Rāmodanta · Verses 61*-80*

vrajan vanena kākutstho virādhaṃ vidhicoditam
sadārānujam ātmānaṃ harantam avadhīt tadā //

śarabhaṅgāśramam prāpya svargatiṃ tasya vīkṣya saḥ
pratijajñe rākṣasānāṃ vadhaṃ munibhir arthitaḥ //

tasmād gatvā sutīkṣṇaṃ ca praṇamyānena pūjitaḥ
agastyasyāśramaṃ prāpya taṃ nanāma raghūttamaḥ //

rāmāya vaiṣṇavaṃ cāpam aindraṃ tūṇīyugaṃ tathā
brāhmaṃ cāstraṃ ca khaḍgaṃ ca pradadau kumbhasaṃbhavaḥ //

tataḥ sa gacchan kākutsthaḥ samāgamya jaṭāyuṣam
vaidehyāḥ pālanāyainaṃ śraddadhe pitṛvallabham //

tataḥ pañcavaṭīṃ prāpya tatra lakṣmaṇanirmitām
parṇaśālām adhyuvāsa sītayā sahitaḥ sukham //

tatrābhyetyaikadā rāmaṃ vavre śūrpaṇakhābhikā
tannirastā lakṣmaṇaṃ ca vavre so'; pi nirākarot //

rāmam eva tato vavre kāmārtā kāmasaṃnibham
punaś ca dhikkṛtā tena sītām abhyadravad ruṣā //

lakṣmaṇena tadā roṣāt kṛttaśravaṇanāsikā
sā tu gatvā janasthānaṃ kharāyaitan nyavedayat //

tad ākarṇya kharaḥ kruddho rāghavaṃ hantum āyayau
dūṣaṇatriśiromukhyair yātudhānaiḥ samanvitaḥ //

tat kṣaṇaṃ lakṣmaṇe sītāṃ nidhāya raghunandanaḥ
kharaṃ sahānugaṃ saṃkhye jaghānālaghuvikramaḥ //

tataḥ śūrpaṇakhā gatvā laṅkāṃ śokasamanvitā
nyavedayad rāvaṇāya vṛttāntaṃ sarvam āditaḥ //

tac chrutvā rāvaṇaḥ sītāṃ hartuṃ kṛtamatis tadā
mārīcasyāśramaṃ prāpya sāhāyye tam acodayat //

so 'pi svarṇamṛgo bhūtvā sītāyāḥ pramukhe 'carat
sā tu taṃ mṛgam āhartuṃ bhartāraṃ samayācata //

niyujya lakṣmaṇaṃ sītāṃ rakṣituṃ raghunandanaḥ
anvagacchan mṛgaṃ tūrṇaṃ dravantaṃ kānanāntare //

vivyādha ca mṛgaṃ rāmaḥ sa nijaṃ rūpam āsthitaḥ
hā sīte lakṣmaṇety evaṃ rudan prāṇān samatyajat //

etad ākarṇya vaidehyā lakṣmaṇaś codito bhṛśam
tadrakṣāṃ devatāḥ prārthya prayayau rāghavāntikam //

tad antare samāsādya rāvaṇo yatirūpadhṛt
sītāṃ gṛhītvā prayayau gaganena mudānvitaḥ //

tato jaṭāyur ālokya nīyamānāṃ tu jānakīm
prāharad rāvaṇaṃ prāpya tuṇḍapakṣanakhair bhṛśam //

chittvainam candrahāsena pātayitvā ca bhūtale
gṛhītvā rāvaṇaḥ sītāṃ prāviśan nijamandiram //