śaṅkarācāryāṣṭottaraśatanāmastotram · Chapter 1

śrī śaṅkarācāryāṣṭottaraśatanāmastotram
śrīśaṅkarācāryavaryo brahmānandapradāyakaḥ /
ajñānatimirādityassujñānāmbudhicandramāḥ

varṇāśramapratiṣṭhātā śrīmānmuktipradāyakaḥ /
śiṣyopadeśanirato bhaktābhīṣṭapradāyakaḥ

sūkṣmatattvarahasyajñaḥ kāryākāryaprabodhakaḥ /
jñānamudrāñcitakaraś-śiṣyahṛttāpahārakaḥ

parivrājāśramoddhartā sarvatantrasvatantradhīḥ /
advaitasthāpanācāryassākṣācchaṅkararūpabhṛt

ṣanmatasthāpanācāryastrayīmārga prakāśakaḥ /
vedavedāntatattvajño durvādimatakhaṇḍanaḥ

vairāgyanirataśśāntassaṃsārārṇavatārakaḥ /
prasannavadanāmbhojaḥ paramārthaprakāśakaḥ

purāṇasmṛtisārajño nityatṛpto mahāñchuciḥ /
nityānando nirātaṃko nissaṃgo nirmalātmakaḥ

nirmamo nirahaṅkāro viśvavandyapadāmbujaḥ /
sattvapradhānassadbhāvassaṅkhyātītaguṇojjvalaḥ

anaghassārahṛdayassudhīsārasvatapradaḥ /
satyātmā puṇyaśīlaśca sāṅkhyayogavilakṣaṇaḥ

taporāśir mahātejo guṇatrayavibhāgavit /
kalighnaḥ kālakarmajñastamoguṇanivārakaḥ

bhagavānbhāratījetā śāradāhvānapaṇditaḥ /
dharmādharmavibhāvajño lakṣyabhedapradarśakaḥ

nādabindukalābhijño yogihṛtpadmabhāskaraḥ /
atīndriyajñānanidhirnityānityavivekavān

cidānandaścinmayātmā parkāyapraveśakṛt /
amānuṣacaritrāḍhyaḥ kṣemadāyī kṣamākaraḥ

bhavyo bhadraprado bhūri mahimā viśvarañjakaḥ /
svaprakāśassadādhāro viśvabandhuśśubhodayaḥ

viśālakīrtirvāgīśassarvalokahitotsukaḥ /
kailāsayātrasaṃprāpta candramauliprapūjakaḥ

kāṃcyāṃ śrīcakra rājakhya yantra sthāpana dīkṣitaḥ /
śrīcakrātmaka tāṭaṅka toṣitāmbā manorathaḥ

brahmasūtropaniṣadbhāṣyādigranthakalpakaḥ /
caturdikcaturāmnāyapratiṣṭhātā mahāmatiḥ

dvisaptati matocchettā sarvadigvijayaprabhuḥ /
kāṣāyavasanopeto bhasmoddhūḻitavigrahaḥ

jñānatmakaikadaṇḍāḍhyaḥ kamaṇḍalulasatkaraḥ /
gurubhūmaṇḍalācāryo bhagavatpādasaṃjñakaḥ

vyāsasaṃdarśanaprītaḥ ṛṣyaśṛṅgapureśvaraḥ /
saundaryalaharī mukhya bahustotra vidhāyakaḥ

catuṣṣaṣṭikalābhijño brahmarākṣasapoṣakaḥ /
śrīmanmaṇḍanamiśrākhyasvaṃbhūjayasannutaḥ

toṭakācāryasampūjya padmapādarcitāṅghrikaḥ /
hastāmalayogindra brahmajñānapradāyakaḥ

sureśvarākhya sacchiṣya sanyāsāśrama dāyakaḥ /
nṛsiṃhabhaktassadratnagarbhaherambapūjakaḥ

vyākhyasiṃhāsanādhīśo jagatpūjyo jagadguruḥ /
iti śrīmacchaṅkarācāryasarvalokaguroḥ param

nāmnāmaṣṭottaraśataṃ bhuktimuktiphalapradaṃ /
trisandhyaṃ yaḥ paṭhedbhaktyā sarvānkāmānavāpnuyāt //
// iti śrīmacchaṅkarācāryāṣṭottaraśatanāmastotram /