Scripture Library

Paippalāda-Saṃhitā · Chapter 17.47

17.47.1

imā nārīr avidhavāḥ supatnīr
āñjanena sarpiṣā saṃ viśantu |
anaśravo anamīvāḥ suratnā
ā rohantu janayo yonim agre ||

17.47.2

ime vīrā avidhavāḥ sujānaya
āñjanena sarpiṣā saṃ spṛśantām |
anaśravo anamīvāḥ suratnāḥ
syonād yoner adhi talpaṃ ruheyuḥ ||

17.47.3

vyākaromi haviṣāham etau
tau brahmaṇā vy ahaṃ kalpayāmi |
svadhāṃ pitṛbhyo ajarāṃ kṛṇomi
dīrghenāyuṣā sam imāṃ sṛjāmi ||

17.47.4

yo no agniḥ pitaro hṛtsv antar
āviveśāmṛto martyeṣu |
mayy ahaṃ taṃ pari gṛhṇāmi devaṃ
mā so asmān dvikṣata mā vayaṃ tam ||

17.47.5

apāvartyāgniṃ gārhapatyaṃ
kravyādā preta dakṣiṇā |
priyaṃ pitṛbhya ātmane
brahmaṇe kṛṇuta priyam ||

17.47.6

dvibhāgadhanam ādāya
pra kṣināty avartyā |
agniḥ putrasya jyeṣṭhasya
yaḥ kravyād anirāhitaḥ ||

17.47.7

yat kṛṣate yad vanute
yac ca vastena vindate |
sarvaṃ martyasya tan nāsti
kravyāc ced anirāhitaḥ ||

17.47.8

ayajñiyo hatavarcā bhavati
nainena havir attave |
chinatti kṛṣiṃ gāṃ dhanaṃ
yaḥ kravyād anuvartate ||

17.47.9

bahu gṛdhyaiḥ pra vadaty
ārtiṃ martyo ny eti ca |
kravyād yam agnir antikād
anuvidvān vitāvati ||

17.47.10

grāhyā gṛhāḥ saṃ sṛjyante
yat striyā mriyate patiḥ |
brahmaiva vidvān eṣyo
yaḥ kravyādaṃ nir ādadhat ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0