Rig Veda · Chapter 3.015

vi pājasā pṛthunā śośucāno bādhasva dviṣo rakṣaso amīvāḥ |
suśarmaṇo bṛhataḥ śarmaṇi syām agner ahaṁ suhavasya praṇītau ||

tvaṁ no asyā uṣaso vyuṣṭau tvaṁ sūra udite bodhi gopāḥ |
janmeva nityaṁ tanayaṁ juṣasva stomam me agne tanvā sujāta ||

tvaṁ nṛcakṣā vṛṣabhānu pūrvīḥ kṛṣṇāsv agne aruṣo vi bhāhi |
vaso neṣi ca parṣi cāty aṁhaḥ kṛdhī no rāya uśijo yaviṣṭha ||

aṣāḻho agne vṛṣabho didīhi puro viśvāḥ saubhagā saṁjigīvān |
yajñasya netā prathamasya pāyor jātavedo bṛhataḥ supraṇīte ||

acchidrā śarma jaritaḥ purūṇi devām̐ acchā dīdyānaḥ sumedhāḥ |
ratho na sasnir abhi vakṣi vājam agne tvaṁ rodasī naḥ sumeke ||

pra pīpaya vṛṣabha jinva vājān agne tvaṁ rodasī naḥ sudoghe |
devebhir deva surucā rucāno mā no martasya durmatiḥ pari ṣṭhāt ||

iḻām agne purudaṁsaṁ saniṁ goḥ śaśvattamaṁ havamānāya sādha |
syān naḥ sūnus tanayo vijāvāgne sā te sumatir bhūtv asme ||