śāradāpañcaratnastutiḥ · Chapter 1

vidyāmudrākṣamālā'mṛtakalaśakarā koṭisūryaprakāśā
jāyā padmophbhavasya praṇatajanatateḥ sarvamiṣṭaṃ diśantī /
indropendrādivandyā tribhuvanajananī vāksavitrī śaraṇyā
seyaṃ śrīśāradāmbāṃ sakalasukhakarī maṅgalāni pradadyāt //
// iti dhyānam//
śrīmacchaṅkaradeśikendraracite tuṅgāpagātīrage
śṛṅgeryākhyapurasthite suvimale sanmaunisaṃsevite /
pīṭhe tāṃ ravikoṭidīptisahitāṃ rārājamānāṃ śivāṃ
rājīvākṣamukhāmarārcitapadāṃ vande sadā śāradām

pādānamrajanārtināśanipuṇāṃ nādānusandhāyinīṃ
vedāntapratipādyamānavibhavāṃ vādādiśaktipradām /
vidyākalpalatāṃ caturmukhamukhāmbhojātasūryāyitāṃ
vidyātīrthagurūttamairaharahaḥ saṃsevyamānāṃ bhaje

īṣatsmeramukhāmbujāṃ kucabharānamrāṃ trilokāvanīṃ
daityavrātavināśinīṃ kucajitaprāvṛṭpayodāṃ śivām /
saṃsārārṇavamagnadīnajanatāsantāpasannāśinīṃ
vande tāṃ śubhadāmananyaśaraṇaḥ svānte sadā śāradām

kāruṇyāmṛtavārirāśimaniśaṃ keyūrahārairvṛtāṃ
kāmāreḥ sahajāṃ karābjavilasatkīrāṃ kuberārcitām /
kāmakrodhamukhārivargaśamanīṃ kaivalyasampatpradāṃ
kañjodbhūtamanaḥ priyāṃ hṛdi bhaje bhaktyā sadā śāradām

nityā'nityavivekadānanipuṇāṃ stutyāṃ mukundādibhiḥ
yatyākāraśaśāṅkamaulivinutāṃ satyāpitasvāśravām /
natyā kevalameva tuṣṭahṛdayāṃ tyaktvā'nyadevānahaṃ
bhaktyā me hṛdayāmbuje'navarataṃ vande sadā śāradām