Revākhāṇḍa (revised text) · Chapter 143

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe rukmiṇītīrthamāhātmyavarṇanaṃ nāma dvicatvāriṃśadadhikaśatatamo 'dhyāyaḥ ||
RKV adhyāya 143
śrīmārkaṇḍeya uvāca:
tato gacchenmahārāja yojaneśvaram uttamam /
yatra siddhau purā kalpe naranārāyaṇāvṛṣī

tatra tīrthe tapastaptvā saṅgrāme devadānavaiḥ /
jayaṃ prāptau mahātmānau naranārāyaṇāvubhau

punastretāyuge prāpte tau devau rāmalakṣmaṇau /
tatra tīrthe punaḥ snātvā rāvaṇo durjayo hataḥ

punaḥ pārtha kalau prāpte tau devau balakeśavau /
vasudevakule jātau duṣkaraṃ karma cakratuḥ

narakaṃ kālanemiṃ ca kaṃsaṃ cāṇūramuṣṭikau /
śiśupālaṃ jarāsaṃdhaṃ jaghnatur balakeśavau

tatastatra ripūnsaṃkhye bhīṣmadroṇapuraḥsarān /
karṇaduryodhanādīṃśca nihaniṣyati sa prabhuḥ

dharmakṣetre kurukṣetre tatra yudhyanti te kṣaṇam /
bhīmārjunanimittena śiṣyau kṛtvā parasparam

tatra tīrthe punargatvā tapaḥ kṛtvā suduṣkaram /
pūjayitvā dvijānbhaktyā yāsyete dvārakāṃ punaḥ

tatra tīrthe tu yaḥ snātvā pūjayed balakeśavau /
tena devo jagaddhātā pūjitastriguṇātmavān

upavāsī naro bhūtvā yastu kuryāt prajāgaram /
mucyate sarvapāpebhyo gāyaṃstasya śubhāṃ kathām

yāvatastatra tīrthe tu vṛkṣān paśyanti mānavāḥ /
brahmahatyādikaṃ pāpaṃ tāvad eṣāṃ praṇaśyati

prātarutthāya ye kecit paśyanti balakeśavau /
tenaiva sadṛśāḥ sarve devadevena cakriṇā

te pūjyāste namaskāryāsteṣāṃ janma sujīvitam /
ye namanti jagatpūjyaṃ devaṃ nārāyaṇaṃ harim

tatra tīrthe tu yaddānaṃ snānaṃ devārcanaṃ nṛpa /
kriyate tatphalaṃ sarvamakṣayāyopakalpate

agnerapatyaṃ prathamaṃ suvarṇaṃ bhūrvaiṣṇavī sūryasutāśca gāvaḥ /
lokāstrayastena bhavanti dattā yaḥ kāñcanaṃ gāṃ ca bhuvaṃ ca dadyāt

etatte kathitaṃ sarvaṃ tīrthamāhātmyamuttamam /
atītaṃ ca bhaviṣyacca vartamānaṃ mahābalam

śrutvā vāpi paṭhitvedaṃ śrāvayipatvātha dhārmikān /
mucyate sarvapāpebhyo nātra kāryā vicāraṇā