śaṃkarastotram · Chapter 1

namastubhyaṃ bhagavate śaṃkarāya mahātmane/ jagadutpattivināśānāṃ hetave mokṣahetave

sarvadevādhidevāya pārvatīpataye namaḥ/ ṛṣiyogimunīndrāṇāṃ tvameva paramā gatiḥ

brahmāṃḍagolake deva dayālūnāṃ tvamagraṇīḥ/ ata evolbaṇaṃ pītaṃ tvayā hālāhalaṃ viṣam

gaṃgādhara mahādeva candrālaṃkṛtamastaka/ parameśvara māṃ pāhi bhayaṃ vāraya vāraya

sarvapāpaṃ praśamaya sarvatāpaṃ nivāraya/ duḥkhaṃ hara harāśeṣaṃ mṛtyuṃ vidrāvaya drutam

stutiṃ kartuṃ na me śaktistava vāggatyagocara/ dehi satsaṃgatiṃ bhaktiṃ niścalāṃ tvayi śaṃkara

sarvāriṣṭaṃ parihara sarvaśatrūnvināśaya/ dāridryaṃ hara sarveśa sarvānkāmān prapūraya

mukhe nāma dṛśo rūpaṃ hṛdaye tvatpadāmbujam/ mamāstu te namaḥ sāṃba prasanno bhava sarvadā

tvadarcanavidhiṃ jāne na bhaktistvayi me hṛdi/ athāpyanugrahāṇeśa kevalaṃ dayayoddhara

iti śrī pa. pa. śrīvāsudevānandasarasvatīviracitaṃ śaṃkarastotraṃ saṃpūrṇam//