Paippalāda-Saṃhitā · Chapter 16.32

divas pṛthivyā antarikṣāt samudrād
agner vātān madhukaśā hi jajñe |
tāṃ cāyitvāmṛtaṃ vasānāṃ
hṛdbhiḥ prajāḥ prati nandanti sarvāḥ ||

paśyanty asyāś caritaṃ pṛthivyāṃ
pṛthaṅ naro bahudhā mīmāṃsamānāḥ |
agner vātān madhukaśā hi jajñe
marutām ugrā naptiḥ ||

mahad viśvarūpaṃ payo asyāḥ
samudrasyota tvā reta āhuḥ |
yata aiti madhukaśā rarāṇā
tat prāṇas tad amṛtaṃ niviṣṭam ||

mātādityānāṃ duhitā vasūnāṃ
prāṇaḥ prajānām amṛtasya nābhiḥ |
hiraṇyavarṇā madhukaśā ghṛtācī
mahad bhargaś carati martyeṣu ||

madhoḥ kaśām ajanayanta devās
tasyā garbho abhavad viśvarūpam |
taṃ jātaṃ taruṇaṃ piparti mātā
sa jāto viśvā bhuvanābhi vaste ||

kas tau pra veda ka u tau na āha
yāv asyā stanau sahasradhārāv akṣitau |
ūrjaṃ duhāte anapasphurantau ||

kas taṃ pra veda ka u taṃ ciketa
yo asyā hṛdaḥ kalaśaḥ somadhāno akṣitaḥ |
brahmā sumedhāḥ so asmin madeta ||

hiṅkarikratī bṛhatī vayodhā
uccairghoṣābhi yāti yā vratā |
trīn gharmān abhi vāvaśānā
mimāti māyuṃ payate payobhiḥ ||

yām āpīnām upa sīdanty āpo
yāṃ śakvarā vṛṣabhā yāṃ svarājaḥ |
te varṣanti te varṣayanti
tad vide kāmam ūrjam āpaḥ ||

stanayitnus te vāk prajāpate
vṛṣā śuṣmaṃ kṣipasi bhūmyām adhi |
agner vātān madhukaśā hi jajñe
marutām ugrā naptiḥ ||