Revākhāṇḍa (revised text) · Chapter 151

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe kusumeśvaratīrthamāhātmyavarṇanaṃ nāma pañcāśadadhikaśatatamo 'dhyāyaḥ ||
RKV adhyāya 151
śrīmārkaṇḍeya uvāca:
uttare narmadākūle tīrthaṃ paramaśobhanam /
jayavārāhamāhātmyaṃ sarvapāpapraṇāśanam

uddhṛtā jagatī yena sarvadevanamaskṛtā /
lokānugrahabuddhyā ca saṃsthito narmadātaṭe

tatra tīrthe tu yaḥ snātvā vīkṣate madhusūdanam /
mucyate sarvapāpebhyo daśajanmānukīrtanāt

matsyaḥ kūrmo varāhaśca narasiṃho 'tha vāmanaḥ /
rāmo rāmaśca kṛṣṇaśca buddhaḥ kalkiśca te daśa

yudhiṣṭhira uvāca:
matsyena kiṃ kṛtaṃ tāta kūrmeṇa munisattama /
varāheṇa ca kiṃ karma narasiṃhena kiṃ kṛtam

vāmanena ca rāmeṇa rāghaveṇa ca kiṃ kṛtam /
buddharūpeṇa kiṃ vāpi kalkinā kiṃ kṛtaṃ vada

evamuktastu viprendro dharmaputreṇa dhīmatā /
uvāca madhurāṃ vāṇīṃ tadā dharmasutaṃ prati

śrīmārkaṇḍeya uvāca:
mīno bhūtvā purā kalpe prītyarthaṃ brahmaṇo vibhuḥ /
samarpayatsamuddhṛtya vandānmagnānmahārṇave

amṛtotpādane rājankūrmo bhūtvā jagadguruḥ /
mandaraṃ dhārayāmāsa tathā devīṃ vasuṃdharām

ujjahāra dharāṃ magnāṃ pātālatalavāsinīm /
vārāhaṃ rūpamāsthāya devadevo janārdanaḥ

narasyārddhatanuṃ kṛtvā siṃhasyārddhatanuṃ tathā /
hiraṇyakaśiporvakṣo vidadāra nakhāṅkuśaiḥ

jaṭī vāmanarūpeṇa stūyamāno dvijottamaiḥ /
taddivyaṃ rūpamāsthāya kramitvā medinīṃ kramaiḥ

kṛtavāṃśca baliṃ paścāt pātālatalavāsinam /
sthāpayitvā surān sarvān gato viṣṇuḥ svakaṃ puram

jamadagnisuto rāmo bhūtvā śastrabhṛtāṃ varaḥ /
kṣatriyān pṛthivīpālān avadhīddhaihayādikān

kaśyapāya mahīṃ dattvā saparvatavanākarām /
tapastapati deveśo mahendre 'dyāpi bhārata

tato dāśarathī rāmo rāvaṇaṃ devakaṇṭakam /
sagaṇaṃ samare hatvā rājyaṃ dattvā vibhīṣaṇe

pālayitvā nayādbhūmiṃ makhaiḥ saṃtarpya devatāḥ /
svargaṃ gato mahātejā rāmo rājīvalocanaḥ

vasudevagṛhe bhūyaḥ saṃkarṣaṇasahāyavān /
avatīrṇo jagannātho vāsudevo yudhiṣṭhira

so 'vadhīttava sāmarthyādvadhārthaṃ duṣṭabhūbhṛtām /
cāṇūrakaṃsakeśīnāṃ jarāsaṃdhasya bhārata

tena tvaṃ susahāyena hatvā śatrūnnareśvara /
bhokṣyase pṛthivīṃ sarvāṃ bhrātṛbhiḥ saha saṃbhṛtām

tathā buddhatvamaparaṃ navamaṃ prāpsyate 'cyutaḥ /
śāntimāndevadeveśo madhuhantā madhupriyaḥ

tena buddhasvarūpeṇa devena parameṣṭhinā /
bhaviṣyati jagatsarvaṃ mohitaṃ sacarācaram

na śroṣyanti pituḥ putrāstadāprabhṛti bhārata /
na gurorbāndhavāḥ śiṣyā bhaviṣyatyadharottaram

jito dharmo hyadharmeṇa cāsatyena ṛtaṃ jitam /
jitāścauraiśca rājānaḥ strībhiśca puruṣā jitāḥ

sīdanti cāgnihotrāṇi gurau pūjā praṇaśyati /
sīdanti mānavā dharmāḥ kalau prāpte yudhiṣṭhira

dvādaśe daśame varṣe nārī garbhavatī bhavet /
kanyāstatra prasūyante brāhmaṇo haripiṅgalaḥ

bhaviṣyati tataḥ kalkirdaśame janmani prabhuḥ

etat te kathitaṃ rājandevasya parameṣṭhinaḥ /
kāraṇaṃ daśa janmanāṃ sarvapāpakṣayaṃkaram