Revākhāṇḍa (revised text) · Chapter 153

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe bhārgaleśvaratīrthamāhātmyavarṇanaṃ nāma dvipañcāśadadhikaśatatamo 'dhyāyaḥ ||
RKV adhyāya 153
mārkaṇḍeya uvāca:
tasyaivānantaraṃ cānyadravitīrthamanuttamam /
yasya saṃdarśanādeva mucyante pātakairnarāḥ

ravitīrthe tu yaḥ snātvā naraḥ paśyati bhāskaram /
tasya yatphalamuddiṣṭaṃ svayaṃ devena tacchṛṇu

nāndho na mūko badhiraḥ kule bhavati kaścana /
kurūpaḥ kunakhī vāpi tasya janmāni ṣoḍaśa

dadrucitrakakuṣṭhāni maṇḍalāni vicarcikā /
naśyanti devabhaktasya ṣaṇmāsānnātra saṃśayaḥ

caritaṃ tasya devasya purāṇe yacchrutaṃ mayā /
na tatkathayituṃ śakyaṃ saṃkṣepeṇa nṛpottama

tatra tīrthe tu yaddānaṃ ravimuddiśya dīyate /
vidhinā pātraviprāya tasyānto nāsti karhicit

ayane viṣuve caiva candrasūryagrahe tathā /
ravitīrthe pradattānāṃ dānānāṃ phalamuttamam

saṃkrāntau yāni dānāni havyakavyāni bhārata /
apāmiva samudrasya teṣāmanto na labhyate

yena yena yadā dattaṃ yena yena yadā hutam /
tasya tasya tadā kāle savitā pratidāyakaḥ

sapta janmāni tānyeva dadātyarkaḥ punaḥ punaḥ /
śatamindukṣaye dānaṃ sahasraṃ tu dinakṣaye

saṃkrāntau śatasāhasraṃ vyatīpāte tvanantakam

yudhiṣṭhira uvāca:
ravitīrthaṃ kathaṃ tāta puṇyātpuṇyataraṃ smṛtam /
vistareṇa mamākhyāhi śravaṇau mama lampaṭau

śrīmārkaṇḍeya uvāca:
śṛṇuṣvāvahito bhūtvā hyādityeśvaramuttamam /
uttare narmadākūle sarvavyādhivināśanam

purā kṛtayugasyādau jābālirbrāhmaṇo 'bhavat /
vasiṣṭhānvayasambhūto vedaśāstrārthapāragaḥ

pativratā sādhuśīlā tasya bhāryā manasvinī /
ṛtukāle tu sā gatvā bhartāram idam abravīt

vartate ṛtukālo me bhartāraṃ tvāmupasthitā /
bhaja māṃ prītisaṃyuktaḥ putrakāmāṃ tu kāminīm

evamukto dvijaḥ prāha priye 'dyāhaṃ vratānvitaḥ /
gacchedānīṃ varārohe dāsya ṛtvantare punaḥ

punardvitīye samprāpte ṛtukāle 'pyupasthitā /
punaḥ sā chanditā tena vratastho 'dyeti bhārata

itthaṃ vā bahuśastena chanditā ca punaḥ punaḥ /
nirāśā cābhavattatra bhartāraṃ prati bhāminī

duḥkhena mahatāviṣṭā vidhāyānaśanaṃ mṛtā /
tena bhrūṇahatenaiva pāpena sahasā dvijaḥ

śīrṇaghrāṇāṅghrirabhavattapaḥ sarvaṃ nanāśa ca /
dṛṣṭvātmānaṃ sa kuṣṭhena vyāptaṃ brāhmaṇasattamaḥ

viṣādaṃ paramaṃ gatvā narmadātaṭamāśritaḥ /
apṛcchadbhāskaraṃ tīrthaṃ dvijebhyo dvijasattamaḥ

ārogyaṃ bhāskarādicchediti saṃcintya cetasi /
kutastadbhāskaraṃ tīrthaṃ bho dvijāḥ kathyatāṃ mama

tapas tapyāmyahaṃ gatvā tasmiṃstīrthe subhāvitaḥ

dvijā ūcuḥ /
revāyā uttare kūle ādityeśvaranāmataḥ /
vidyate bhāskaraṃ tīrthaṃ sarvavyādhivināśanam

tatra yāhyavicāreṇa gantuṃ cecchakyate tvayā /
evamukto dvijairvipro gantuṃ tatra pracakrame

vyādhinā paribhūtastu ghoreṇa prāṇahāriṇā /
yadā gantuṃ na śaknoti tadā tena vicintitam

sāmarthyaṃ brāhmaṇānāṃ hi vidyate bhuvanatraye /
liṅgapātaḥ kṛto viprairdevadevasya śūlinaḥ

samudraḥ śoṣito viprairvindhyaścāpi nivāritaḥ /
ahamapyatra saṃsthastu hyānayiṣyāmi bhāskaram

tapobalena mahatā hyādityeśvarasaṃjñitam /
iti niścitya manasā hyugre tapasi saṃsthitaḥ

vāyubhakṣo nirāhāro grīṣme pañcāgnimadhyagaḥ /
śiśire toyamadhyastho varṣāsvaprāvṛtākṛtiḥ

sāgre varṣaśate pūrṇe ravistuṣṭo 'bravīd idam

sūrya uvāca:
varaṃ varaya bhadraṃ te kiṃ te manasi vāñchitam /
adeyamapi dāsyāmi brūhi māṃ tvaṃ ciraṃ kṛthāḥ

kimasādhyaṃ hi te vipra idānīṃ tapasi sthitaḥ

jābāliruvāca:
yadi tuṣṭo 'si deveśa yadi deyo varo mama /
mama pratijñā deveśa hyādityeśvaradarśane

kṛtā tāṃ pārituṃ deva na śakto vyādhinā vṛtaḥ /
śuklatīrthe 'tra tiṣṭha tvam ādityeśvaramūrtidhṛk

evamukte tu deveśo bahurūpo divākaraḥ /
uttare narmadākūle kṣaṇādeva vyadṛśyata

tadāprabhṛti bhūpāla taddhi tīrthaṃ pracakṣate /
sarvapāpaharaṃ proktaṃ sarvaduḥkhavināśanam

yastu saṃvatsaraṃ pūrṇaṃ nityam ādityavāsare /
snātvā pradakṣiṇāḥ sapta dattvā paśyati bhāskaram

yatphalaṃ labhate tena tacchṛṇuṣva mayoditam /
prasuptaṃ maṇḍalānīha dadrukuṣṭhavicarcikāḥ

naśyanti satvaraṃ rājaṃstūlarāśirivānale /
dhanaputrakalatrāṇāṃ pūrayedvatsaratrayāt

yastu śrāddhapradastatra pitḥnuddiśya saṃkrame /
tṛpyanti pitarastasya pitṛdevo hi bhāskaraḥ

iti te kathitaṃ sarvamādityeśvaramuttamam /
sarvapāpaharaṃ divyaṃ sarvarogavināśanam