Scripture Library

Paippalāda-Saṃhitā · Chapter 3.14

3.14.1

yena vehad babhūvitha
nāśayāmasi tad vayam |
idaṃ tad anyatra tvad
apa dūre ni dadhmasi ||

3.14.2

ā te garbho yonim etu
pumān vāṇa iveṣudhim |
ā vīro 'tra jāyatāṃ
putras te daśamāsyaḥ ||

3.14.3

pumāṃsaṃ putraṃ janaya
taṃ pumān anu jāyatām |
bhavāsi putrāṇāṃ mātā
jātānāṃ janayāsi ca ||

3.14.4

yāni bhadrāṇi bījāny
ṛṣabhā janayanti |
tais tvaṃ putraṃ vindasva
sā prasūr dhenukā bhava ||

3.14.5

kṛṇomi te prajāpatyam
ā garbho yonim etu te |
vindasva putraṃ nāri
yas tubhyaṃ śam asac
cham u tasmai tvaṃ bhava ||

3.14.6

yāsāṃ pitā parjanyo
bhūmir mātā babhūva |
tās tvā putravidyāya
devīḥ prāvantv oṣadhīḥ ||

3.14.7

yas te yonim udiṅgayād
ṛṣabho retasā saha |
sa ta ā siñcatu prajāṃ
dīrghāyuṃ śataśāradām ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0