Revākhāṇḍa (revised text) · Chapter 58

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe vyādhasvargagamanavarṇanaṃ nāma saptapañcāśattamo 'dhyāyaḥ ||
RKV adhyāya 58
uttānapāda uvāca:
athāto devadeveśa bhānumatyakarocca kim /
eṣa me saṃśayo deva kathayasva prasādataḥ

īśvara uvāca:
cintayitvā muhūrtaṃ sā gatā kuṇḍasya sannidhau /
dṛṣṭvā kuṇḍasya māhātmyaṃ rājñī harṣeṇa pūritā

viprān bahūn samāhūya pūjayāmāsa tatkṣaṇāt /
dattvā tu vidhivaddānaṃ brāhmaṇebhyo nṛpātmaja

niścayaṃ paramaṃ kṛtvā sthitā śāntena cetasā /
tataḥ sampūjya vidhivatpitḥndevān narādhipa

kṣapayitvā pakṣamekaṃ madhumāsasya sā sthitā /
amāvāsyāṃ tato rājñī gatā parvatasannidhau

nagaśṛṅgaṃ samāruhya kṛtvā mukulitau karau /
vijñāpya brāhmaṇān sarvān idaṃ vacanam abravīt

mama mātā pitā bhrātā ye cānye sakhibāndhavāḥ /
kṣamāpayitvā sarvāṃstānvacanaṃ mama kathyatām

tvatputrī śūlabhede tu tapaḥ kṛtvā svaśaktitaḥ /
visṛjya caiva sātmānaṃ tasmiṃstīrthe divaṃ yayau

brāhmaṇā ūcuḥ /
saṃdeśaṃ kathayiṣyāmastvayoktaṃ śobhanavrate /
mātāpitṛbhyāṃ suśroṇi mā te 'bhūdatra saṃśayaḥ

tato visṛjya tāṃllokān sthitā parvatamūrdhani /
ardhottarīyavastreṇa gāḍhaṃ baddhā punaḥpunaḥ

tataścikṣepa sātmānam ekacittā narādhipa /
nagārddhe patitā yāvattāvaddṛṣṭāḥ surāṅganāḥ

bhobho vatse mahābhāge bhānumatyatitāpasi /
divyaṃ vimānamāruhya kailāsaṃ prati gamyatām

tataḥ sā paśyatāṃ teṣāṃ janānāṃ tridivaṃ gatā

mārkaṇḍeya uvāca:
iti te kathitaḥ sarvaḥ śūlabhedasya vistaraḥ /
yaḥ śrutaḥ śaṅkarātpūrvamṛṣidevasamāgame

ya idaṃ paṭhate bhaktyā tīrthe devakule 'pi vā /
sa mucyate mahāpāpādapi janmaśatārjitāt

brahmahā ca surāpī ca steyī ca gurutalpagaḥ /
goghātī strīvighātī ca devabrahmasvahārakaḥ

svāmidrohī mitraghātī tathā viśvāsaghātakaḥ /
paranyāsāpahārī ca paranikṣepalopakaḥ

rasabhedī tulābhedī tathā vārddhuṣikastu yaḥ /
yaḥ kanyāvighnakartā ca tathā vikrayakārakaḥ

parabhāryā bhrātṛbhāryā gauḥ snuṣā kanyakā tathā /
abhigāmī paradveṣī tathā dharmapradūṣakaḥ

mucyante sarve evaite śūlabhedaprabhāvataḥ

ya idaṃ śrāvayecchrāddhe viprāṇāṃ bhuñjatāṃ nṛpa /
mudaṃ prayānti saṃhṛṣṭāḥ pitarastasya sarvaśaḥ

yaścedaṃ śṛṇuyādbhaktyā paṭhyamānaṃ naro vaśī /
sa muktaḥ sarvapāpebhyaḥ sarvakalyāṇabhāg bhavet

idaṃ yaśasyamāyuṣyamidaṃ pāvanamuttamam /
paṭhatāṃ śṛṇvatāṃ nṛṇām āyuḥkīrtivivardhanam

iti kathitamidaṃ te śūlabhedasya puṇyaṃ mahimana hi manuṣyaiḥ śrūyate yatsapāpaiḥ /
madanariputaṭinyā yāmyakūlasthitasya prabaladuritakandocchedakuddālakalpam