praṇavopaniṣat · Chapter 1

praṇavopaniṣat(१)
ॐ saha nāvastu / saha nau bhunaktu /
saha vīryaṃ karavāvahai /
tejasvi nāvadhītamastu mā vidviṣāvahe /
ॐ śāntiḥ śāntiḥ śāntiḥ //
purastādbrahmaṇastasya viṣṇoradbhutakarmaṇaḥ /
rahasyaṃ brahmavidyāyā dhṛtāgniṃ saṃpracakṣate //
omityekākṣaraṃ brahma yaduktaṃ brahmavādibhiḥ /
śarīraṃ tasya vakṣyāmi sthānakālatrayaṃ tathā //
tatra devāstrayaḥ proktā lokā vedāstrayo'gnayaḥ /
tisro mātrārdhamātrā ca pratyakṣasya śivasya tat //
ṛgvedo gārhapatyaṃ ca pṛthivī brahma eva ca /
akārasya śarīraṃ tu vyākhyātaṃ brahmavādibhiḥ //
yajurvedo'ntarikṣaṃ ca dakṣiṇāgnistathaiva ca /
viṣṇuśca bhagavān deva ukāraḥ parikīrtitaḥ //
sāmavedastathā dyauścāhavanīyastathaiva ca /
īśvaraḥ paramo devo makāraḥ parikīrtitaḥ //
sūryamaṇḍalamābhāti hyakāraścandramadhyagaḥ /
ukāraścandrasaṃkāśastasya madhye vyavasthitaḥ /
makāraścāgnisaṃkāśo vidhūmo vidyutopamaḥ /
tisro mātrāstathā jñeyāḥ somasūryāgnitejasaḥ //
śikhā ca dīpasaṃkāśā yaminnu parivartate /
ardhamātrā tathā jñeyā praṇavasyopari sthitā //
padmasūtranibhā sūkṣmā śikhābhā dṛśyate parā /
nāsādisūryasaṃkāśā sūryaṃ hitvā tathāparam /
dvisaptatisahasrāṇi nāḍibhistvā tu mūrdhani /
varadaṃ sarvabhūtānāṃ sarvaṃ vyāpyaiva tiṣṭhati //
kāṃsyaghaṇṭāninādaḥ syādyadā lipyati śāntaye/
oṅkārastu tathā yojyaḥ śrutaye sarvamicchati //
yasmin sa līyate śabdastatparaṃ brahma gīyate /
so'mṛtatvāya kalpate so'mṛtatvāya kalpate // iti //
iti praṇavopaniṣatsamāptā