Paippalāda-Saṃhitā · Chapter 18.20

vediṃ bhūmiṃ kalpayitvā
divaṃ kṛtvā dakṣiṇām |
ghraṃsaṃ tad agniṃ kṛtvā
cakāra viśvam ātmanvad
varṣeṇājyena rohitaḥ ||

varṣam ājyaṃ ghraṃso agnir
vedir bhūmir akalpata |
tatraitān parvatām̐ agnir
gīrbhir ūrdhvām̐ akalpayat ||

gīrbhir ūrdhvān kalpayitvā
rohito bhūmim abravīt |
tvad idaṃ sarvaṃ jāyatāṃ
yad bhūtaṃ yac ca bhāvyam ||

sa yajñaḥ prathamo bhūto
bhavyo ajāyata |
tasmād dha yajña idaṃ sarvaṃ
yat kiṃ cedaṃ virocate
rohitena rṣiṇābhṛtam ||

ud asya ketavo divi
śukrā bhrājanta īrate |
ādityasya nṛcakṣaso
mahivratasya mīduṣaḥ ||

diśāṃ prajñānaṃ svarayantam arciṣā
supakṣam āśuṃ patayantam arṇave |
stavāma sūryaṃ bhuvanasya gopāṃ
yo raśmibhir diśa ābhāti sarvāḥ ||

yat prāṅ pratyaṅ svadhayā yāsi śībhaṃ
nānārūpe ahanī karṣi māyayā |
tad āditya mahi tat te mahi śravo
yad eko viśvaṃ pari bhūma jāyase ||

vipaścitaṃ taraṇiṃ bhrājamānaṃ
vahanti yaṃ haritaḥ sapta bahvīḥ |
stutād yam atrir divam unnināya
taṃ tvā paśyema pariyantam ājim ||

mā tvā dabhan pariyantam ājiṃ
sugena durgam ati yāhi śībham |
divaṃ ca sūrya pṛthivīṃ ca devīm
ahorātre vimimāno yad eṣi ||

svasti te sūrya carase rathāya
yenobhāv antau pariyāsi sadyaḥ |
yaṃ te vahanti harito vahiṣṭhās
tam ā roha sukham āśvaśvam ||