Paraśurāmakalpasūtra · Chapter 1

1. Khaṇḍa: Dīkṣā-vidhi
athâto dīkṣāṃ vyākhyāsyāmaḥ

bhagavān parama-śiva-bhaṭṭārakaḥ śruty-ādy-aṣṭādaśa-vidyāḥ sarvāṇi darśanāni līlayā tat-tad-avasthā-''pannaḥ praṇīya, saṃvinmayyā bhagavatyā bhairavyā svâtmâbhinnayā pṛṣṭaḥ pañcabhiḥ mukhaiḥ pañcâmnāyān paramârtha-sāra-bhūtān praṇināya

tatrâyaṃ siddhāntaḥ

ṣaṭtriṃśat-tattvāni viśvam

śarīra-kañcukitaḥ śivo jīvo niṣkañcukaḥ para-śivaḥ

sva-vimarśaḥ purusârthaḥ

varṇâtmakā nityāḥ śabdāḥ

mantrāṇām acintya-śaktitā

saṃpradāya-viśvāsābhyāṃ sarva-siddhiḥ

viśvāsa-bhūyiṣṭhaṃ prāmāṇyam

guru-mantra-devatā-''tma-manaḥ-pavanānām
aikya--niṣphālanād antarātma--vittiḥ

ānandaṃ brahmaṇo rūpaṃ, tac ca dehe vyavasthitaṃ, tasyâbhivyañjakāḥ pañca ma-kārāḥ, tair arcanaṃ guptyā, prākaṭyān nirayaḥ

bhāvanā-dārḍhyād ājñā-siddhiḥ

sarva-darśanânindā

agaṇanaṃ kasyâpi

sac-chiṣye rahasya-kathanam

sadā vidyā-'nusaṃhatiḥ

satataṃ śivatā-samāveśaḥ

kāma-krodha-lobha-moha-mada-mātsaryâvihita-hiṃsā-steya-loka-vidviṣṭa-varjanam

eka-gurûpāstir asaṃśayaḥ

sarvatra niṣparigrahatā

phalaṃ tyaktvā karma--karaṇam

anitya-karma-lopaḥ

ma-pañcakâlābhe 'pi nitya-krama-pratyavamṛṣṭiḥ

nirbhayatā sarvatra

sarvaṃ vedyaṃ havyam indriyāṇi srucaḥ śaktayo jvālāḥ svâtmā śivaḥ pāvakaḥ svayam eva hotā

nirviṣaya-cid-vimṛṣṭiḥ phalam

ātma-lābhān na paraṃ vidyate

saiṣā śāstra-śailī

veśyā iva prakaṭā vedâdi-vidyāḥ |
sarveṣu darśaneṣu gupteyaṃ vidyā

tatra sarvathā matimān dīkṣeta

dīkṣās tisraḥ śāktī śāmbhavī māntrī ceti |
tatra śāktī śakti-praveśanāt śāmbhavī caraṇa-vinyāsāt
māntrī mantropadiṣṭayā sarvāś ca kuryāt

ekaikāṃ vety eke

sad-guruḥ kramaṃ pravartya sāṅgaṃ hutvā taruṇollāsavān śiṣyam āhūya vāsasā mukhaṃ baddhvā gaṇapati-lalitā-śyāmā-vārtālī-parā-pātra-bindubhis tam avokṣya siddhāntaṃ śrāvayitvā

tac-chirasi rakta-śukla-caraṇaṃ bhāvayitvā tad-amṛta-kṣālitaṃ sarva-śarīram alaṅkuryāt

tasyâmūlam ābrahma-bilaṃ prajvalantīṃ prakāśa-laharīṃ jvalad-anala-nibhāṃ dhyātvā tad-raśmibhis tasya pāpa-pāśān dagdhvā

tri-kaṭu-tri-phalā-catur-jāta-takkola-madayantī-sahadevī-dūrvā-bhasma-mṛttikā-candana-kuṅkuma-rocanā-karpūra-vāsita-jala-pūrṇaṃ vastra-yuga-veṣṭitaṃ nūtana-kalaśaṃ bālā-ṣaḍ-aṅgenâbhyarcya śrī-śyāmā-vārtālī-cakrāṇi nikṣipya tisṛṇām āvaraṇa-mantrair abhyarcya saṃrakṣyâstreṇa pradarśya dhenu-yonī

śiva-yuk-sau-varṇa-karṇike svara-dvandva-juṣṭa-kiñjalkâṣṭake ka ca ṭa ta pa ya śa lâkṣara-vargâṣṭa-yuktâṣṭa-dale dig-aṣṭaka-sthita ṭhaṃ vaṃ catur-aśre mātṛkā-yantre śiṣyaṃ niveśya tena kumbhâmbhasā tisṛbhiḥ vidyābhiḥ snapayet

sa-dukūlaṃ sâlepaṃ sâbharaṇaṃ sa-mālaṃ suprasannaṃ śiṣyaṃ pārśve niveśya mātṛkāṃ tad-aṅge vinyasya vimukta-mukha-karpaṭasya tasya haste trīn prathama-siktān candanokṣitān dvitīya-khaṇḍān puṣpa-khaṇḍān nikṣipya tattva-mantrair grāsayitvā dakṣiṇa-karṇe bālam upadiśya paścād iṣṭa-manuṃ vadet

tatas tasya śirasi sva-caraṇaṃ nikṣipya sarvān mantrān sakṛd vā krameṇa vā yathā-'dhikāram upadiśya svâṅgeṣu kim-apy aṅgaṃ śiṣyaṃ sparśayitvā tad-aṅga-mātṛkā-varṇâdi dvy-akṣaraṃ try-akṣaraṃ catur-akṣaraṃ vā ānanda-nātha--śabdântaṃ tasya nāma diśet

bālopadiṣṭeḥ pūrvam ātmanaḥ pādukāṃ ṣaṭ-tāra-yuktāṃ dadyāt

ācārān anuśiṣya, hārda-caitanyam āmṛśya, vidyā-trayeṇa tad-aṅgaṃ triḥ parimṛjya parirabhya mūrdhany avaghrāya svâtma-rūpaṃ kuryāt

śiṣyo 'pi pūrṇatāṃ bhāvayitvā kṛtârthas taṃ guruṃ yathā-śakti vittair upacarya vidita-veditavyo 'śeṣa-mantrâdhikārī bhaved iti śivam