Paippalāda-Saṃhitā · Chapter 16.18

kutas tau jātau katamaḥ so ardhaḥ
kasmāl lokāt katarasyāḥ pṛthivyāḥ |
vatsau virājaḥ salilād udaitāṃ
tau tvā pṛcchāmi katareṇa dugdhā ||

yo 'krandayat salilaṃ mahitvā
yoniṃ kṛtvā tribhujaṃ śayānam |
vatsaḥ kāmadugho virājo
guhā cakre tanvaḥ parācīḥ ||

yāni catvāri bṛhanti
yeṣāṃ caturthaṃ viyunakti vācam |
brahmainad vidyāt tapasā vipaścid
yasminn ekaṃ yujyate yasminn ekam ||

bṛhataḥ pari sāmāni
ṣaṣṭhāt pañcādhi nirmitā |
bṛhad bṛhatyā nirmitaṃ
kuto 'dhi bṛhatī mitā ||

bṛhatī pari mātrāyā
mātur mātrādhi nirmitā |
māyā hi jajñe māyāyā
māyāyā mātalī pari ||

vaiśvānarasya pratimopari dyaur
yāvad rodasī vibabādhe agniḥ |
tataḥ ṣaṣṭhād āmuto yanti stomā
ud ito yanty abhi ṣaṣṭham ahnaḥ ||

ṣaṭ ṭvā pṛcchāma ṛṣayaḥ kaśyapedaṃ
tvaṃ hi yuktaṃ yuyukṣe yogyaṃ ca |
virājam āhur brahmaṇaḥ pitaraṃ
tāṃ no vi dhehy ṛtuthā sakhibhyaḥ ||

yāṃ pracyutām anu yajñāḥ pracyuvanta
upatiṣṭhanta upatiṣṭhamānām |
tasyā vraje prasave yakṣam ejati
sā virāḍ ṛṣayaḥ parame vyoman ||

aprāṇaiti prāṇena prāṇatīnāṃ
virāṭ svarājam abhy eti paścāt |
viśvaṃ mṛśantīm abhirūpāṃ virājaṃ
paśyanti tve na tve paśyanty enām ||

ko virājo mithunatvaṃ pra veda
ka ṛtūn ka u kalpam asyāḥ |
kramān ko asyā bahudhā vidugdhān
ko asyā dhāma katidhā vyuṣṭīḥ ||