Rig Veda · Chapter 1.081

indro madāya vāvṛdhe śavase vṛtrahā nṛbhiḥ |
tam in mahatsv ājiṣūtem arbhe havāmahe sa vājeṣu pra no 'viṣat ||

asi hi vīra senyo 'si bhūri parādadiḥ |
asi dabhrasya cid vṛdho yajamānāya śikṣasi sunvate bhūri te vasu ||

yad udīrata ājayo dhṛṣṇave dhīyate dhanā |
yukṣvā madacyutā harī kaṁ hanaḥ kaṁ vasau dadho 'smām̐ indra vasau dadhaḥ ||

kratvā mahām̐ anuṣvadham bhīma ā vāvṛdhe śavaḥ |
śriya ṛṣva upākayor ni śiprī harivān dadhe hastayor vajram āyasam ||

ā paprau pārthivaṁ rajo badbadhe rocanā divi |
na tvāvām̐ indra kaś cana na jāto na janiṣyate 'ti viśvaṁ vavakṣitha ||

yo aryo martabhojanam parādadāti dāśuṣe |
indro asmabhyaṁ śikṣatu vi bhajā bhūri te vasu bhakṣīya tava rādhasaḥ ||

made-made hi no dadir yūthā gavām ṛjukratuḥ |
saṁ gṛbhāya purū śatobhayāhastyā vasu śiśīhi rāya ā bhara ||

mādayasva sute sacā śavase śūra rādhase |
vidmā hi tvā purūvasum upa kāmān sasṛjmahe 'thā no 'vitā bhava ||

ete ta indra jantavo viśvam puṣyanti vāryam |
antar hi khyo janānām aryo vedo adāśuṣāṁ teṣāṁ no veda ā bhara ||