Revākhāṇḍa (revised text) · Chapter 208
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe suvarṇabindutīrthamāhātmyavarṇanaṃ nāma saptādhikadviśatatamo 'dhyāyaḥ ||
RKV adhyāya 208
śrīmārkaṇḍeya uvāca:
bhūmipāla tato gacchettīrthaṃ paramaśobhanam /
vikhyātaṃ triṣu lokeṣu pitḥṇām ṛṇamocanam
tatra snātvā vidhānena saṃtarpya pitṛdevatāḥ /
manuṣyaśca nṛpaśreṣṭha dānaṃ dattvānṛṇo bhavet
icchanti pitaraḥ sarve svārthahetoḥ sutaṃ yataḥ /
punnāmno narakātputro 'smānayaṃ mocayiṣyati
piṇḍadānaṃ jalaṃ tāta ṛṇamuttamamucyate /
pitḥṇāṃ taddhi vai proktamṛṇaṃ daivamataḥ param
agnihotraṃ tathā yajñāḥ paśubandhāstatheṣṭayaḥ /
iti devarṇaṃ proktaṃ śṛṇu mānuṣyakaṃ tataḥ
brāhmaṇeṣu ca tīrtheṣu devāyatanakarmasu /
pratiśrutya dadettattadvyavahāraḥ kṛto yathā
ṛṇatrayamidaṃ proktaṃ putrāṇāṃ dharmanandana /
satputrāste tu rājendra snātā ya ṛṇamocane
ṛṇatrayādvimucyante hyaputrāḥ putriṇastathā /
tasmāttīrthavaraṃ prāpya putreṇa niyatātmanā /
pitṛbhyastarpaṇaṃ kāryaṃ piṇḍadānaṃ viśeṣataḥ
tatra tīrthe hutaṃ dattaṃ guravastoṣitā yadi /
mṛtānāṃ sapta janmāni phalamakṣayamaśnute
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0