Paippalāda-Saṃhitā · Chapter 16.77

yat te kāma śarma trivarūtham udbhid
brahma varma vitatam anativyādhyaṃ kṛtam |
tena sapatnān pari vṛṅdhi ye mama
pary enān prāṇaḥ prajāḥ paśavo jīvanaṃ vṛṇaktu ||

adharāñcaḥ pra plavantāṃ
chinnā naur iva bandhanāt |
na sāyakapraṇuttānāṃ
punar asti nivartanam ||

agnir yava indro yavaḥ somo yavaḥ |
yavayāvāno deva yāvayantv amum
āmuṣyāyaṇam amuṣyāḥ putraṃ
jīvalokān mṛtalokaṃ gatāsum ||

asarvavīraś carati praṇutto
mitrāṇāṃ dveṣyaḥ parivargyaḥ svānām |
uta pṛthivyām ava syanti vidyuta
ugro devaḥ pra mṛṇat sapatnān ||

cyutā ceyaṃ bṛhaty acyutā ca
vidyud bibharti stanayitnūṃś ca sarvān |
teṣām ādityo draviṇena tejasā-
-udyan sapatnān nudatāṃ me sahasvān ||

yathā devā asurān prāṇudanta yena-
-indro dasyūn adhamaṃ tamo babādhe |
tathā tvaṃ kāma mama ye sapatnās
tān asmāl lokāt pra ṇudasva sarvān ||

yena devā asurān prāṇudanta viśvahā
yenendro dasyūn adhamaṃ tamo babādhe |
tena tvaṃ kāma mama ye sapatnās
tān asmāl lokāt pra ṇudasva dūram ||

kāmo jajñe prathamo nānyat purā
nainaṃ devā āpuḥ pitaro nota martyāḥ |
tatas tvam asi jyāyān viśvahā mahāṃs
tasmai te kāma nāma it kṛṇomi ||

na vai vātaś cana kāmam āpa
nāgniḥ sūryo nota candramāḥ |
(…) ||

na vā āpaś cana kāmam āpur
nāhorātrāṇi vihitāni yanti |
(…) || ||