Ṛgvedasaṃhitā, Padapāṭha · Chapter 8.93

//20//.
-RV_6:6/21-
(RV_8,93)
ut | gha | it | abhi | śruta-magham | vṛṣabham | narya-apasam | astāram | eṣi | sūyar

nava | yaḥ | navatim | puraḥ | bibheda | bāhu-ojasā | ahim | ca | vṛtra-hā | avadhīt

saḥ | naḥ | indraḥ | śivaḥ | sakhā | aśva-vat | go--mat | yava-mat | urudhārāiva | dohate

yat | adya | kat | ca | vṛtra-han | ut-agāḥ | abhi | sūrya | sarvam | tat | indra | te | vaśe

yat | vā | pra-vṛddha | sat-pate | na | marai | iti | manyase | uto iti | tat | satyam | it | tava

//21//.
-RV_6:6/22-
ye | somāsaḥ | parāvati | ye | arvāvati | sunvire | sarvān | tān | indra | gacchasi

tam | indram | vājayāmasi | mahe | vṛtrāya | hantave | saḥ | vṛṣā | vṛṣabhaḥ | bhuvat

indraḥ | saḥ | dāmane | kṛtaḥ | ojiṣṭhaḥ | saḥ | made | hitaḥ | dyumnī | ślokī | saḥ | somyaḥ

girā | vajraḥ | na | sam-bhṛtaḥ | sa-balaḥ | anapa-cyutaḥ | vavakṣe | ṛṣvaḥ | astṛtaḥ

duḥ-ge | cit | naḥ | su-gam | kṛdhi | gṛṇānaḥ | indra | girvaṇaḥ | tvam | ca | magha-van | vaśaḥ

//22//.
-RV_6:6/23-
yasya | te | nu | cit | ādiśam | na | minanti | sva-rājyam | na | devaḥ | na | adhri-guḥ | janaḥ

adha | te | aprati-skutam | devī iti | śuṣmam | saparyataḥ | ubhe iti | su-śipra | rodasiiti

tvam | etat | adhārayaḥ | kṛṣṇāsu | rohiṇīṣu | ca | paruṣṇīṣu | ruśat | payaḥ

vi | yat | ahe | adha | tviṣaḥ | viśve | devāsaḥ | akramuḥ | vidat | mṛgasya | tān | amaḥ

āt | oṃ iti | me | ni-varaḥ | bhuvat | vṛtra-hā | adiṣṭa | paiṃsyam | ajāta-śatruḥ | astṛtaḥ

//23//.
-RV_6:6/24-
śrutam | vaḥ | vṛtrahan-tamam pra śardhañ carṣaṇīnām | ā śuṣerādhase mahe

ayā | dhiyā | ca | gavya-yā | puru-nāman | puru-stuta | yat | some--some | ā | abhavaḥ

bodhit-manāḥ | it | astu | naḥ | vṛtra-hā | bhūri-āsutiḥ | śṛṇotu | śukraḥ | āśiṣam

kayā | tvam | naḥ | ūtyā | abhi | pra | mandase | vṛṣan | kayā | stotṛ-bhyaḥ | ā | bhara

kasya | vṛṣā | sute | sacā | niyutvān | vṛṣabhaḥ | raṇat | vṛtra-hā | soma-pītaye

//24//.
-RV_6:6/25-
abhi | su | naḥ | tvam | rayim | mandasānaḥ | sahasriṇam | pra-yantā | bodhi | dāśuṣe

patnī-vantaḥ | sutāḥ | ime | uśantaḥ | yanti | vītaye | apām | jagmiḥ | ni-cumpuṇaḥ

iṣṭāḥ | hotrāḥ | asṛkṣata | indram | vṛdhāsaḥ | adhvare | accha | ava-bhṛtham | ojasā

iha | tyā | sadha-mādyā | harī iti | hiraṇya-keśyā | voḷhām | abhi | prayaḥ | hitam

tubhyam | somāḥ | sutāḥ | ime | stīrṇam | barhiḥ | vibhāvaso itivibhāvaso | stotṛ-bhyaḥ | indram | ā | vaha

//25//.
-RV_6:6/26-
ā | te | dakṣam | vi | rocanā | dadhat | ratnā | vi | dāśuṣe | stotṛ-bhyaḥ | indram | arcata

ā | te | dadhāmi | indriyam | ukthā | viśvā | śatakrato itiśata-krato | stotṛ-bhyaḥ | indra | mṛḷaya

bhadram-bhadram | naḥ | ā | bhara | iṣam | ūrjam | śatakrato itiśata-krato | yat | indra | mṛḷayāsi | naḥ

saḥ | naḥ | viśvāni | ā | bhara | suvitāni | śatakrato itiśata-krato | yat | indra | mṛḷayāsi | naḥ

tvām | it | vṛtrahan-tama | suta-vantaḥ | havāmahe | yat | indra | mṛḷayāsi | naḥ

//26//.
-RV_6:6/27-
upa | naḥ | hari-bhiḥ | sutam | yāhi | madānām | pate | upa | naḥ | hari-bhiḥ | sutam

dvitā | yaḥ | vṛtrahan-tamaḥ | vide | indraḥ | śata-kratuḥ | upa | naḥ | hari-bhiḥ | sutam

tvam | hi | vṛtra-han | eṣām | pātā | somānām | asi | upa | naḥ | hari-bhiḥ | sutam

indraḥ | iṣe | dadātu | naḥ | ṛbhukṣaṇam | ṛbhum | rayim | vājī | dadātu | vājinam