Revākhāṇḍa (revised text) · Chapter 109

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe rohiṇīsomanāthatīrthamāhātmyavarṇanaṃ nāmāṣṭottaraśatatamo 'dhyāyaḥ ||
RKV adhyāya 109
śrīmārkaṇḍeya uvāca:
tato gacchenmahīpāla cakratīrthamanuttamam /
senāpuramitikhyātaṃ sarvapāpakṣayaṃkaram

saināpatyābhiṣekāya devadevena cakriṇā /
ānītaśca mahāseno devaiḥ sendrapurogamaiḥ

dānavānāṃ vadhārthāya jayāya ca divaukasām /
bhūmidānena viprendrāṃs tarpayitvā yathāvidhi

śaṅkhabherīninādaiśca paṭahānāṃ ca nisvanaiḥ /
vīṇāveṇumṛdaṅgaiśca jhallarīsvaramaṅgalaiḥ

tataḥ kṛtvā svanaṃ ghoraṃ dānavo baladarpitaḥ /
rururnāma vighātārthamabhiṣekasya cāgataḥ

hastyaśvarathapattyoghaiḥ pūrayanvai diśo daśa /
tatra tena mahadyuddhaṃ pravṛttaṃ kila bhārata

śaktyṛṣṭipāśamuśalaiḥ khaḍgaistomaraṭaṅkanaiḥ /
bhallaiḥ karṇikanārācaiḥ kabandhapaṭasaṃkulaiḥ

tatastu tāṃ śatrubalasya senāṃ kṣaṇena cāpancyutabāṇaghātaiḥ /
vidhvastahastyaśvarathānmahātmā jagrāha cakraṃ ripusaṅghanāśanaḥ

jvalacca cakraṃ niśitaṃ bhayaṃkaraṃ surāsurāṇāṃ ca sudarśanaṃ raṇe /
cakarta daityasya śirastadānīṃ karātpramuktaṃ madhughātinaśca tat

taṃ dṛṣṭvā sahasā vighnamabhiṣeke ṣaḍānanaḥ /
tyaktvā tu tatra saṃsthānaṃ cacāra vipulaṃ tapaḥ

muktaṃ cakraṃ vināśāya hariṇā lokadhāriṇā /
dvidalaṃ dānavaṃ kṛtvā papāta vimale jale

tadā prabhṛti tattīrthaṃ cakratīrthamiti śrutam /
sarvapāpavināśāya nirmitaṃ viśvamūrtinā

cakratīrthe tu yaḥ snātvā pūjayed devamacyutam /
puṇḍarīkasya yajñasya phalamāpnoti mānavaḥ

tatra tīrthe tu yaḥ snātvā pūjayed brāhmaṇāñchubhān /
śāntadāntajitakrodhānsa labhetkoṭijaṃ phalam

tatra tīrthe tu yo bhaktyā tyajate dehamātmanaḥ /
viṣṇulokaṃ mṛto yāti jayaśabdādimaṅgalaiḥ

krīḍayitvā yathākāmaṃ devagandharvapūjitaḥ /
ihāgatya ca bhūyo 'pi jāyate vipule kule

etatpuṇyaṃ pāpaharaṃ dhanyaṃ duḥkhapraṇāśanam /
kathitaṃ te mahābhāga bhūyaścānyacchṛṇuṣva me