Paippalāda-Saṃhitā · Chapter 16.108

yat te kruddho dhanapatiḥ
kṣīraṃ te abharad vaśe |
idaṃ tad adya nākas
triṣu pātreṣu rakṣati ||

triṣu pātreṣu taṃ somam
ā devy abharad vaśā |
atharvā yatra dīkṣito
barhiṣy āsta hiraṇyaye ||

saṃ hi somenāgata
sam u sarveṇa padvatā |
vaśā samudre prānartīd
ṛcaḥ sāmāni bibhratī ||

saṃ hi sūryeṇāgata
sam u sarveṇa cakṣuṣā |
vaśā samudram aty aṣṭhād
gandharvaiḥ kalibhiḥ saha ||

saṃ hi vātenāgata
sam u sarvaiḥ patatribhiḥ |
vaśā samudram aty akhyad
bhadrā jyotīṃṣi bibhratī ||

tad bhadrāḥ sam agacchanta
vaśā deṣṭry atho svadhā |
atharvā yatra dīkṣito
barhiṣy āsta hiraṇyaye ||

abhīvṛtā hiraṇyena
yad atiṣṭha ṛtāvari |
aśvaḥ samudro bhūtvā-
-adhy askandad vaśe tvā ||

vaśā mātā rājanyasya
vaśā mātā svadhe tava |
vaśāyā jajña āyudhaṃ
tataś cittam ajāyata ||

ūrdhvo bindur ud acarad
brahmaṇaḥ kakudād adhi |
tatas tvaṃ jajñiṣe vaśe
tato hotā ajāyata ||

āsnas te gāthā bhavantu-
-uṣṇihābhyo balaṃ tava |
pājasyāj jajñe te yajña
stanebhyo raśmayo vaśe ||