Revākhāṇḍa (revised text) · Chapter 63
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe karoḍīśvaratīrthamāhātmyavarṇanaṃ nāma dviṣaṣṭitamo 'dhyāyaḥ||
RKV adhyāya 63
śrīmārkaṇḍeya uvāca:
tato gacchet tu rājendra kumāreśvaram uttamam /
prasiddhaṃ sarvatīrthānām agastyeśvarasannidhau
ṣaṇmukhena purā tāta sarvapātakanāśanam /
ārādhya parayā bhaktyā siddhiḥ prāptā narādhipa
devasainyādhipo jātaḥ sarvaśatrunibarhaṇaḥ /
ugratejā mahātmāsau saṃjātastīrthasevanāt
tadāprabhṛti tattīrthaṃ saṃjātaṃnarmadātaṭe /
tatra tīrthe tu yo gatvā ekacitto jitendriyaḥ
kārttikasya caturdaśyāmaṣṭamyāṃ ca viśeṣataḥ /
snāpayed girijānāthaṃ dadhidugdhena sarpiṣā
gītaṃ tatra prakartavyaṃ piṇḍadānaṃ yathāvidhi /
brāhmaṇaiḥ śrotriyaiḥ pārtha ṣaṭkarmanirataiḥ śubhaiḥ
yatkiṃciddīyate tatra akṣayaṃ pāṇḍunandana /
sarvatīrthamayaṃ tīrtha nirmitaṃ śikhinā nṛpa
etatte sarvamākhyātaṃ kumāreśvarajaṃ phalam /
kumāradarśanātpuṇyaṃ prāpyate pāṇḍunandana
mṛtaḥ svargamavāpnoti satyamīśvarabhāṣitam
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0