રં ભવતિ ।
સ્વભાવશુદ્ધઃ સંરાગ ઇતિ બ્રૂયાદિમં નયં ।
રાગપારમિતાપ્રાપ્તે ક્ષણાત્સૌરિત્વમાપ્નુયાદ્ ॥ ઇતિ ॥
અથ કર્મમુદ્રોત્તમસિદ્ધિતન્ત્રં ભવતિ ।
દર્શનસ્પર્શનાભ્યાં તુ શ્રવણસ્મરણેન વા ।
સ્યામહં સર્વસત્વાનાં સર્વદુઃખાન્તકસ્થિતિર્ ॥ ઇતિ ॥
અથ વજ્રપાણિર્મહાબોધિસત્વો મણિકુલોત્તમસિદ્ધિતન્ત્રમુદાજહાર । તત્ર મહામુદ્રોત્તમસિદ્ધિતન્ત્રં ભવતિ ।
સર્વબુદ્ધાભિષેકો ઽહં ભવેયં વજ્રગર્ભવત્ ।
ભાવયં વિભાવયન્ વૈ ક્ષણાત્સૌરિત્વમાપ્નુત ॥ ઇતિ ॥
અથ સમયમુદ્રોત્તમસિદ્ધિતન્ત્રં ભવતિ ।
ભવેયં સર્વસત્વાનાં સર્વાશાપરિપૂરકઃ ।
આકાશગર્ભસદૃશઃ ક્ષણાત્સૌરિત્વમાપ્નુત ॥ ઇતિ ॥
અથ ધર્મમુદ્રોત્તમસિદ્ધિતન્ત્રં ભવતિ ।
આત્મનસ્તુ સમુત્સૃજ્ય ધનદાનાન્ સુહર્ષિતઃ ।
વદન્ ધર્મમયીં મુદ્રામિહ સૌરિત્વમાપ્નુત ॥ ઇતિ ॥
અથ કર્મમુદ્રોત્તમસિદ્ધિતન્ત્રં ભવતિ ।
દારિદ્રાણાં હિતાર્થાય ધનોત્પાદને તત્પરઃ ।
ઉદ્યોગાત્સૌરિતાં યાતિ ન ચેત્સિદ્ધિર્યથોપરી- ॥ તિ ॥
સર્વકુલમુદ્રાણાં બુદ્ધબોધિસત્વોત્તમસિદ્ધ્યવાપ્તિવિધિવિસ્તરઃ ॥
અથ વજ્રપાણિર્મહાબોધિસત્વઃ પુનરપિ સર્વતથાગત[સમયસિ]દ્ધિતન્ત્રમુદાજહાર । તત્રાયં સર્વતથાગતસમયસિદ્ધિતન્ત્રં ભવતિ ।
યસ્ય રાગસમાપત્તિસ્તસ્ય રાગેણ શોધયેત્ ।
ઇતિ બુદ્ધન્મહામુદ્રા જ્ઞાનસ્ય સમયઃ સ્મૃતઃ ॥
અથ તથાગતકુલસમયસિદ્ધિતન્ત્રં ભવતિ ।
કામાનામવિરાગસ્તુ સમયઃ સુમહાનયં ।
તથાગતકુલશુદ્ધો ઽનાતિક્રમ્યો જિનૈરપિ ॥
અથ વજ્રકુલસમયસિદ્ધિતન્ત્રં ભવતિ ।
અક્રોધસ્યાપિ સત્વાર્થાન્મહાક્રોધપ્રદર્શનં ।
મહાવજ્રકુલે ત્વેષ સમયો દુરતિક્રમઃ ॥
અથ પદ્મકુલસમયસિદ્ધિતન્ત્રં ભવતિ ।
સ્વભાવશુદ્ધિજ્ઞાનેન તસ્ય કાર્યં સ કરોતિ ।
મહાપદ્મકુલે ત્વેષ સમયો દુરતિક્રમઃ ॥
અથ રત્નકુલસમયસિદ્ધિતન્ત્રં ભવતિ ।
અલ્પત્વે વા બહુત્વે વા યથાભિરુચિતં પુનઃ ।
અવશ્યો દિવસઃ કાર્યો દાનેન સમયો હ્યયમ્ ॥ ઇતિ ॥
સર્વકુલસમયવિધિવિસ્તરતન્ત્રં ॥
અથ વજ્રપાણિર્મહાબોધિસત્વઃ સર્વતથાગતધર્મમુદ્રાજ્ઞાનસિદ્ધિતન્ત્રમુદાજહાર । તત્રેયં સર્વતથાગતધર્મસિદ્ધિતન્ત્ર ભવતિ ।
બુદ્ધો ધર્મ ઇતિ ખ્યાત ઇત્યુક્ત્વા ધર્મતાક્ષરં ।
બુદ્ધધર્મમહામુદ્રાજ્ઞાનસ્ય પરમનયં ॥
તત્રેદં તથાગતકુલધર્મસિદ્ધિતન્ત્રં ।
રાગાચ્છ્રદ્ધતરન્નાસ્તિ ધર્મઃ સર્વસુખપ્રદઃ ।
તથાગતકુલેપ્યેષ ધર્મઃ સિદ્ધિકરઃ પરઃ ॥
તત્રેદં વજ્રકુલધર્મસિદ્ધિતન્ત્રં ।
બુદ્ધાજ્ઞાચ્છોધનાર્થાદ્વા સત્વત્રાણાર્થતસ્તથા ।
અક્રોધો ઽપિ હિ સંદુષ્ટાન્મારયંચ્છુદ્ધિમાપ્નુતે ॥
