શારદાપઞ્ચરત્નસ્તુતિઃ · અધ્યાય 1

વિદ્યામુદ્રાક્ષમાલાઽમૃતકલશકરા કોટિસૂર્યપ્રકાશા
જાયા પદ્મોફ્ભવસ્ય પ્રણતજનતતેઃ સર્વમિષ્ટં દિશન્તી ।
ઇન્દ્રોપેન્દ્રાદિવન્દ્યા ત્રિભુવનજનની વાક્સવિત્રી શરણ્યા
સેયં શ્રીશારદામ્બાં સકલસુખકરી મઙ્ગલાનિ પ્રદદ્યાત્ ॥
॥ ઇતિ ધ્યાનમ્॥
શ્રીમચ્છઙ્કરદેશિકેન્દ્રરચિતે તુઙ્ગાપગાતીરગે
શૃઙ્ગેર્યાખ્યપુરસ્થિતે સુવિમલે સન્મૌનિસંસેવિતે ।
પીઠે તાં રવિકોટિદીપ્તિસહિતાં રારાજમાનાં શિવાં
રાજીવાક્ષમુખામરાર્ચિતપદાં વન્દે સદા શારદામ્

પાદાનમ્રજનાર્તિનાશનિપુણાં નાદાનુસન્ધાયિનીં
વેદાન્તપ્રતિપાદ્યમાનવિભવાં વાદાદિશક્તિપ્રદામ્ ।
વિદ્યાકલ્પલતાં ચતુર્મુખમુખામ્ભોજાતસૂર્યાયિતાં
વિદ્યાતીર્થગુરૂત્તમૈરહરહઃ સંસેવ્યમાનાં ભજે

ઈષત્સ્મેરમુખામ્બુજાં કુચભરાનમ્રાં ત્રિલોકાવનીં
દૈત્યવ્રાતવિનાશિનીં કુચજિતપ્રાવૃટ્પયોદાં શિવામ્ ।
સંસારાર્ણવમગ્નદીનજનતાસન્તાપસન્નાશિનીં
વન્દે તાં શુભદામનન્યશરણઃ સ્વાન્તે સદા શારદામ્

કારુણ્યામૃતવારિરાશિમનિશં કેયૂરહારૈર્વૃતાં
કામારેઃ સહજાં કરાબ્જવિલસત્કીરાં કુબેરાર્ચિતામ્ ।
કામક્રોધમુખારિવર્ગશમનીં કૈવલ્યસમ્પત્પ્રદાં
કઞ્જોદ્ભૂતમનઃ પ્રિયાં હૃદિ ભજે ભક્ત્યા સદા શારદામ્

નિત્યાઽનિત્યવિવેકદાનનિપુણાં સ્તુત્યાં મુકુન્દાદિભિઃ
યત્યાકારશશાઙ્કમૌલિવિનુતાં સત્યાપિતસ્વાશ્રવામ્ ।
નત્યા કેવલમેવ તુષ્ટહૃદયાં ત્યક્ત્વાઽન્યદેવાનહં
ભક્ત્યા મે હૃદયામ્બુજેઽનવરતં વન્દે સદા શારદામ્