Revākhāṇḍa (revised text) · Chapter 23
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe narmadāmāhātmye viśalyāsambhavo nāma dvāviṃśo 'dhyāyaḥ ||
RKV adhyāya 23
mārkaṇḍeya uvāca:
tatraiva saṅgame rājanbhaktyā paramayā nṛpa /
prāṇāṃstyajanti ye martyāste yānti paramāṃ gatim
saṃnyastasarvasaṃkalpo yastu prāṇānparityajet /
amareśvaramāsādya sa svarge niyataṃ vaset
śailendraṃ yaḥ samāsādya ātmānaṃ muñcate naraḥ /
vimānenārkavarṇena sa gacchedamarāvatīm
naraṃ patantamālokya nagād amarakaṇṭakāt /
bruvantyapsarasaḥ sarvā mama bhartā bhavediti
samaṃ jalaṃ dharmavido vadanti sārasvataṃ gāṅgamiti prabuddhāḥ /
tasyopariṣṭāt pravadanti tajjñā revājalaṃ nātra vicāraṇāsti
anekavidyādharakinnarādyair adhyāsitaṃ puṇyatamādhivāsaiḥ /
revājalaṃ dhārayato hi mūrdhnā sthānaṃ surendrādhipateḥ samīpe
narmadā sarvadā sevyā bahunoktena kiṃ nṛpa /
yadīcchenna punardraṣṭuṃ ghoraṃ saṃsārasāgaram
trayāṇāmapi lokānāṃ mahatī pāvanī smṛtā /
yatra tatra mṛtasyāpi dhruvaṃ gāṇeśvarī gatiḥ
anekayajñāyatanair vṛtāṅgī na hyatra kiṃcidyadatīrthamasti /
tasyāstu tīre bhavatā yaduktaṃ tapasvino vāpyatapasvino vā
mriyanti ye pāpakṛto manuṣyāste svargamāyānti yathā 'marendrāḥ
evaṃ tu kapilā caiva viśalyā rājasattama /
īśvareṇa purā sṛṣṭā lokānāṃ hitakāmyayā
tatra snātvā naro rājansopavāso jitendriyaḥ /
aśvamedhasya mahato 'saṃśayaṃ phalamāpnuyāt
anāśakaṃ ca yaḥ kuryāt tasmiṃstīrthe narādhipa /
sarvapāpavinirmukto yāti vai śivamandiram
pṛthivyāṃ sāgarāntāyāṃ snānadānena yatphalam /
viśalyāsaṅgame snātvā sakṛttatphalamaśnute
evaṃ puṇyā pavitrā ca kathitā tava bhūpate /
bhūyo māṃ pṛcchasi ca yattaccaiva kathayāmyaham
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0