તત્રેદં પદ્મકુલધર્મસિદ્ધિતન્ત્રં ।
અલિપ્તં સલિલૈઃ પદ્મં તથા રાગો ન દુષ્યતિ ।
ઇતિ બ્રૂવન્નકાર્યાણિ કુર્વં પાપૈર્ન લિપ્યતે ॥
તત્રેદં મણિકુલસિદ્ધિતન્ત્રં ।
દાનાત્સમો ન ધર્મો ઽસ્તિ પ્રતિપત્ત્યા બ્રવીતિ હિ ।
મહામણિકુલે ધર્મઃ ન ચેત્સિદ્ધિર્યથોપરી- ॥ તિ ॥
સર્વકુલધર્મસિદ્ધિવિધિવિસ્તરતન્ત્રમ્ ॥
અથ વજ્રપાણિર્મહાબોધિસત્વઃ સર્વતથાગતકુલકર્મસિદ્ધિતન્ત્રમુદાજહાર । તત્રેદં તથાગતકર્મસિદ્ધિતન્ત્રં ભવતિ ।
બુદ્ધત્વં સર્વસત્વાનાં બોધિસત્વત્વમેવ ચ ।
યથાવદ્વિનયં ચૈવ કર્મમુદ્રાગ્રસિદ્ધિદા ॥
તત્રેદં તથાગતકુલકર્મસિદ્ધિતન્ત્રં ભવતિ ।
ચતુર્વિધાભિઃ પૂજાભિઃ સદા યોગાચ્ચતુર્વિધં ।
ચતુઃકાલયોગેન કુર્વન્ કર્માણિ સાધયેત્ ॥
તત્રેદં વજ્રકુલકર્મસિદ્ધિતન્ત્રમ્ ।
દુષ્ટસત્વોપઘાતાય યદ્યત્કાર્ય કરોતિ સઃ ।
કર્મવજ્રકુલે ઽપ્યેષ સર્વસિદ્ધિપ્રદાયકઃ ॥
તત્રેદં પદ્મકુલકર્મસિદ્ધિતન્ત્રં ।
ભયાત્મનામભયદો યથાવદ્વિનયસ્તથા ।
એતત્પદ્મકુલે કર્મ બુદ્ધસિદ્ધિપ્રદાયકં ॥
અથ મણિકુલકર્મસિદ્ધિતન્ત્રં ।
અભિષેકસ્તથા દાનં સર્વાશાપરિપૂરયઃ ।
બુદ્ધાનાં દેહિનાં ચૈવ કર્મ સર્વાર્થસાધકમ્ ॥ ઇતિ ॥
સર્વકુલકર્મસિદ્ધિવિધિવિસ્તરતન્ત્રં ॥
અથ વજ્રપાણિર્મહાબોધિસત્વઃ સર્વતથાગતકુલધર્મતામુદ્રાજ્ઞાનતન્ત્રમુદાજહાર ।
તત્રેદં તથાગતધર્મતાજ્ઞાનસિદ્ધિતન્ત્રં ભવતિ ।
વજ્રસત્વસમાધિસ્તુ બુદ્ધાનાં ધર્મતા સ્મૃતા ।
એતદ્બુદ્ધસ્ય બુદ્ધત્વં ન બુદ્ધો ભવતે ઽન્યતઃ ॥
તત્રેદં તથાગતકુલધર્મતાજ્ઞાનસિદ્ધિતન્ત્રં ।
ભાવયંસ્તુ મહામુદ્રાં સાધયેત્સર્વસિદ્ધયઃ ।
તથાગતકુલે ઽપ્યેષ ધર્મતોત્તમસિદ્ધિદા ॥
તત્રેદં વજ્રકુલધર્મતાજ્ઞાનસિદ્ધિતન્ત્રં ॥
બદ્ધાભિઃ સમયાગ્ર્યાભિઃ સર્વકર્માણિ સાધયેત્ ।
મહામુદ્રાપ્રયોગેણ વજ્રસિદ્ધિમવાપ્નુયાત્ ॥
તત્રેદં પદ્મકુલધર્મતાજ્ઞાનસિદ્ધિતન્ત્રં ।
ધર્મમુદ્રાપ્રયોગેણ ધર્મમુદ્રાઃ પ્રવર્તયેત્ ।
અનયા સાધયં ધર્માન્ ધર્મતાવજ્રધર્મિણઃ ॥
તત્રેદં મણિકુલધર્મતાજ્ઞાનસિદ્ધિતન્ત્રં ।
કર્મમુદ્રાપ્રયોગેણ કર્મવજ્રં હૃદિ સ્થિતં ।
ભાવયં ધર્મતામેતાવાપ્નોતિ સ્વકર્મતામ્ ॥ ઇતિ ॥
સર્વકુલધર્મતાજ્ઞાનસિદ્ધિતન્ત્રં ॥
અથ વજ્રપાણિર્મહાબોધિસત્વઃ સર્વતથાગતકુલજ્ઞાનસિદ્ધિતન્ત્રમુદાજહાર । તત્રેદં તથાગતજ્ઞાનસિદ્ધિતન્ત્રં ભવતિ ।
વજ્રસત્વસમાધિસ્થઃ ચન્દ્રવજ્રપ્રયોગતઃ ।
યથા વર્ણૌ તુ તૌ વેત્તિ તથા લોકં તુ વેત્તિ સઃ

શુદ્ધે શુદ્ધમિતિ જ્ઞેયં પાણ્ડરે તુ પ્રભાસ્વરં ।
રક્તે રક્તંતરે ક્રુદ્ધં યાદૃગ્વર્ણ તદાત્મકં