Revākhāṇḍa (revised text) · Chapter 115
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe ayonisambhavatīrthamāhātmyavarṇanaṃ nāma caturdaśādhikaśatatamo 'dhyāyaḥ ||
RKV adhyāya 115
śrīmārkaṇḍeya uvāca:
tato gacchenmahārāja tīrtham aṅgārakaṃ param /
rūpadaṃ sarvalokānāṃ viśrutaṃ narmadātaṭe
aṅgārakeṇa rājendra purā taptaṃ tapaḥ kila /
arbudaṃ ca nikharvaṃ ca prayutaṃ varṣasaṃkhyayā
tatastuṣṭo mahādevaḥ parayā kṛpayā nṛpa /
pratyakṣadarśī bhagavān uvāca kṣitinandanam
varado 'smi mahābhāga durlabhaṃ tridaśair api /
varaṃ dāsyāmyahaṃ vatsa brūhi yatte vivakṣitam
aṅgāraka uvāca:
tava prasādāddeveśa sarvalokamaheśvara /
grahamadhyagato nityaṃ vicarāmi nabhastale
yāvaddharādharo loke yāvaccandradivākarau /
nadyo nadāḥ samudrāśca varo me cākṣayo bhavet
evamastviti deveśo dattvā varamanuttamam /
jagāmākāśamāviśya vandyamānaḥ surāsuraiḥ
bhūmiputrastatastasminsthāpayāmāsa śaṅkaram /
gataḥ surālaye loke grahabhāve niveśitaḥ
tatra tīrthe tu yaḥ snātvā pūjayetparameśvaram /
hutahomo jitakrodhaḥ so 'śvamedhaphalaṃ labhet
caturthyaṅgārake yastu snātvā cābhyarcayedgraham /
aṅgārakaṃ vidhānena saptajanmāni bhārata
daśayojanavistīrṇe maṇḍale rūpavān bhavet /
tatraiva tā mṛto jantuḥ kāmato 'kāmato 'pi vā /
rudrasyānucaro bhūtvā tenaiva saha modate
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0