પૈપ્પલાદ-સંહિતા · અધ્યાય 16.32

દિવસ્ પૃથિવ્યા અન્તરિક્ષાત્ સમુદ્રાદ્
અગ્નેર્ વાતાન્ મધુકશા હિ જજ્ઞે ।
તાં ચાયિત્વામૃતં વસાનાં
હૃદ્ભિઃ પ્રજાઃ પ્રતિ નન્દન્તિ સર્વાઃ ॥

પશ્યન્ત્ય્ અસ્યાશ્ ચરિતં પૃથિવ્યાં
પૃથઙ્ નરો બહુધા મીમાંસમાનાઃ ।
અગ્નેર્ વાતાન્ મધુકશા હિ જજ્ઞે
મરુતામ્ ઉગ્રા નપ્તિઃ ॥

મહદ્ વિશ્વરૂપં પયો અસ્યાઃ
સમુદ્રસ્યોત ત્વા રેત આહુઃ ।
યત ઐતિ મધુકશા રરાણા
તત્ પ્રાણસ્ તદ્ અમૃતં નિવિષ્ટમ્ ॥

માતાદિત્યાનાં દુહિતા વસૂનાં
પ્રાણઃ પ્રજાનામ્ અમૃતસ્ય નાભિઃ ।
હિરણ્યવર્ણા મધુકશા ઘૃતાચી
મહદ્ ભર્ગશ્ ચરતિ મર્ત્યેષુ ॥

મધોઃ કશામ્ અજનયન્ત દેવાસ્
તસ્યા ગર્ભો અભવદ્ વિશ્વરૂપમ્ ।
તં જાતં તરુણં પિપર્તિ માતા
સ જાતો વિશ્વા ભુવનાભિ વસ્તે ॥

કસ્ તૌ પ્ર વેદ ક ઉ તૌ ન આહ
યાવ્ અસ્યા સ્તનૌ સહસ્રધારાવ્ અક્ષિતૌ ।
ઊર્જં દુહાતે અનપસ્ફુરન્તૌ ॥

કસ્ તં પ્ર વેદ ક ઉ તં ચિકેત
યો અસ્યા હૃદઃ કલશઃ સોમધાનો અક્ષિતઃ ।
બ્રહ્મા સુમેધાઃ સો અસ્મિન્ મદેત ॥

હિઙ્કરિક્રતી બૃહતી વયોધા
ઉચ્ચૈર્ઘોષાભિ યાતિ યા વ્રતા ।
ત્રીન્ ઘર્માન્ અભિ વાવશાના
મિમાતિ માયું પયતે પયોભિઃ ॥

યામ્ આપીનામ્ ઉપ સીદન્ત્ય્ આપો
યાં શક્વરા વૃષભા યાં સ્વરાજઃ ।
તે વર્ષન્તિ તે વર્ષયન્તિ
તદ્ વિદે કામમ્ ઊર્જમ્ આપઃ ॥

સ્તનયિત્નુસ્ તે વાક્ પ્રજાપતે
વૃષા શુષ્મં ક્ષિપસિ ભૂમ્યામ્ અધિ ।
અગ્નેર્ વાતાન્ મધુકશા હિ જજ્ઞે
મરુતામ્ ઉગ્રા નપ્તિઃ ॥