Paippalāda-Saṃhitā · Chapter 16.27

ayaṃ pratisaro maṇir
vīro vīrāya badhyate |
vīryāvānt sapatnahā śūravīraḥ
paripāṇaḥ sumaṅgalaḥ ||

ayaṃ maṇiḥ sapatnahā suvīraḥ
sahasvān vājī sahamāna ugraḥ |
pratyak kṛtyā dūṣayann etu vīraḥ ||

anenendro maṇinā vṛtram ahann
anenāsurān parābhāvayan manīṣī |
anena dyāvāpṛthivī ubhe ajayad
anenājayat pradiśaś catasraḥ ||

ayaṃ srāktyo maṇiḥ
pratīvartaḥ pratisaraḥ |
ojasvān vimṛdho maṇiḥ
so asmān pātu viśvataḥ ||

tad agnir āha tad u soma āha
bṛhaspatiḥ savitā tad indraḥ |
te te devāḥ purohitāḥ pratīcīḥ
kṛtyāḥ pratisarair ajantu ||

antar dadhe dyāvāpṛthivī
utāhar uta sūryam |
utemaṃ brahmaṇaspatiṃ
te te devāḥ purohitāḥ pratīcīḥ
kṛtyāḥ pratisarair ajantu ||

ye srāktyaṃ maṇiṃ
janā varmāṇi kṛṇvate |
sūryo divam ivāruhya
vi kṛtyā bādhate vaśī ||

srāktyena maṇina
ṛṣiṇeva manīṣiṇā |
ajaiṣaṃ sarvāḥ pṛtanā
vi mṛdho hanmi rakṣasaḥ ||

yāḥ kṛtyā āṅgirasīr
yāḥ kṛtyā āsurīr uta |
kṛtyā yāḥ svayaṃkṛtā
yā u cānyebhir ābhṛtāḥ |
ubhayīs tāḥ parā yantu
parāvataṃ navatiṃ nāvyā ati ||

asmai maṇiṃ varma badhnantu devā
indro viṣṇuḥ savitā rudro agniḥ |
prajāpatiḥ parameṣṭhī virāḍ
vaiśvānara ṛṣayaś ca sarve ||